വീണ്ടും വില്ലനായി കുഴിമന്തി, പറവൂരിൽ 17 പേര്ക്ക് ഭക്ഷ്യവിഷബാധ; ഒരാളുടെ നില ഗുരുതരം
കൊച്ചി: എറണാകുളം പറവൂരിലെ ഹോട്ടലില് നിന്നും കുഴിമന്തി കഴിച്ചവര്ക്ക് ഭക്ഷ്യവിഷബാധ. പറവൂരിലെ മജ്ലിസ് ഹോട്ടലില് നിന്നും ഭക്ഷണം കഴിച്ചവര്ക്കാണ് ഭക്ഷ്യവിഷബാധയേറ്റത്. ഗുരുതരാവസ്ഥയിലായ ഒരു യുവതിയെ മെഡിക്കല് കോളേജ് ആശുപത്രിയിലേക്ക് മാറ്റിയിട്ടുണ്ട്. 9 പേര് കുന്നുകര എം ഇ എസ് കോളേജിലെ വിദ്യാര്ത്ഥികളാണ്. കൂടുതര് പേര്ക്കും ഭക്ഷ്യവിഷബാധയേറ്റിട്ടുണ്ടെന്നാണ് വിവരം.
ഇന്നലെ വൈകീട്ട് ഹോട്ടലില് നിന്നും ഭക്ഷണം കഴിച്ചവര്ക്കാണ് ഭക്ഷ്യവിഷബാധയേറ്റത്. കുഴിമന്തിയും അല്ഫാമും ഷവായിയും കഴിച്ചവരെയാണ് കടുത്ത ചര്ദ്ദിയെയും വയറിളക്കത്തെ തുടര്ന്ന് ആശുപത്രിയില് പ്രവേശിപ്പിച്ചത്. കുഴിമന്ത്രി റൈസ് മാത്രം കഴിച്ചവര്ക്ക് വലിയ ആരോഗ്യപ്രശ്നങ്ങള് ഒന്നും തന്നെ സംഭവിച്ചിട്ടില്ല. മാംസം കഴിച്ചതാണ് ഭക്ഷ്യവിഷബാധയ്ക്ക് കാരണമായതെന്നാണ് കരുതുന്നത്.
സംഭവത്തെ തുടര്ന്ന് മുനിസിപ്പാലിറ്റി ആരോഗ്യ വിഭാഗം ഉദ്യോഗസ്ഥര് എത്തി ഹോട്ടല് അടപ്പിച്ചിട്ടുണ്ട്. ഇവരുടെ തന്നെ ഉടമസ്ഥതയിലുള്ള മറ്റൊരു ഹോട്ടലില് നിന്നും ചായപ്പൊടിയില് നിറം ചേര്ത്തത് പിടികൂടിയതിനെ തുടര്ന്ന് നടപടി സ്വീകരിച്ചിരുന്നു. രണ്ട് ദിവസം മുമ്പാണ് കൊച്ചിയില് വച്ച് 500 കിലോ പോത്തിറച്ചി ആരോഗ്യ വിഭാഗം പിടികൂടിയത്.
കളമശേരി കൈപ്പട മുകളിലെ സെന്ട്രല് കിച്ചണില് നിന്നാണ് നഗരസഭയുടെ ആരോഗ്യ വിഭാഗം നടത്തിയ പരിശോധനയില് ചീഞ്ഞ ഇറച്ചി പിടികൂടിയത്. സംഭവവുമായി ബന്ധപ്പെട്ട് ഈ ഹോട്ടലിന് എന്തെങ്കിലും ബന്ധമുണ്ടോ എന്നുള്ള കാര്യം പരിശോധിക്കുമെന്ന് അധികൃതര് അറിയിച്ചു.
സ്ഥലപരിമിതിയുണ്ട്... എങ്കിലും ഹൈക്കോടതി കളമശ്ശേരിയിലേക്ക് മാറ്റില്ല; വ്യക്തമാക്കി ചീഫ് ജസ്റ്റിസ്
അതേസമയം, സംസ്ഥാന വ്യാപകമായി ഒരാഴ്ചയ്ക്കിടെ 2551 സ്ഥാപനങ്ങളില് ഭക്ഷ്യ സുരക്ഷാ വകുപ്പ് പ്രത്യേക പരിശോധന നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചിരുന്നു. വൃത്തിഹീനമായി പ്രവര്ത്തിച്ചതും ലൈസന്സ് ഇല്ലാതിരുന്നതുമായ 102 സ്ഥാപനങ്ങളുടെ പ്രവര്ത്തനം നിര്ത്തി വയ്പ്പിച്ചു. 564 സ്ഥാപനങ്ങള്ക്ക് നോട്ടീസ് നല്കി. പരിശോധന ശക്തമായി തുടരുന്നതാണെന്നും മന്ത്രി അറിയിച്ചിരുന്നു.
