'ദുബായില്‍ പാർട് ടൈം ജോലിക്ക് 10000 ദിർഹം ശമ്പളം': പിന്നില്‍ നടക്കുന്നത് എന്ത്? ദുബായ് പൊലീസ് പറയുന്നു

Updated: Saturday, October 4, 2025, 15:08 [IST]

സോഷ്യൽ മീഡിയ പ്ലാറ്റ്‌ഫോമുകളിലും ഓൺലൈൻ സൈറ്റുകളിലും പ്രചരിക്കുന്ന ഉയർന്ന ശമ്പളം വാഗ്ദാനം ചെയ്യുന്ന പാർട്ട്-ടൈം ജോലി വിജ്ഞാപനങ്ങള്‍ക്കെതിരെ മുന്നറിയിപ്പുമായി ദുബായി പൊലീസ്. ഇത്തരം അറിയിപ്പുകളില്‍ ബഹുഭൂരിപക്ഷവും വ്യാജമാണെന്നാണ് പൊലീസ് അറിയിക്കുന്നത്. ഇത്തരം തട്ടിപ്പുകൾ ജനങ്ങൾക്ക് നിയമപരമായ ഉത്തരവാദിത്തം ഏറ്റെടുക്കേണ്ടിവരുന്ന അവസ്ഥയിലേക്ക് നയിക്കുന്നതായി ആന്‍റ്റി-ഫ്രോഡ് സെന്റർ അറിയിച്ചു.

വ്യാജ വിജ്ഞാപനങ്ങൾ ബാങ്ക് അക്കൗണ്ടുകൾ തുറന്ന് പണം മാറ്റുന്നതിനോ അജ്ഞാത സ്രോതസ്സുകളിൽ നിന്നുള്ള ഫണ്ട് ട്രാൻസ്ഫറുകളോ നടത്തുന്നതിനോ വഴിതുറക്കുന്നുവെന്നും . ദുബായ് പോലീസിന്റെ ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്മെന്റ് വ്യക്തമാക്കുന്നു. ഇത് കള്ളപ്പണം വെളുപ്പിക്കല്‍ പോലുള്ള നിയമവിരുദ്ധ പ്രവർത്തനങ്ങളിലേക്ക് ആളുകളെ തള്ളവിടുന്നു. ഇത്തരം കേസുകളില്‍ പലപ്പോഴും പിടിക്കപ്പെടന്നത് സാധാരണക്കാർ ആണെന്നും അധികൃതർ ചൂണ്ടിക്കാട്ടുന്നു.

തിട്ടിപ്പുകാർ ഉയർന്ന ശമ്പളം (ഉദാഹരണത്തിന്, പാർട്ട്-ടൈം ജോലിക്ക് മാസം 10,000 ദിർഹമോ അതിലധികമോ) വാഗ്ദാനം ചെയ്ത് സോഷ്യൽ മീഡിയയിലെ ഫേസ്ബുക്ക്, ഇൻസ്റ്റാഗ്രാം, ടെലിഗ്രാം പോലുള്ള പ്ലാറ്റ്‌ഫോമുകളിൽ പരസ്യം നടത്തുന്നു. ആളുകളെ വലയില്‍ വീഴ്ത്താനായി 'എളുപ്പമുള്ള ജോലി', 'വീട്ടിൽ നിന്ന് പ്രവർത്തിക്കാം' എന്നിങ്ങനെയുള്ള വാഗ്ദാനങ്ങളും ഉണ്ടാകും. . ജോലി സ്വീകരിക്കാൻ താൽപര്യമുണ്ടെങ്കിൽ, ആളുകള്‍ വ്യക്തിഗത വിവരങ്ങൾ (പാസ്പോർട്ട്, ബാങ്ക് ഡീറ്റെയിൽസ്) ഉള്‍പ്പെടെ നല്‍കേണ്ടതുണ്ട്.

തുടർന്ന്, ജോലിക്ക് ചേർന്ന ആളുകളുടെ പേരിൽ തന്നെ ബാങ്ക് അക്കൗണ്ടുകൾ തുറന്ന്, അജ്ഞാത സ്രോതസ്സുകളിൽ നിന്നുള്ള പണം മാറ്റാൻ നിർദേശിക്കുന്നു. ഈ തട്ടിപ്പ് നടക്കുന്നതോടെ ഇരകൾ അറിയാതെ തന്നെ ക്രിമിനൽ പ്രവർത്തനങ്ങളുടെ ഭാഗമാകുകയും അത് നിയമപരമായ നടപടികളിലേക്ക് നയിക്കപ്പെടുകയും ചെയ്യുന്നു. ഈ തട്ടിപ്പുകൾ യുഎഇയിൽ വർധിച്ചുവരുന്ന ക്രിമിനൽ പ്രവണതയുടെ ഭാഗമാണ്. 2025-ലെ ആദ്യ പാദത്തിൽ, ദുബായ് പോലീസിന്റെ eCrime ഡിവിഷന് സമാന തട്ടിപ്പുകളെക്കുറിച്ച് 20% കൂടുതൽ റിപ്പോർട്ടുകൾ ലഭിച്ചതായി ഔദ്യോഗിക സ്രോതസ്സുകൾ തന്നെ സൂചിപ്പിക്കുന്നു. AI ബോട്ടുകൾ ഉപയോഗിച്ച് സംഭാഷണങ്ങൾ നടത്തി ഇരകളെ വഞ്ചിക്കുന്ന പുതിയ രീതികളും റിപ്പോർട്ട് ചെയ്യപ്പെട്ടിട്ടുണ്ട്

എങ്ങനെ തിരിച്ചറിയാം

ദുബായ് പോലീസിന്റെ eCrime പ്ലാറ്റ്‌ഫോം പ്രകാരം, തട്ടിപ്പ് സൂചിപ്പിക്കുന്ന പ്രധാന ലക്ഷണങ്ങൾ ഇവയാണ്:

ഫേക്ക് കമ്പനി പേരുകൾ: പ്രശസ്ത ദുബായ് കമ്പനികളെ പോലെ തോന്നിക്കുന്ന വെബ്‌സൈറ്റുകൾ സൃഷ്ടിക്കുന്നു.

