കോവിഡ് വ്യാപനം രൂക്ഷം: വീടുകളില് മരുന്ന് എത്തിക്കാന് ആരോഗ്യവകുപ്പിന്റെ പ്രത്യേക പദ്ധതി
തിരുവനന്തപുരം: കോവിഡ് വ്യാപനം രൂക്ഷമായ സാഹചര്യത്തില് വീടുകളില് സൗജന്യമായി മരുന്നുകള് എത്തിച്ചു നല്കുന്നതിനായി ആരോഗ്യ വകുപ്പ് ആവിഷ്കരിച്ച പദ്ധതി കൂടുതല് സജീവമാക്കുന്നതായി മന്ത്രി വീണാ ജോർജ്. കോവിഡ് വ്യാപനം രൂക്ഷമായ സാഹചര്യത്തില് ജീവിതശൈലി രോഗങ്ങളുള്ള മുതിര്ന്ന പൗരന്മാര്ക്കും ബിപിഎല് വിഭാഗത്തില്പ്പെട്ട ജനവിഭാഗങ്ങള്ക്കും അനുബന്ധ രോഗങ്ങളുള്ളവര്ക്കുമാണ് മുരുന്നുകള് വീടുകളില് എത്തിച്ച് നല്കുന്നത്.
സംസ്ഥാന ജീവിതശൈലി രോഗ നിയന്ത്രണ പദ്ധതിയുടെ ഭാഗമായി ആശ പ്രവര്ത്തകരുടേയും പാലിയേറ്റീവ് കെയര് പ്രവര്ത്തകരുടേയും സന്നദ്ധപ്രവര്ത്തകരുടേയും സഹായത്തോടു കൂടിയാണ് ഈ വിഭാഗങ്ങളിലുള്ളവരുടെ വീടുകളില് മരുന്നുകള് എത്തിച്ചു നല്കുന്നത്. സാധാരണ ജനങ്ങള്ക്ക് പ്രത്യേകിച്ച് അവശത അനുഭവിക്കുന്ന ജനവിഭാഗത്തിന് മരുന്നുകള് വീട്ടില് എത്തിച്ച് നല്കാനുള്ള പദ്ധതി ഊര്ജ്ജിതമായി ആരോഗ്യ വകുപ്പ് നടപ്പിലാക്കും. കോവിഡ് കാലത്ത് ആശുപത്രിയിലെത്തുമ്പോള് ഉണ്ടാകുന്ന സമ്പര്ക്കം ഒഴിവാക്കുക എന്ന ലക്ഷ്യത്തോടെയാണ് പദ്ധതിയാവിഷ്ക്കരിച്ചതെന്നും വീണ ജോർജ് കൂട്ടിച്ചേർക്കുന്നു.
ഈ വിഭാഗക്കാര് ഇടയ്ക്കിടയ്ക്ക് മരുന്നു വാങ്ങാന് യാത്ര ചെയ്ത് ആശുപത്രികളില് എത്തുമ്പോഴുണ്ടാകുന്ന രോഗവ്യാപനം ഒഴിവാക്കുക എന്നതാണ് ഈ പദ്ധതിയുടെ ഉദ്ദേശ ലക്ഷ്യം. തന്നെയുമല്ല വീടുകളില് ഇരുന്ന് അവര് കൃത്യമായി മരുന്നു കഴിക്കുന്നുണ്ട് എന്ന് ഉറപ്പാക്കാനും ഈ പദ്ധതിയിലൂടെ സാധ്യമാക്കുന്നു. കോവിഡ് അതിതീവ്ര വ്യാപന സമയത്ത് പരമാവധി ജനങ്ങള്ക്ക് മരുന്നുകള് എത്തിക്കാനുള്ള നടപടികള് സംസ്ഥാന ആരോഗ്യവകുപ്പ് സ്വീകരിച്ചു കഴിഞ്ഞു. എല്ലാവരും കൃത്യമായി മരുന്ന് കഴിച്ച് അനുബന്ധ രോഗങ്ങളുള്ളവര് രോഗം നിയന്ത്രിക്കേണ്ടതാണ്.
ചികിത്സ പോലെ തന്നെ പ്രാധാന്യമര്ഹിക്കുന്നതാണ് കോവിഡ് പ്രതിരോധവും. മുതിര്ന്ന പൗരന്മാര്ക്കും ജീവിതശൈലി രോഗമുള്ളവര്ക്കും കിടപ്പു രോഗികള്ക്കും കോവിഡ് വരാതെ നോക്കേണ്ടത് ഒരു ആവശ്യകതയാണ്. അതിനുള്ള അവബോധ പ്രവര്ത്തനങ്ങളും ശക്തമാക്കുന്നതാണ്. പ്രത്യേക പരിഗണന ആവശ്യമായി വരുന്ന വിഭാഗമാണ് കിടപ്പ് രോഗികള്. ഇവര്ക്ക് കോവിഡ് വന്നുകഴിഞ്ഞാല് അത് മൂര്ച്ഛിക്കാനുള്ള സാധ്യത കൂടുതലാണ്.
