കൊറോണ ബാധിതര്ക്ക് സിപിഎം ജില്ലാ സെക്രട്ടറിയുടെ മൊബൈല് സന്ദേശം; അനാവശ്യമാണെന്ന് മുഖ്യമന്ത്രി
തിരുവനന്തപുരം: കൊറോണ വൈറസ് രോഗം ബാധിച്ച് ചികിത്സയില് കഴിയുന്നവര്ക്ക് കണ്ണൂര് ജില്ലാ സെക്രട്ടറിയുടെ ഫോണില് നിന്നും ആശംസാ സന്ദേശം അയച്ച സംഭവത്തില് പ്രതികരിച്ച് മുഖ്യമന്ത്രി പിണറായി വിജയന് രംഗത്ത്. കണ്ണൂര് ജില്ലാ സെ്ക്രട്ടറിയുടെ ഇടപെടല് അനാവശ്യമാണെന്ന് മുഖ്യമന്ത്രി പറഞ്ഞു. ഇത്തരത്തിലുള്ള സന്ദേശം ഒരു പൊതുപ്രവര്ത്തകനും സ്വീകരിക്കേണ്ടെന്ന് മുഖ്യമന്ത്രി വ്യക്തമാക്കി. കൊറോണ അവലോകനവുമായി ബന്ധപ്പെട്ട് തിരുവനന്തപുരത്ത് ചേര്ന്ന വാര്ത്താ സമ്മേളനത്തിലാണ് അദ്ദേഹം ഇക്കാര്യം സൂചിപ്പിച്ചത്.
ദില്ലി തബ്ലീഗ് പ്രശ്നവുമായി ബദ്ധപ്പെട്ട് അസഹിഷ്ണുതയോടെയുളള പ്രചാരണം നടക്കുന്നുണ്ടെന്നും രോഗകാലത്ത് വര്ഗീയ വിളവെടുപ്പ് വേണ്ടെന്നും മുഖ്യമന്ത്രി പറഞ്ഞു. കൊറോണ മതം നോക്കി ബാധിക്കുന്ന ഒന്നല്ലെന്നും മുഖ്യമന്ത്രി പറഞ്ഞു. ക്രിമിനല് പശ്ചാത്തലം ഉളളവര് സന്നദ്ധ പ്രവര്ത്തനത്തില് നിന്ന് മാറി നില്ക്കണം. ജോര്ദാനില് കുടുങ്ങിയ സിനിമാ പ്രവര്ത്തകരെ തിരിച്ച് എത്തിക്കാന് വിദേശകാര്യ മന്ത്രിക്ക് സര്ക്കാര് കത്തയച്ചിട്ടുണ്ട്. ലോക്ക് ഡൗണ് പ്രഖ്യാപിച്ചത് രോഗ വ്യാപനം തടയുന്നതിന് ഗുണം ചെയ്തുവെന്നും മുഖ്യമന്ത്രി പറഞ്ഞു.
കാസര്കോട് മെഡിക്കല് കോളേജ് നാല് ദിവസത്തിനകം കൊവിഡ് ആശുപത്രിയായി മാറ്റിയെടുക്കും. മില്മ പാല് കണ്സ്യൂമര്ഫെഡ് വഴി വിതരണം ചെയ്യും. കേരളത്തില് നിന്ന് കൂടുതല് പാല് വാങ്ങാമെന്ന് തമിഴ്നാട് സമ്മതിച്ചതായും മുഖ്യമന്ത്രി അറിയിച്ചു. സംസ്ഥാനത്ത് ഇന്ന് 14 ലക്ഷം പേര്ക്ക് സൗജന്യ റേഷന് വിതരണം ചെയ്തു. എന്ഡോസള്ഫാന് രോഗികള്ക്ക് റേഷന് വീടുകളില് എത്തിച്ച് നല്കുമെന്നും മുഖ്യമന്ത്രി അറിയിച്ചു.
അതേസമയം, ഇന്ന് കേരളത്തില് 24 പേര്ക്ക് കോവിഡ് 19 സ്ഥിരീകരിച്ചതായി മുഖ്യമന്ത്രി പിണറായി വിജയന്. കാസര്ഗോഡ് ജില്ലയില് നിന്നും 12 പേര്ക്കും എറണാകുളം ജില്ലയില് നിന്നും 3 പേര്ക്കും, തിരുവനന്തപുരം, തൃശൂര്, കണ്ണൂര്, മലപ്പുറം ജില്ലകളില് നിന്നും രണ്ടുപേര്ക്ക് വീതവും പാലക്കാട് ജില്ലയില് നിന്നും ഒരാള്ക്കും ആണ് രോഗം സ്ഥിരികരിച്ചത്. ഇതില് 9 പേര് വിദേശത്ത് നിന്നും വന്നവരും ബാക്കിയുള്ളവര്ക്ക് സമ്പര്ക്കത്തിലൂടെയുമാണ് രോഗം വന്നത്. തിരുവന്തപുരത്ത് രോഗം സ്ഥിരീകരിച്ച 30 വയസുള്ളയാള് വീട്ടിലെ നിരീക്ഷണത്തിലും 61 വയസുള്ളയാള് ജനറല് ആശുപത്രി ഐസൊലേഷന് ചികിത്സയിലുമാണ്. ഇവരെ ഉടന് മെഡിക്കല് കോളേജ് ആശുപത്രി ഐസൊലേഷനില് പ്രവേശിപ്പിക്കുന്നതാണ്. ഇതില് 61 വയസുള്ളയാള് ദുബായ് എയര്പോര്ട്ട് ജീവനക്കാരനാണ്. 30 വയസുള്ളയാള് ഷാര്ജയില് നിന്നും വന്നയാളാണെങ്കിലും മറ്റൊരാളുടെ സമ്പര്ക്കത്തിലൂടെയാണ് രോഗം ഉണ്ടായത്.
കേരളത്തില് 265 പേര്ക്കാണ് ഇതുവരെ രോഗബാധ സ്ഥിരീകരിച്ചത്. നിലവില് 237 പേരാണ് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്. തിരുവനന്തപുരം, കോഴിക്കോട് ജില്ലകളില് ചികിത്സയിലായിരുന്ന ഓരോരുത്തരുടെ വീതം പരിശോധനാ ഫലം നെഗറ്റീവ് ആയിട്ടുണ്ട്. 26 പേര് രോഗമുക്തി നേടി ഡിസ്ചാര്ജായി. രണ്ട് പേരാണ് മരണമടഞ്ഞത്.
203 ലോക രാജ്യങ്ങളില് കോവിഡ് 19 പടര്ന്നു പിടിച്ച സാഹചര്യത്തിലും കേരളത്തില് രോഗികളുടെ എണ്ണം വര്ധിച്ച സാഹചര്യത്തിലും സംസ്ഥാനത്തെ വിവിധ ജില്ലകളിലായി 1,64,130 പേര് നിരീക്ഷണത്തിലാണ്. ഇവരില് 1,63,508 പേര് വീടുകളിലും 622 പേര് ആശുപത്രികളിലും നിരീക്ഷണത്തിലാണ്. 123 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. രോഗലക്ഷണങ്ങള് ഉള്ള 7965 വ്യക്തികളുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് 7256 സാമ്പിളുകളുടെ പരിശോധനാ ഫലം നെഗറ്റിവ് ആണ്.
Click it and Unblock the Notifications
Sign in with Google