രോഗികളുള്ള വീടുകളില് നിന്നുള്ളവര് ക്വാറന്റൈന് ലംഘിക്കുന്നത് കര്ശനമായി തടയും: മുഖ്യമന്ത്രി
തിരുവനന്തപുരം: രോഗികളുള്ള വീടുകളില് നിന്നുള്ളവര് ക്വാറന്റയിന് ലംഘിക്കുന്നത് കര്ശനമായി തടയുമെന്ന് മുഖ്യമന്ത്രി പിണറായി വിജയൻ. ക്വാറന്റയിന് ലംഘിക്കുന്നവരെ നിര്ബന്ധിതമായി ക്വാറന്റയിനിലേക്കയക്കാന് തദ്ദേശസ്വയംഭരണസ്ഥാപനങ്ങള് മുന്നിട്ടിറങ്ങണം. നിലവില് അത്തരത്തില് ഉള്ള പ്രവര്ത്തനങ്ങള് എല്ലാ ജില്ലകളിലും നടക്കുന്നുണ്ട്. അത് കൂടുതല് ശക്തിപ്പെടുത്തുമെന്ന് മുഖ്യമന്ത്രി വ്യക്തമാക്കി.
ഡബ്ലിയു ഐ പി ആര് നിരക്ക് 8ന് മുകളിലുള്ള നഗര, ഗ്രാമ വാര്ഡുകളില് കര്ശന നിയന്ത്രണങ്ങള് ഏര്പ്പെടുത്തുമെന്ന് . നിലവില് ഏഴ് ശതമാനത്തിനു മുകളില് ഡബ്ലിയു ഐ പി ആര് ഉള്ള പ്രദേശങ്ങളില് ഏര്പ്പെടുത്തിയ നിയന്ത്രണമാണ് 8 ശതമാനത്തിനു മുകളില് ആക്കിയത്. കോവിഡ് പോസിറ്റീവായി ക്വാറന്റൈനില് കഴിയുന്നവര് വീടുകളില്തന്നെ തുടരുന്നുവെന്ന് ഉറപ്പാക്കാന് ശക്തമായ നടപടികളാണ് പോലീസ് സ്വീകരിച്ചുവരുന്നത്. തദ്ദേശ സ്ഥാപനങ്ങളും ഈ രംഗത്ത് ശക്തമായ പ്രവർത്തനങ്ങൾ നടത്തുന്നുണ്ട്. അതോടൊപ്പം പോലീസ് മോട്ടോര് സൈക്കിള് പട്രോള് സംഘത്തിന്റെ സഹായത്തോടെയാണ് ഇതിനുവേണ്ട പരിശോധനകള് നടത്തുന്നത്. കഴിഞ്ഞ 24 മണിക്കൂറിനുള്ളില് 23,419 വീടുകളില് ഇത്തരം പരിശോധനകള് നടത്തി.
കോവിഡ് പോസിറ്റീവായവരും അവരുമായി നേരിട്ടു സമ്പര്ക്കത്തില് വന്നവരുമായ 4,19,382 പേരെയാണ് കഴിഞ്ഞ ഏഴുദിവസത്തിനുള്ളില് പോലീസ് ഫോണ് മുഖേന ബന്ധപ്പെട്ട് അവര് ക്വാറന്റൈനില് കഴിയുന്നുവെന്ന് ഉറപ്പുവരുത്തിയത്. സെപ്റ്റംബര് 3 മുതല് 9 വരെയുള്ള കാലയളവില്, ശരാശരി സജീവ കേസുകള് 2,42,278 ആണ്. അതില് 13 ശതമാനം മാത്രം രോഗികളാണ് ആശുപത്രി, ഡി.സി.സി., സി.എഫ്.എല്.ടി.സി., സി.എസ്.എല്.ടി.സി. എന്നിവിടങ്ങളില് ചികിത്സയിലുള്ളത്. ആകെ രോഗികളില് 2 ശതമാനം പേര്ക്ക് മാത്രമേ ഈ കാലയളവില് ഓക്സിജന് കിടക്കകള് വേണ്ടിവന്നിട്ടുള്ളൂ. ആകെ രോഗികളില് ഒരു ശതമാനം മാത്രമേ ഐ.സി.യുവിലുള്ളൂ. ഈ കാലയളവില് 1,87,561 പുതിയ കേസുകളാണ് ഉണ്ടായത്. കഴിഞ്ഞ ആഴ്ചയെ അപേക്ഷിച്ച് 21,000 കേസുകളും കുറഞ്ഞിട്ടുണ്ട്. ടിപിആറിന്റെയും പുതുതായി ഉണ്ടായ കേസുകളുടെയും വളര്ച്ചാ നിരക്ക് യഥാക്രമം 8 ശതമാനവും 10 ശതമാനവും കുറഞ്ഞിട്ടുണ്ട്.
