ശബരിമല റോഡുകള്ക്കുണ്ടായ നാശനഷ്ടം പരിശോധിക്കാന് ഉന്നതതല സംഘത്തെ നിയോഗിച്ചു
പത്തനംതിട്ട: കാലവര്ഷക്കെടുതി മൂലം ശബരിമല റോഡുകള്ക്കുണ്ടായ നാശനഷ്ടം പരിശോധിക്കാനും ശബരിമല റോഡുകളുടെ പ്രവൃത്തി നിര്മാണപുരോഗതി പരിശോധിക്കാനും ഉന്നതതല സംഘത്തെ നിയോഗിച്ചു. പൊതുമരാമത്ത് - ടൂറിസം വകുപ്പ് മന്ത്രിയുടെ അധ്യക്ഷതയില് ചേര്ന്ന പി ഡബ്ല്യുഡി മിഷന് ടീം യോഗത്തിലാണ് പൊതുമരാമത്ത് വകുപ്പ് ജോയിന്റ് സെക്രട്ടറി ശ്രീറാം സാംബശിവറാവുവിന്റെ നേതൃത്വത്തിലുള്ള ടീമിനെ നിയോഗിച്ചത്.
മൂന്ന് ചീഫ് എന്ജിനിയര്മാര് കൂടി ഉള്പ്പെടുന്ന ടീം പത്തനംതിട്ട ജില്ലയിലും കോട്ടയം, ഇടുക്കി ജില്ലകളിലും ശബരിമല പാതകളിലെ സ്ഥിതിഗതികള് നേരിട്ട് എത്തി വിലയിരുത്തും. കാലവര്ഷം നിലവിലുള്ള ശബരിമല റോഡ് നിര്മാണ പ്രവര്ത്തനങ്ങളെ ബാധിച്ചിട്ടുണ്ടോ എന്ന കാര്യവും പരിശോധിക്കും. പരിശോധനയ്ക്ക് ശേഷം വിശദമായ റിപ്പോര്ട്ട് നല്കാനും മന്ത്രി ഉന്നതതല സംഘത്തിന് നിര്ദേശം നല്കി.
ശബരിമല റോഡ് പ്രവൃത്തി വിലയിരുത്താന് നവംബര് ഏഴിന് പത്തനംതിട്ടയില് പൊതുമരാമത്ത് - ടൂറിസം മന്ത്രി പി.എ. മുഹമ്മദ് റിയാസിന്റെ അധ്യക്ഷതയില് ഉന്നതതല യോഗം വിളിച്ചു ചേര്ക്കാന് തീരുമാനിച്ചിട്ടുണ്ട്. എംഎല്എമാരും പത്തനംതിട്ട, കോട്ടയം, ഇടുക്കി ജില്ലാ കളക്ടര്മാരും ഉദ്യോഗസ്ഥരും യോഗത്തില് പങ്കെടുക്കും. പൊതുമരാമത്ത് വകുപ്പിലെ ഉന്നതതല സംഘം നല്കുന്ന റിപ്പോര്ട്ട് കൂടി പരിഗണിച്ച് ആവശ്യമായ തീരുമാനങ്ങള് യോഗം കൈക്കൊള്ളും.
ശബരിമല മണ്ഡലകാലം തുടങ്ങുന്നതിനു മുന്പായി ബന്ധപ്പെട്ട വകുപ്പുതല പ്രവര്ത്തനങ്ങള് സമയബന്ധിതമായി പൂര്ത്തിയാക്കുമെന്ന് ദേവസ്വം വകുപ്പ് മന്ത്രി കെ.രാധാകൃഷ്ണന് നേരത്തെ വ്യക്തമാക്കിയിരുന്നു. കോവിഡ് 19 മഹാമരായുടെ പശ്ചാത്തലം നിലനില്ക്കുന്നതിനാല് ഇത്തവണയും ദര്ശനം വെര്ച്വല് ക്യൂ വഴി ക്രമീകരിച്ചിരിക്കുന്നത്. 25000 പേര് ദിവസേന വെര്ച്ച്വല് ക്യൂവിലൂടെ ദര്ശനം നടത്തും. 15.25 ലക്ഷം വെര്ച്വല് ക്യൂ ബുക്കിംഗിന് അനുമതി നല്കിയിട്ടുള്ളതില് പത്തു ലക്ഷത്തിലധികം പേര് ഇതു വരെ ബുക്ക് ചെയ്തു കഴിഞ്ഞു. കോവിഡ് സാഹചര്യത്തില് ആവശ്യമായ നിയന്ത്രണം പാലിച്ചില്ലായെങ്കില് വരാന് പോകുന്ന ദുരന്തം വളരെ വലുതായിരിക്കുമെന്നും അദ്ദേഹം നേരത്തെ അഭിപ്രായപ്പെട്ടിരുന്നു.
185 കോടി രൂപയുടെ സഹായമാണ് കഴിഞ്ഞ വര്ഷങ്ങളില് സര്ക്കാര് ദേവസ്വം ബോര്ഡിന് നല്കിയത്. ഇതര സംസ്ഥാനത്തു നിന്നു വരുന്ന ഭക്തര്ക്കായി ഏഴ് ഇടത്താവളങ്ങള് സ്ഥാപിക്കും. ഇവ 150 കോടി രൂപ മുതല് മുടക്കിലാണ് നിര്മിക്കുക. ഇതിനുള്ള ടെന്ഡര് നടപടികള് പൂര്ത്തിയായിട്ടുണ്ട്. ഈ തീര്ഥാടന കാലത്ത് 470 കെഎസ്ആര്ടിസി ബസുകള് ശബരിമലയിലേക്ക് സര്വീസ് നടത്തും. ഇതില് 140 ബസുകള് നിലയ്ക്കല് - പമ്പ ചെയിന് സര്വീസ് നടത്തും. 100 ഓര്ഡിനറി ബസുകളും 40 എസി ബസുകളുമാണ് സര്വീസ് നടത്തുകയെന്നും വകുപ്പ് മന്ത്രി അറിയിച്ചു.
Click it and Unblock the Notifications
Sign in with Google