ഐജി സ്ഥിരം കോപ്പിയടിക്കാരനോ?
തൃശൂര്: പരീക്ഷയ്ക്കിടെ കോപ്പിയടിച്ച് പിടിയ്ക്കപ്പെട്ട ഐജി ടിജെ ജോസിനെതിരെ വീണ്ടും ആരോപണം. ടിജെ ജോസ് ആദ്യമായിട്ടല്ല കോപ്പിയടിയ്ക്ക് പിടിയിലാകുന്നതെന്നാണ് പുതിയ ആക്ഷേപം.
അഡ്വ സന്തോഷ് പീറ്റര് എന്ന ആളാണ് ഇപ്പോള് ഐജിക്കെതിരെ പുത്തന് ആരോപണം ഉന്നയിച്ചിരിയ്ക്കുന്നത്. കഴിഞ്ഞ ഏപ്രില് മാസത്തില് നടന്ന പരീക്ഷയിലും ഐജി കോപ്പിയടിച്ചിരുന്നത്രെ.
ആ പരീക്ഷയ്ക്ക് ടിജെ ജോസിനൊപ്പം ഇരുന്ന് പരീക്ഷ എഴുതിയ ആളാണ് സന്തോഷ പീറ്റര്. അന്ന് ഐജിയെ കൈയ്യോടെ പിടികൂടിയെങ്കിലും നടപടിയെടുക്കാതെ ഒഴിവാക്കുകയായിരുന്നു എന്നാണ് ഇദ്ദേഹം പറയുന്നത്.
എല്എല്എം പരീക്ഷയ്ക്കാണ് ഐജിയ ടിജെ ജോസിസിനെ കോപ്പിയടിച്ചതിന് പിടികൂടിയത്. കോണ്സ്റ്റിറ്റിയൂഷന് ആയിരുന്നു പരീക്ഷ. കഴിഞ്ഞ ഏപ്രില് മാസത്തിലും ഇതേ പരീക്ഷയ്ക്ക് തന്നെയാണ് ഐജി കോപ്പിയടിച്ചതെന്നും സന്തോഷ് പീറ്റര് ആരോപിയ്ക്കുന്നു.
എന്തായാലും ടിജെ ജോസിനെതിരെ ഇപ്പോള് സര്വ്വകലാശാലയും എഡിജിപിയും അന്വേഷണം നടത്തിക്കൊണ്ടിരിയ്ക്കുകയാണ്. സന്തോഷ് പീറ്ററിന്റെ വെളിപ്പെടുത്തല് കൂടിയാകുമ്പോള് ഐജിയുടെ നില പരുങ്ങലിലാകുമെന്നാണ് റിപ്പോര്ട്ടുകള്