ഐ സി എം ആറിന്റെ ആദ്യ സെറൊ പ്രിവലന്സ് പഠനം കണ്ടെത്തിയത് പ്രകാരം ഒന്നാം തരംഗ കാലത്ത് രോഗബാധിതരായവരുടെ എണ്ണം കേരളത്തില് വളരെ കുറവായിരുന്നു എന്നാണ്. സംസ്ഥാനത്ത് ഏകദേശം 11 ശതമാനം പേര്ക്ക് മാത്രമായിരുന്നു രോഗബാധയുണ്ടായത്. അതിന്റെ ഇരട്ടിയായിരുന്നു ദേശീയ ശരാശരി. രോഗം വരാത്തവരുടെ എണ്ണം വളരെ കൂടുതലായതുകൊണ്ട് ഡെല്റ്റാ വകഭേദം ആഞ്ഞടിച്ച രണ്ടാം ഘട്ടത്തില് ഏറ്റവും പെട്ടെന്ന് രോഗം പടര്ന്നു പിടിച്ച് വലിയ നാശം വിതയ്ക്കാന് ഏറ്റവും സാധ്യതയുള്ള ഇടം നമ്മുടെ സംസ്ഥാനമായിരുന്നു. ഉയര്ന്ന ജനസാന്ദ്രതയും നഗരഗ്രാമ അന്തരമില്ലായ്മയും വയോജനങ്ങളുടെയും ജീവിത ശൈലീരോഗമുള്ളവരുടെയും ഉയര്ന്ന അനുപാതവുമെല്ലാം ഇവിടെ മരണ നിരക്ക് വലിയ തോതില് ഉയര്ത്തേണ്ടതായിരുന്നു. അത് സംഭവിക്കാതെ രണ്ടാം തരംഗത്തേയും മികച്ച രീതിയില് പ്രതിരോധിക്കാന് നമുക്ക് സാധിച്ചു.
രോഗബാധയേല്ക്കാത്തവരുടെ ശതമാനവും ജനസാന്ദ്രതയും കൂടുതലായതുകൊണ്ട് തന്നെ രണ്ടാം തരംഗത്തില് രോഗികളുടെ എണ്ണം വലിയ തോതില് കൂടി. പക്ഷേ, ആ വര്ദ്ധനവ് ഒരിക്കലും പൂര്ണ്ണമായും നമ്മുടെ നിയന്ത്രണങ്ങളെ മറി കടന്നു മുന്നോട്ടു പോയില്ല. രോഗബാധിതരാകുന്ന എല്ലാവര്ക്കും ആവശ്യമായ സംരക്ഷണവും ചികിത്സയും ഒരുക്കാന് കഴിയുമെന്ന് ഉറപ്പു വരുത്തി നമുക്ക് കൈകാര്യം ചെയ്യാന് സാധിക്കുന്ന വിധത്തില് രോഗവ്യാപനത്തെ നിയന്ത്രിച്ചു. രണ്ടാം തരംഗത്തില് പലയിടങ്ങളിലുമുണ്ടായ ദുരന്ത സമാനമായ സാഹചര്യം ഇവിടെ ഉണ്ടാകാതെ പോയത് അതുകൊണ്ടാണ് എന്നും മുഖ്യമന്ത്രി പറഞ്ഞു.
Recommended Video
അതേസമയം ഇന്ന് സംസ്ഥാനത്ത് 25,010 പേര്ക്ക് കോവിഡ്-19 സ്ഥിരീകരിച്ചു. 24 മണിക്കൂറിനിടെ 1,51,317 സാമ്പിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 16.53 ആണ്. 177 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 22,303 ആയി.ചികിത്സയിലായിരുന്ന 23,535 പേര് രോഗമുക്തി നേടി. 2,37,643 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 40,74,200 പേര് ഇതുവരെ കോവിഡില് നിന്നും മുക്തി നേടി.
Click it and Unblock the Notifications
Sign in with Google