'സ്ഥാനമില്ലാത്ത ജോര്‍ജ്ജ് നൂറിരട്ടി ശക്തന്‍... മാണി തോല്‍ക്കും'

By Soorya Chandran

Published: Sunday, March 29, 2015, 11:28 [IST]

കോട്ടയം: ചീഫ് വിപ്പ് സ്ഥാനം നഷ്ടമാകും എന്ന് ഉറപ്പായതോടെ കെഎം മാണിക്കെതിരെ ആഞ്ഞടിച്ച് പിസി ജോര്‍ജ്ജ് വീണ്ടും രംഗത്ത്. അടുത്ത തിരഞ്ഞെടുപ്പില്‍ മാണി പാലായില്‍ തോല്‍ക്കുമെന്നാണ് ജോര്‍ജ്ജിന്റെ പ്രവചനം.

ഏഷ്യാനെറ്റ് ന്യൂസിന് നല്‍കിയ പ്രത്യേക അഭിമുഖത്തിലാണ് പിസി ജോര്‍ജ്ജ് മനസ്സ് തുറന്നത്. പാര്‍ട്ടിയില്‍ ജോസഫ് ഗ്രൂപ്പിനെ തനിക്കെതിരെ രംഗത്ത് കൊണ്ടുവന്നത് പലതും നല്‍കിയിട്ടാകുമെന്നും അദ്ദേഹം ആക്ഷേപിച്ചു.

സ്ഥാനമില്ലാത്ത പിസി ജോര്‍ജ്ജ് സ്ഥാനമുള്ള ജോര്‍ജ്ജിനേക്കാള്‍ നൂറിരട്ടി ശക്തനായിരിക്കും. ഓടിയൊളിക്കുന്നവനല്ല താന്‍ എന്നും അദ്ദേഹം പറഞ്ഞു.

ജോസഫ് ഗ്രൂപ്പുകാര്‍ ഇത്രനാളും മിണ്ടാതിരുന്നതില്‍ ദുരൂഹതയുണ്ടെന്നാണ് ജോര്‍ജ്ജിന്റെ കണ്ടെത്തല്‍. എന്നാല്‍ ഒരുകാലത്ത് ജോര്‍ജ്ജിനെതിരെ നടപടിയെടുക്കണം എന്നാവശ്യപ്പെട്ട് നിരന്തരം ആവശ്യം ഉയര്‍ത്തിയിരുന്നത് ജോസഫ് വിഭാഗം തന്നെ ആയിരുന്നു. അന്നെല്ലാം ജോര്‍ജ്ജിനെ സംരക്ഷിച്ച് പോന്നത് മാണിയും.

മുന്നണിയും പാര്‍ട്ടിയും വിടാതെ ഇടഞ്ഞ് തന്നെ നില്‍ക്കാനാണ് നിലവില്‍ ജോര്‍ജ്ജിന്റെ തീരുമാനം. എന്നാല്‍ കേരള കോണ്‍ഗ്രസ് സെക്യുലറിന്റെ ഈ സമയത്ത് പുനരുദ്ധരിക്കുകയും ചെയ്യും. മാണിക്കെതിരെ ഇത്രയും ആരോപണം ഉന്നയിച്ച ജോര്‍ജ്ജ് എങ്ങനെ കേരള കോണ്‍ഗ്രസില്‍ തുടര്‍ന്നും നിലനിന്ന് പോകും എന്നതായിരിക്കും കേരള രാഷ്ട്രീയം ചോദിക്കുന്ന ചോദ്യം.

Published On March 29, 2015