ദേശീയപാത 45 മീറ്റര് തന്നെ; പുനരധിവാസ പാക്കേജ് നടപ്പാക്കുമെന്ന് മുഖ്യമന്ത്രി
തിരുവനന്തപുരം: സംസ്ഥാനത്തെ ദേശീയപാത വികസനത്തില് വിട്ടുവീഴ്ചയില്ലെന്ന് വ്യക്തമാക്കി മുഖ്യമന്ത്രി പിണറായി വിജയന്. ദേശീയപാതാ വികസനംം 45 മീറ്റര് വീതിയില് തന്നെ നടപ്പാക്കുമെന്ന് മുഖ്യമന്ത്രി ഫേസ്ബുക്ക് പോസ്റ്റില് പറഞ്ഞു. റോഡ് വീതി കൂട്ടുമ്പോള് ചിലര്ക്ക് വീടും ജീവിത മാര്ഗവും നഷ്ടപ്പെടുന്ന സാഹചര്യമുണ്ടാവുമെങ്കിലും അവര്ക്ക് ആകര്ഷകമായ പുനരധിവാസ പാക്കേജ് നടപ്പാക്കുമെന്നും അദ്ദേഹം വ്യക്തമാക്കി.
സര്ക്കാര് അധികാരത്തില് വന്ന ശേഷം കൈക്കൊണ്ട അടിയന്തിര നടപടികളിലൂടെ ദേശീയപാതാ വികസനത്തിനായുള്ള സ്ഥലമേറ്റെടുപ്പ്, അലൈന്മെന്റ് തീരുമാനിക്കല് തുടങ്ങിയ കാര്യങ്ങളില് നല്ല പുരോഗതിയുണ്ടായിട്ടുണ്ടെന്ന് അദ്ദേഹം പറഞ്ഞു. കാസര്കോട് മുതല് കഴക്കൂട്ടം വരെയുള്ള ദേശീയ പാതാ വികസനം സര്ക്കാറിന്റെ മുഖ്യ അജണ്ടകളില് ഒന്നാണ്. ഇക്കാര്യത്തില് നാഷണല് ഹൈവെ അതോറിറ്റി പ്രതിനിധികളുമായി സര്ക്കാര് ചര്ച്ച നടത്തിയിരുന്നു. ഭൂമി ഏറ്റെടുത്തു നല്കിയാല് ബാക്കി നടപടികള്ക്ക് തടസ്സമുണ്ടാവില്ലെന്ന് അവര് അറിയിച്ചിട്ടുണ്ട്. ഫണ്ട് അവര്ക്കൊരു പ്രശ്നമല്ല.
ദേശീയപാത 45 മീറ്ററില് വികസിപ്പിക്കുകയെന്നത് സര്വകക്ഷി തീരുമാനമാണ്. നാടിന്റെ പുരോഗതിക്കും പൊതു നന്മയ്ക്കുമായാണ് ഈ തീരുമാനം. ഇക്കാര്യത്തില് സര്ക്കാര് പിറകോട്ടില്ല. റോഡ് വീതി കൂട്ടുമ്പോള് ചിലര്ക്ക് വീടും ജീവസന്ധാരണ മാര്ഗവും നഷ്ടപ്പെടുന്ന സാഹചര്യമുണ്ടാവും. അവര്ക്ക് ആകര്ഷകമായ പുനരധിവാസ പാക്കേജ് നല്കാന് സര്ക്കാര് ഒരുക്കമാണ്. ഇത് അംഗീകരിക്കാതെ ഭൂമി നഷ്ടപ്പെടുന്നതിലെ വിഷമം കാരണം അത് ഏറ്റെടുക്കാന് പാടില്ലെന്ന നിലപാടെടുക്കുന്നത് ശരിയല്ല.
ഭൂമി നഷ്ടപ്പെടുന്നവരേക്കാള് അവര്ക്കു വേണ്ടി പ്രവര്ത്തിക്കുന്ന ചിലര്ക്കാണ് ഇക്കാര്യത്തില് നിര്ബന്ധബുദ്ധിയുള്ളത്. എന്നാല് റോഡ് വികസനം നാടിന്റെ ആവശ്യമെന്ന നിലയില്, അതിന് തടസ്സം നില്ക്കുന്നതിനെ അംഗീകരിക്കാനാവില്ല. ഇക്കാര്യത്തില് എല്ലാവരുടെയും സഹായസഹകരണവും പിന്തുണയും ആവശ്യമാണെന്നും മുഖ്യമന്ത്രി ഫേസ്ബുക്കിലൂടെ അറിയിച്ചു.
Click it and Unblock the Notifications
Sign in with Google