കുണ്ടങ്കാരടുക്കയിലെ 'ചീറ്റപ്പുലി'യുടെ ദൃശ്യം സിസിടിവിയില്‍; നാട്ടുകാരുടെ ഭീതി ഇരട്ടിച്ചു

By Desk

Updated: Thursday, January 11, 2018, 11:12 [IST]

കുമ്പള: കുമ്പള കുണ്ടങ്കാരടുക്ക പള്ളിയില്‍ സ്ഥാപിച്ച സിസിടിവിയില്‍ 'ചീറ്റപ്പുലി'യുടെ ദൃശ്യം പതിഞ്ഞു. ഇതോടെ നാട്ടുകാരുടെ ഭീതി ഇരട്ടിച്ചിരിക്കുകയാണ്. കഴിഞ്ഞ ദിവസം കടയടച്ച് വീട്ടിലേക്ക് കാറില്‍ പോവുകയായിരുന്ന കുമ്പളയിലെ വ്യാപാരി ചീറ്റപ്പുലിയെ കണ്ടതായി വാര്‍ത്ത പരന്നിരുന്നു.

കാറിന്റെ വെളിച്ചം കണ്ടപ്പോള്‍ ചീറ്റപ്പുലി മതില്‍ ചാടി കാട്ടിലേക്ക് ഓടി മറയുകയായിരുന്നുവെന്നാണ് വ്യാപാരി പറഞ്ഞത്. ഇതോടെ നാട്ടുകാര്‍ ഭീതിയിലാവുകയായിരുന്നു.

തുടര്‍ന്ന് കുണ്ടങ്കാരടുക്ക ഹിദായത്ത് നഗറിലെ ത്വാഹ പള്ളിയില്‍ സ്ഥാപിച്ച സി.സി.ടി.വി ദൃശ്യം പരിശോധിച്ചപ്പോഴാണ് ചീറ്റപ്പുലി എന്ന് സംശയിക്കുന്ന ജീവിയുടെ ചിത്രം പതിഞ്ഞത് ശ്രദ്ധയില്‍പെട്ടത്. പള്ളിയുടെ സമീപത്തായി കാടുണ്ട്. ചീറ്റപ്പുലിയിറങ്ങിയെന്ന വാര്‍ത്ത പരന്നതോടെ പ്രദേശവാസികള്‍ ഭയത്തോടെയാണ് കഴിയുന്നത്. ഫോറസ്റ്റ് അധികൃതരെ വിവരമറിയിച്ചിട്ടും അവര്‍ തിരിഞ്ഞു നോക്കുന്നില്ലെന്ന് നാട്ടുകാര്‍ പരാതിപ്പെട്ടു.