സംയുക്ത പരിശോധനയ്ക്ക് പോലീസും എംവിഡിയും; കൂടുതല്‍ എഐ ക്യാമറകള്‍, നിയമലംഘനങ്ങള്‍ക്ക് കര്‍ശന നടപടി

തിരുവനന്തപുരം: ​ഗതാ​ഗത നിയമ ലംഘനങ്ങൾക്കെതിരെ കർ‌ശന നടപടിയുമായി പോലീസും മോട്ടോർ വാഹനവകുപ്പും. അമിത വേ​ഗം, മദ്യപിച്ചുള്ള ഡ്രൈവിം​ഗ്, ഹെൽമെറ്റ് - സീറ്റ് ബെൽറ്റ് എന്നിവ ധരിക്കാതെയുള്ള യാത്ര എന്നിവയ്ക്കെതിരെ കർശന നടപടി സ്വീകരിക്കും. സംസ്ഥാനത്ത് അപകടങ്ങൾ വർദ്ധിച്ച സാഹചര്യത്തിലാണ് റോഡുകളിൽ പോലീസും മോട്ടോർ‌ വാഹനവകുപ്പും ചേർന്ന് സംയുക്ത പരിശോധന നടത്താൻ തീരുമാനിച്ചത്.

റോഡിൽ 24 മണിക്കൂറും പോലീസിനെയും മോട്ടോർ വാഹനവകുപ്പിനെയും ഉദ്യോ​ഗസ്ഥരെയും വിന്യസിച്ച് നിയമലംഘനങ്ങൾക്കെതിരെ കർശന നടപടി സ്വീകരിക്കും. എ ഡി ജി പി മനോജ് എബ്രാഹം വിളിച്ചുചേർത്ത ഉന്നതതല പോലീസ് യോ​ഗത്തിലാണ് നടപടികൾ കടുപ്പിക്കാൻ തീരുമാനിച്ചത്. യോ​ഗ തീരുമാനങ്ങൾ നാളെ ​ഗാതാ​ഗത മന്ത്രിി കെ ബി ​ഗണേഷ് കുമാറിന്റെ നേതൃത്വത്തിൽ നടക്കുന്ന ഉന്നതതല യോ​ഗത്തെ അറിയിക്കും.

കാൽനട യാത്രക്കാരുടെ സുരക്ഷയ്ക്ക് മുഖ്യപരി​ഗണന നൽകുമെന്നും പോലീസും മോട്ടോർ വാഹന വകുപ്പും അറിയിച്ചു. ബോധവത്ക്കരണ പരിപാടിയും നടത്തും. അതേ സമയം എ ഐ ക്യാമറകൾ സ്ഥാപിക്കാത്ത റോഡുകളിൽ ക്യാമറ സ്ഥാപിക്കാനുള്ള റിപ്പോർട്ട് സമർപ്പിക്കാൻ ഐ ജി ട്രാഫിക്കിന് നിർദ്ദേശം നൽകി.

അതേ സമയം ​ഗതാ​ഗത നിയമലംഘനങ്ങൾ വർദ്ധിച്ച് വരികയാണെന്നും ഫൈനുകൾ വർദ്ധിപ്പിക്കേണ്ടിവരുമെന്നും ​ഗതാ​ഗതമന്ത്രി പറഞ്ഞിരുന്നു. റോഡപകടങ്ങളും മരണങ്ങളും കുറയേണ്ടത് നമ്മൾ ഓരോരുത്തരുടെയും ആവശ്യമാണെന്നും ഇതിനാെരു പരിഹാരം കാണണമെന്ന് എല്ലാവരും തീരുമാനമെടുക്കണമെന്നും അദ്ദേഹം പറഞ്ഞു.

എല്ലാ ജം​ഗ്ഷനിലും ഹംപ് വെയ്ക്കുന്നത് അപകടങ്ങൾ വിളിച്ച് വരുത്തും. ഡ്രൈവിം​ഗില്ഡ സ്വയം അച്ചടക്കം പുലർത്തുകയല്ലാതെ ഇതിന് അടിസ്ഥാനുരമായി ഒരു മോചനമില്ലെന്നും അദ്ദേഹം പറഞ്ഞു. ​ഗതാ​ഗത നിയമത്തിന് പിഴയീടാക്കാറുണ്ട്. പക്ഷേ ചില ആളുകൾ ഇത് വല്ലാതെ ദുരുപയോ​ഗം ചെയ്യുന്നുണ്ട്. അമിതവേ​ഗത്തിൽ വാഹനമോടിച്ച് വരികയും ക്യാമറ കണ്ടാൽ ഉടൻ ചവിട്ടി, ഇതിന്റെ പരിശോധനയ്ക്ക് അപ്പുറം കടന്നാൽ വീണ്ടും വേ​ഗത കൂട്ടുകയും ചെയ്യും. മൂവിം​ഗ് ക്യാമറ ഉപയോ​ഗിച്ച് വാഹനം പരിശോധിക്കുന്ന സംവിധാനം ആലോചിക്കുന്നുണ്ടെന്നും മന്ത്രി പറഞ്ഞു.

ഡ്രൈവിം​ഗുമായി ബന്ധപ്പെട്ട് അവബോധമുണ്ടാക്കാനുള്ള കാര്യങ്ങൾ പഠിപ്പിക്കാൻ ഡ്രൈവിം​ഗ് സ്കൂളുകളോട് നിർദ്ദേശിക്കും. കെ എസ് ആർ ടി സി തുടങ്ങിയ ഡ്രൈവിം​ഗ് സ്കൂളിൽ ഇതെല്ലാം പഠിപ്പിക്കുന്നുണ്ട് എന്നും ​ഗതാ​ഗതമന്ത്രി പറഞ്ഞു.