പാലിയേറ്റീവ് കെയര് രോഗികളുടെ പ്രത്യേക ശ്രദ്ധയ്ക്കായി എല്ലാ പാലിയേറ്റീവ് കെയര് നഴ്സുമാര്ക്കും വോളണ്ടിയര്മാര്ക്കും നിര്ദ്ദേശം നല്കിയിട്ടുണ്ട്. അവര്ക്ക് രോഗം വരാതെ സൂക്ഷിക്കുന്നതിന് എല്ലാ സൗകര്യങ്ങളും ചെയ്തു കൊടുക്കാനും മരുന്നുകള് എത്തിച്ചു കൊടുക്കാനും നിര്ദേശം നല്കിയിട്ടുണ്ട്. പാലിയേറ്റീവ് കെയര് രോഗികളെ എങ്ങനെ കോവിഡ് വരാതെ സംരക്ഷിക്കാമെന്ന് അവരുടെ കുടുംബാംഗങ്ങള്ക്കും കൂട്ടിരിപ്പുകാര്ക്കും അവബോധവും നല്കി വരുന്നതായും മന്ത്രി അറിയിച്ചു.
രോഗപ്രതിരോധ ശേഷി കുറഞ്ഞ കാന്സര് രോഗികള് കോവിഡ് കാലത്ത് ചികിത്സയ്ക്ക് വളരെ ദൂരം യാത്ര ചെയ്യാതിരിക്കാന് തൊട്ടടുത്ത് വിദഗ്ധ ചികിത്സ ഉറപ്പാക്കിയതായും മന്ത്രി അറിയിച്ചു. സംസ്ഥാന ആരോഗ്യ വകുപ്പ് ആവിഷ്കരിച്ച ജില്ലാ കാന്സര് കെയര് പദ്ധതിയുടെ ഭാഗമായി ആരോഗ്യ വകുപ്പിന് കീഴിലുള്ള 24 ആശുപത്രികളിലാണ് കീമോതെറാപ്പി ഉള്പ്പെടെയുള്ള അത്യാധുനിക കാന്സര് ചികിത്സ നല്കാനുള്ള സൗകര്യമൊരുക്കിയത്. കീമോതെറാപ്പി, റേഡിയോതെറാപ്പി, മറ്റ് ക്യാന്സര് അനുബന്ധ ചികിത്സകള് എന്നിവയ്ക്കായി തിരുവനന്തപുരം ആര്സിസിലോ, മലബാര് കാന്സര് സെന്ററിലോ, മെഡിക്കല് കോളേജുകളിലോ പോകാതെ തുടര് ചികിത്സ സാധ്യമാക്കുന്ന തരത്തിലാണ് പ്രവര്ത്തനം ഏകോപിപ്പിച്ചിരിക്കുന്നത്.
തിരുവനന്തപുരം ആര്സിസി, മലബാര് കാന്സര് സെന്റര് എന്നിവയുമായി ചേര്ന്നുകൊണ്ട് കാന്സര് ചികിത്സ പൂര്ണമായും ഈ കേന്ദ്രങ്ങളിലൂടെ സാധ്യമാണ്. ഇവര്ക്ക് ആര്സിസിയിലും മെഡിക്കല് കോളേജുകളിലും ലഭിച്ചു കൊണ്ടിരിക്കുന്ന അതേ ചികിത്സ നല്കുന്നതിനുള്ള സംവിധാനം ഒരുക്കിയിട്ടുണ്ട്. ഈ സംവിധാനം ഒന്നുകൂടി ശക്തിപ്പെടുത്തുന്നതിനുള്ള നടപടികള് സ്വീകരിച്ചിട്ടുണ്ട്. ഇതിലൂടെ എല്ലാ ജില്ലകളിലുമുള്ള കാന്സര് രോഗികള്ക്ക് അവര്ക്ക് റീജിയണല് കാന്സര് സെന്ററുകളില് ലഭിച്ചിരുന്ന അതേ ചികിത്സ അവരുടെ വീടിനോട് വളരെ അടുത്തുള്ള ആരോഗ്യ കേന്ദ്രത്തില് ലഭിക്കുന്നു എന്നുള്ളതാണ് ഇതിന്റെ സവിശേഷത. കാന്സര് രോഗത്തിന്റെ മൂര്ധന്യാവസ്ഥ തടയുന്നതിനും ചികിത്സ പൂര്ണമായും ഉറപ്പാക്കാനും സാധിക്കുന്നു. മാത്രമല്ല യാത്ര ഒഴിവാക്കുന്നതിലൂടെ കോവിഡ് രോഗവ്യാപനം ഒഴിവാക്കാന് സാധിക്കുമെന്നും മന്ത്രി കൂട്ടിച്ചേർത്തു.
Click it and Unblock the Notifications
Sign in with Google