മലപ്പുറത്തിന് ആശ്വാസം; ഇനി ഒരാള് മാത്രം; അഞ്ച് പേര് രോഗം ഭേദമായി വീട്ടിലേക്ക് മടങ്ങി
മലപ്പറും: മലപ്പുറത്തിന് ഏറെ ആശ്വാസമുള്ള വാര്ത്തയാണ് വന്നിരിക്കുന്നത്. ജില്ലയില് കൊറോണ വൈറസ് രോഗം ബാധിച്ച ചികില്സയിലുള്ള അഞ്ച് പേര്ക്ക് രോഗം ഭേദമായി. ഇവര് ഇന്ന് വീട്ടിലേക്ക് തിരിച്ചു. ഇനി ഒരാള്ക്ക് മാത്രമാണ് രോഗമുള്ളത്. ഈ വ്യക്തി മഞ്ചേരി മെഡിക്കല് കോളജില് ചികില്സയിലാണ്. ഇന്ന് രോഗമുക്തി നേടിയവര് മെഡിക്കല് കോളജിലെ ഐസൊലേഷന് കേന്ദ്രത്തില് ചികില്സിയലാണ്. അഞ്ച് പേര് ഒരുമിച്ച് പുതു ജീവിതത്തിലേയ്ക്ക് മടങ്ങിയത് ജില്ലാ ഭരണകൂടത്തിന്റെ നേതൃത്വത്തില് കോവിഡിനെതിരെ പോരാടുന്ന മുഴുവന് പേര്ക്കും അഭിമാന മുഹൂര്ത്തമാണ്. ഇനി ഒരാള് മാത്രമാണ് ജില്ലയില് കോവിഡ് ബാധിതനായി ചികിത്സയില് തുടരുന്നത്.
വേങ്ങര കൂരിയാട് സ്വദേശി, തിരൂര് തെക്കന് പുല്ലൂര് സ്വദേശി, നിലമ്പൂര് ചുങ്കത്തറ സ്വദേശി, വേങ്ങര കണ്ണമംഗലം സ്വദേശി, മമ്പുറം വെട്ടം ബസാര് സ്വദേശി എന്നിവരാണ് വിദഗ്ധ ചികിത്സയ്ക്കും നിരന്തര പരിശോധനകള്ക്കും ശേഷം രോഗം ഭേദമായി ഇന്ന് വീടുകളിലേയ്ക്ക് മടങ്ങിയത്. രാവിലെ പത്തരയോടെ ആശുപത്രിയിലെ സ്റ്റെപ്പ് ഡൗണ് ഐസിയുവില് നിന്ന് ഇവര് പുറത്തിറങ്ങി. വീടുകളിലും മുന്കരുതല് നടപടികള് തുടരണം. കുറച്ച് ദിവസം നിരീക്ഷണത്തിലായിരിക്കും.
ആരോഗ്യ വകുപ്പ് ഒരുക്കിയ പ്രത്യേക ആംബുലന്സുകളിലാണ് അഞ്ച് പേരും യാത്രയായത്. ജില്ലയില് കോവിഡ് ബാധ റിപ്പോര്ട്ട് ചെയ്ത 20 പേരില് 18 പേരും രോഗമുക്തരാവുമ്പോള് ആരോഗ്യ വകുപ്പിന്റേയും മറ്റ് വകുപ്പുകളുടേയും നേതൃത്വത്തില് നടക്കുന്ന കൂട്ടായ കോവിഡ് പ്രതിരോധ പ്രവര്ത്തനങ്ങളുടെ വിജയമാവുകയാണിത്.
ഒരാള് ഇപ്പോഴും കോവിഡ് ബാധിതനായി മഞ്ചേരി ഗവ. മെഡിക്കല് കോളജ് ആശുപത്രിയില് ഐസൊലേഷനില് ചികിത്സയില് തുടരുകയാണ്. നാല് മാസം പ്രായമുള്ള കുട്ടി മാത്രമാണ് രോഗബാധിതയായിരിക്കെ മരിച്ചത്. രോഗം ഭേദമായ ശേഷം തുടര് നിരീക്ഷണത്തില് കഴിയുന്നതിനിടെ പെരിന്തല്മണ്ണ കീഴാറ്റൂര് സ്വദേശിയും മരണത്തിന് കീഴടങ്ങിയിരുന്നു.
Click it and Unblock the Notifications
Sign in with Google