അതേസമയം, സംസ്ഥാനത്ത് പച്ചമുട്ട കൊണ്ടുണ്ടാക്കുന്ന മയോന്നൈസ് ഉത്പാദനം, സംഭരണം, വില്പ്പന എന്നിവ നിരോധിച്ച് ഭക്ഷ്യ സുരക്ഷാ വകുപ്പ് ഉത്തരവിട്ടിരുന്നു. എഫ്.എസ്.എസ്.എ. ആക്ട് പ്രകാരം അടിയന്തര പ്രധാന്യത്തോടെയാണ് ഉത്തരവ് പുറത്തിറക്കിയിരിക്കുന്നത്. സമയബന്ധിതമായി ഉപയോഗിച്ചില്ലെങ്കില് പച്ചമുട്ട ഉപയോഗിച്ചു കൊണ്ടുണ്ടാക്കിയ മയോണൈസ് ഏറെ അപകടമാണെന്ന് കണ്ടെത്തിയിരുന്നു. ഹോട്ടല്, റെസ്റ്റോറന്റ്, ബേക്കറി, വഴിയോര കച്ചവടക്കാര്, കാറ്ററിംഗ് എന്നീ മേഖലകളിലെ സംഘടനാ പ്രതിനിധികളുമായുള്ള യോഗത്തില് പച്ചമുട്ട കൊണ്ടുണ്ടാക്കുന്ന മയോന്നൈസ് ഒഴിവാക്കുന്നതിന് പൂര്ണ പിന്തുണയും നല്കിയിരുന്നു. ഇതിനെ തുടര്ന്നാണ് അടിയന്തരമായി പച്ചമുട്ട കൊണ്ടുണ്ടാക്കുന്ന മയോന്നൈസ് നിരോധിച്ചത്.
മയോണൈസ് ഉപയോഗിച്ചുള്ള പലതരം ഭക്ഷണം കഴിച്ചവരില് ഭക്ഷ്യ വിഷബാധ ഉണ്ടായതായി പല പരാതികളും ഉയര്ന്നിരുന്നു. സാന്ഡ്വിച്ചുകളിലും ഷവര്മകളിലും സാധാരണയായി ക്രീം സോസ് അല്ലെങ്കില് ഡ്രസിംഗ് ആയി മയോണൈസ് ഉപയോഗിക്കുന്നുണ്ട്. ശരിയായ രീതിയില് പാസ്ചറൈസ് ചെയ്യാതെ മയോണൈസ് ഉണ്ടാക്കി സൂക്ഷിച്ചാല് സാല്മൊണെല്ല ബാക്ടീരിയ പെരുകാനും രോഗബാധയുണ്ടാകാനും സാധ്യതയുണ്ട്. ആരോഗ്യമുള്ള ആളിനെപ്പോലും ഇത് ബാധിക്കും. ലാബ് റിപ്പോര്ട്ടുകളില് നിന്നും ഇത്തരം മയോണൈസില് രോഗാണുക്കള് കണ്ടെത്തിയിരുന്നു. പച്ച മുട്ടയില് നിന്നും ഉണ്ടാക്കുന്ന മയോണൈസ് ഭക്ഷ്യ സുരക്ഷയില് ഏറെ അപകടമുള്ളതാണെന്ന് സംശയിക്കുന്നു. അതിനാലാണ് ഈയൊരു തീരുമാനമെടുത്തത്. വെജിറ്റബിള് മയോണൈസോ, പാസ്ചറൈസ് ചെയ്ത മുട്ടയില് നിന്നുണ്ടാക്കുന്ന മയോണൈസോ ഉപയോഗിക്കാവുന്നതാണ്.
സംസ്ഥാനത്ത് ഭക്ഷണ സാധനങ്ങള് പൊതിഞ്ഞു നല്കുന്ന എല്ലാ സ്ഥാപനങ്ങളും ഭക്ഷണ പൊതികളില് ഭക്ഷ്യ സുരക്ഷാ അറിയിപ്പ് സംബന്ധിച്ച സ്റ്റിക്കര് പതിപ്പിക്കേണ്ടതാണെന്ന് ഭക്ഷ്യ സുരക്ഷാ വകുപ്പ് അറിയിപ്പ് പുറത്തിറക്കിയിട്ടുണ്ട്. ഭക്ഷണം പാകം ചെയ്ത തീയതിയും സമയവും, ഏത് സമയം വരെ ആ ഭക്ഷണം കഴിക്കാം എന്നിവ സ്റ്റിക്കറിലുണ്ടായിരിക്കണം. സംസ്ഥാനത്തെ ഭക്ഷണ സ്ഥാപനങ്ങളില് നിന്നും പാഴ്സല് കൊടുക്കുന്ന ഭക്ഷണ സാധനങ്ങള് നിശ്ചിത സമയപരിധി കഴിഞ്ഞ് കഴിക്കുന്നതിലൂടെ ഭക്ഷ്യ സുരക്ഷാ പ്രശ്നങ്ങള് ഉണ്ടാകുന്നു എന്നത് ശ്രദ്ധയില്പ്പെട്ടതിനെ തുടര്ന്നാണ് നടപടി.