കടകള് നിര്ബന്ധമായി അടപ്പിച്ചാല് അറസ്റ്റ്, പോപ്പുലര് ഫ്രണ്ട് ഹര്ത്താലിനെ തടയിടാന് പൊലീസ്
തിരുവനന്തപുരം: ഹര്ത്താല് ദിനമായ വെള്ളിയാഴ്ച ക്രമസമാധാന പാലനത്തിന് ആവശ്യമായ നടപടികള് സ്വീകരിക്കാന് സംസ്ഥാന പോലീസ് മേധാവി അനില് കാന്ത് എല്ലാ ജില്ലാ പോലീസ് മേധാവിമാര്ക്കും നിര്ദ്ദേശം നല്കി.
അക്രമത്തില് ഏര്പ്പെടുന്നവര്, നിയമലംഘകര്, കടകള് നിര്ബന്ധമായി അടപ്പിക്കുന്നവര് എന്നിവര്ക്കെതിരെ കേസെടുത്ത് ഉടനടി അറസ്റ്റ് ചെയ്യും. സമരക്കാര് പൊതുസ്ഥലങ്ങളില് കൂട്ടംകൂടാതിരിക്കാന് പോലീസ് ശ്രദ്ധ ചെലുത്തും. ആവശ്യമെങ്കില് കരുതല് തടങ്കലിനും നിര്ദ്ദേശിച്ചിട്ടുണ്ട്.
സംസ്ഥാനത്തെ മുഴുവന് പോലീസ് സേനാംഗങ്ങളെയും ക്രമസമാധാനപാലത്തിനായി നിയോഗിക്കും. ജില്ലാ പോലീസ് മേധാവിമാരുടെ നിയന്ത്രണത്തിലുളള സുരക്ഷാക്രമീകരണങ്ങളുടെ മേല്നോട്ട ചുമതല റേഞ്ച് ഡി.ഐ.ജിമാര്, സോണല് ഐ.ജിമാര്, ക്രമസമാധാന വിഭാഗം എ.ഡി.ജി.പി എന്നിവര്ക്കാണ്.
അതേസമയം, ഹര്ത്താലുമായി ബന്ധപ്പെട്ട് വാട്സാപ്പിലൂടെയും മറ്റ് സാമൂഹ്യ മാധ്യമങ്ങള് വഴിയും തെറ്റായ വിവരങ്ങളും അഭ്യൂഹങ്ങളും കിംവദന്തികളും പ്രചരിപ്പിക്കുന്നവര്ക്കെതിരെ നിയമനടപടി സ്വീകരിക്കുമെന്ന് ക്രമസമാധാനവിഭാഗം എഡിജിപി വിജയ് സാഖറെ അറിയിച്ചു. ഇത്തരം പ്രചാരണം നടത്തുന്നവരെ കണ്ടെത്താനായി സാമൂഹ്യമാധ്യമങ്ങളില് സൈബര് പട്രോളിങ് ആരംഭിക്കാന് നിര്ദ്ദേശം നല്കിയിട്ടുണ്ട്.
ഹര്ത്താല് ദിവസം ജനങ്ങളുടെ സഞ്ചാരം തടയുന്നവര്ക്കെതിരെ കര്ശനമായ നിയമ നടപടി സ്വീകരിക്കും. സര്ക്കാര് ഓഫീസുകള്ക്കും സ്ഥാപനങ്ങള്ക്കും കെഎസ്ആര്ടിസി ഉള്പ്പെടെയുള്ള പൊതു ഗതാഗത സംവിധാനങ്ങള്ക്കും ആവശ്യമായ സുരക്ഷ ഒരുക്കാന് ജില്ലാ പോലീസ് മേധാവിമാര്ക്ക് നിര്ദ്ദേശം നല്കി.
കേരളത്തില് എന് ഐ എ പോപ്പുലര് ഫ്രണ്ട് ഓഫീസുകളില് റെയ്ഡ് നടത്തി നേതാക്കലെ അറസ്റ്റ് ചെയ്തതിന് പിന്നാലെയാണ് സംസ്ഥാനത്ത് ഹര്ത്താല് പ്രഖ്യാപിച്ചത്. കേരളത്തില് ദേശീയ ജനറല് സെക്രട്ടറി നസറുദിന് എളമരംഅടക്കം 18 നേതാക്കള് അറസ്റ്റ് ചെയ്തിരുന്നു. അറസ്റ്റ് ചെയ്ത വരെ വിട്ടയച്ചില്ലെങ്കിലും ഹര്ത്താല് അടക്കം സമര പരിപാടികള് നടത്തുമെന്ന് പോപ്പുലര് ഫ്രണ്ട് നേതാക്കള് അറിയിച്ചിരുന്നു.
അതേസമയം, പോപ്പുലര് ഫ്രണ്ട് സംസ്ഥാനത്ത് നടത്തുന്ന അനാവശ്യ ഹര്ത്താലിനെതിരെ സര്ക്കാര് കര്ശന നടപടി സ്വീകരിക്കണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന് പ്രസ്താവനയില് ആവശ്യപ്പെട്ടു. ജനങ്ങളുടെ ജീവനും സ്വത്തിനും സുരക്ഷ ഒരുക്കാന് സര്ക്കാര് തയ്യാറാകണം. തീവ്രവാദ കേസുകളെ കയ്യൂക്ക് കൊണ്ട് നേരിടാനാണ് പോപ്പുലര് ഫ്രണ്ട് ശ്രമിക്കുന്നത്. ഇന്ത്യ മതരാഷ്ട്രമല്ല ജനാധിപത്യ രാഷ്ട്രമാണെന്ന് പോപ്പുലര് ഫ്രണ്ട് നേതാക്കള് ഓര്ക്കണം. പോപ്പുലര് ഫ്രണ്ട് മുന്കാലങ്ങളില് നടത്തിയ ഹര്ത്താലുകളെല്ലാം കലാപത്തിലാണ് കലാശിച്ചത്. വാട്സാപ്പ് ഹര്ത്താല് നടത്തി ഒരു വിഭാഗത്തിന്റെ സ്ഥാപനങ്ങള്ക്കും ആരാധനാലയങ്ങള്ക്കുമെതിരെ ആക്രമണം നടത്തിയവര് വീണ്ടും നടത്തുന്ന ഹര്ത്താലിനെതിരെ കരുതല് നടപടി അനിവാര്യമാണ്. സമൂഹത്തില് വിഭജനമുണ്ടാക്കാനുള്ള മതതീവ്രവാദികളുടെ നീക്കത്തിനെ തടയിടാന് ആഭ്യന്തരവകുപ്പ് തയ്യാറാകണം. രാജ്യത്ത് കേരളത്തില് മാത്രമാണ് മതഭീകരവാദികള്ക്ക് അഴിഞ്ഞാടാനുള്ള അവസരം ലഭിക്കുന്നതെന്നും ബിജെപി സംസ്ഥാന അദ്ധ്യക്ഷന് പറഞ്ഞു.
Click it and Unblock the Notifications
Sign in with Google