സംസ്ഥാനത്ത് കനത്ത മഴ; കക്കി ഡാമില് റെഡ് അലര്ട്ട്, പുനലൂരില് മലവെള്ളപാച്ചില്
തിരുവനന്തപുരം: സംസ്ഥാനത്ത് തെക്കന് ജില്ലകളില് കനത്ത മഴ തുടരുന്നു. ഇന്ന് ഉച്ചമുതല് കനത്തമഴയാണ് തെക്കന് ജില്ലകളില് പെയ്ത്കൊണ്ടിരിക്കുന്നത്. കോട്ടയത്ത് മൂന്നിടങ്ങളില് ഉരുള്പൊട്ടുകയും താഴ്ന്ന പ്രദേശങ്ങളില് വെള്ളം കയറുകയും ചെയ്തിരുന്നു. ആശപായങ്ങളൊന്നും റിപ്പോര്ട്ട് ചെയ്തിട്ടില്ല. കനത്ത മഴയെ തുടര്ന്ന് പത്തനംതിട്ടയിലെ കക്കി-ആനത്തോട് അണക്കെട്ടില് ജലനിരപ്പ് ഉയര്ന്ന ലെവലിലെത്തി. ഇവിടെ റെഡ് അലര്ട്ട് പ്രഖ്യാപിച്ചിരിക്കുകയാണ്. ആവശ്യമെങ്കില് നിയന്ത്രിത അളവില് ജലം തുറന്നു വിടുമെന്നും അധികൃതര് അറിയിച്ചിട്ടു. പമ്പാ നദിയുടെയും കക്കാട്ടാറിന്റെയും തീരത്തുള്ളവര് ജാഗ്രത പാലിക്കണമെന്ന് അധികൃതര് അറിയിച്ചു. അണക്കെട്ടില് നീരൊഴുക്ക് കൂടികൊണ്ടിരിക്കുകയാണ്.
കൊല്ലം പുനലൂരിനടുത്ത് ഇടപ്പാളയത്ത് മലവെള്ള പാച്ചിലില് നാശനഷ്ടമുണ്ടായതായും റിപ്പോര്ട്ടുണ്ട്. നാലു വീടുകളില് വെള്ളം കയറുകയും ഒരു ജീപ്പും ഓട്ടോറിക്ഷയും കാറും ഒഴുക്കില് പെട്ടുവെന്നാണ് ലഭിക്കുന്നവിവരം. ആളപായമുണ്ടായിട്ടില്ല. ആളുകളെ മാറ്റി പാര്പ്പിച്ചെന്ന് റവന്യു വകുപ്പ് അറിയിച്ചു. സന്ധ്യയോടെയായിരുന്നു ഇവിടെ മലവെള്ള പാച്ചില് ഉണ്ടായത്.
എരുമേലി പഞ്ചായത്തിലെ പന്ത്രണ്ടാം വാര്ഡായ ഏയ്ഞ്ചല്വാലി ജംഗ്ഷന്, പള്ളിപടി , വളയത്ത് പടി എന്നിവിടങ്ങളില് നേരത്തെ ഉരുള് പൊട്ടിയിരുന്നു. സമീപത്തെ സ്ഥാപനങ്ങളിലും വീടുകളിലും വെള്ളം കയറി. പ്രദേശത്തെ വീടുകളിലെ പാത്രങ്ങള് ഒഴുകി പോകുകയും ചെയ്തിരുന്നു. പലയിടങ്ങളിലും സംരക്ഷണ ഭിത്തി ഇടിഞ്ഞ് കല്ലും മണ്ണും വീണ് ഗതാഗതവും സ്തംഭിച്ചിരുന്നു. അതേസമയം
മുല്ലപ്പെരിയാര് അണക്കെട്ട് നാളെ രാവിലെ തന്നെ തുറക്കുമെന്ന് ജലവിഭവ വകുപ്പ് മന്ത്രി റോഷി അഗസ്റ്റിന് അറിയിച്ചിട്ടുണ്ട്. തമിഴ്നാട് രണ്ട് തവണ മുന്നറിയിപ്പ് നല്കിയിട്ടുണ്ടെന്നും അണക്കെട്ടിലെ ജലനിരപ്പ് 138 അടിയായി നിലനിര്ത്തുന്നതിനുള്ള വെള്ളം മാത്രമേ പുറത്തേക്ക് ഒഴുക്കിവിടുകയുള്ളുവെന്നും അദ്ദേഹം പറഞ്ഞു. 3000 ഘനയടി വെള്ളം ഒഴുക്കുമെന്നാണ് കരുതുന്നത്. അണക്കെട്ടിലെ ജലനിരപ്പ് 138 അടിയാക്കി ക്രമീകരിക്കാനുള്ള വെള്ളമേ തുറന്നു വിടുകയുള്ളൂ.
കേരള -ലക്ഷദ്വീപ് തീരങ്ങളില് മണിക്കൂറില് 40 മുതല് 50 കിമീ വേഗതയിലും ചില അവസരങ്ങളില് 60 കിമീ വേഗതയിലും വീശിയടിച്ചേക്കാവുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല് മത്സ്യത്തൊഴിലാളികള് അടുത്ത രണ്ട് ദിവസം കടലില് പോകാന് പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. കടല്ക്ഷോഭം രൂക്ഷമാകാന് സാധ്യതയുള്ളതിനാല് അപകട മേഖലകളില് നിന്ന് അധികൃതരുടെ നിര്ദേശാനുസരണം മാറി താമസിക്കണമെന്നും,
മല്സ്യബന്ധന യാനങ്ങള് ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കണമെന്നും വള്ളങ്ങള് തമ്മില് സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാമെന്നും അധികൃതര് മുന്നറിയിപ്പ് നല്കി. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണമെന്നും ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും പൂര്ണ്ണമായും ഒഴിവാക്കണമെന്നും അധികൃതര് പറഞ്ഞു.
Click it and Unblock the Notifications
Sign in with Google