ആദ്യം പണം ആവശ്യപ്പെടൽ: വിസ പ്രോസസിംഗിനോ ട്രെയിനിങ്ങിനോ ബാക്ക്ഗ്രൗണ്ട് ചെക്കിനോ പണം നൽകാൻ ആവശ്യപ്പെടുന്നു. (യഥാർത്ഥ ദുബായ് എംപ്ലോയർമാർ ഇത്തരം ഫീസുകൾ ചോദിക്കുന്നില്ല.)

ഔദ്യോഗിക ചാനലുകൾ ഇല്ലാത്ത ആശയവിനിമയം: വാട്ട്സാപ്പ്, ടെലിഗ്രാം, അല്ലെങ്കിൽ ഫ്രീ ഇമെയിൽ സർവീസുകൾ മാത്രം ഉപയോഗിക്കുന്നു.
അസാധാരണമായ വാഗ്ദാനങ്ങൾ: പാർട്ട്-ടൈം ജോലിക്ക് അസാധാരണമായ ഉയർന്ന ശമ്പളം, അല്ലെങ്കിൽ 'പേപ്പർവർക്ക് കുറവ്' എന്നിവ.

വ്യക്തിഗത വിവരങ്ങൾ മാറ്റം: പാസ്പോർട്ട്, ബാങ്ക് ഡീറ്റെയിൽസ് എന്നിവ അഭ്യർത്ഥിക്കുന്നു, പിന്നീട് അത് മറ്റ് തട്ടിപ്പുകൾക്ക് ഉപയോഗിക്കുന്നു

ദുബായ് പോലീസ് ജനങ്ങൾക്ക് നൽകുന്ന പ്രധാന നിർദേശങ്ങൾ

ജോലി വാഗ്ദാനം വെരിഫൈ ചെയ്യുക: മനുഷ്യവിഭവ മന്ത്രാലയം (MOHRE) നൽകിയ ഔദ്യോഗിക ഓഫർ ലെറ്റർ ലഭിക്കണം. അതിന്റെ സാധുതയും inquiry.mohre.gov.ae വെബ്‌സൈറ്റിൽ ചെക്ക് ചെയ്യുക.

കമ്പനി ലൈസൻസ് പരിശോധിക്കുക: നാഷണൽ ഇക്കണോമിക് റജിസ്റ്റർ (NER) പ്ലാറ്റ്‌ഫോമിൽ കമ്പനി പേരും എമിറേറ്റും നൽകി സെർച്ച് ചെയ്യുക. ആക്ടീവ് ട്രേഡ് ലൈസൻസ് ഉണ്ടോ എന്ന് ഉറപ്പാക്കുക.

വിസ/പെർമിറ്റ് വെരിഫിക്കേഷൻ: ദുബായ് GDRFA വെബ്‌സൈറ്റ് (gdrfad.gov.ae) അല്ലെങ്കിൽ ICP സ്മാർട്ട് സർവീസസ് (smartservices.icp.gov.ae) ഉപയോഗിച്ച് ഫയൽ നമ്പർ, ദേശീയത, ജനന തീയതി എന്നിവ നൽകി പരിശോധിക്കുക.

പണം അയക്കരുത്: ജോലി അപേക്ഷയ്ക്കോ വിസയ്ക്കോ പണം നൽകരുത്; എല്ലാ ചെലവുകളും എംപ്ലോയർ ഏറ്റെടുക്കും.

സംശയം തോന്നിയാൽ: സ്ക്രീൻഷോട്ടുകൾ, മെസേജുകൾ എന്നിവ സൂക്ഷിച്ച് ഉടൻ റിപ്പോർട്ട് ചെയ്യുക. തട്ടിപ്പുകാരുമായി കൂടുതൽ ഇടപഴകരുത്.

സംശയാസ്പദമായ ജോലി വിജ്ഞാപനങ്ങൾ കണ്ടാൽ, eCrime.ae പ്ലാറ്റ്‌ഫോം അല്ലെങ്കിൽ ദുബായ് പോലീസ് ആപ്പിലെ eCrime സെക്ഷൻ വഴി ഉടൻ റിപ്പോർട്ട് ചെയ്യുക. 901-ലേക്ക് കോൾ ചെയ്യുകയോ, ദുബായ് പോലീസിന്റെ ഔദ്യോഗിക ചാനലുകൾ ഉപയോഗിക്കുകയോ ചെയ്യാം. "പൊതു ബോധവൽക്കരണം തട്ടിപ്പുകാരുടെ ആദ്യ പ്രതിരോധമാണ്" എന്ന് ദുബായ് അധികൃതർ ഓർമിപ്പിക്കുന്നു. ഈ തട്ടിപ്പുകൾ യുഎഇയിലെ ജോലി തേടുന്നവർക്ക് വലിയ ഭീഷണിയാണ്. പ്രത്യേകിച്ച് വിദേശികളും പുതിയ തൊഴിലാളികളും ഇത്തരം തട്ടിപ്പുകളില്‍ വീഴാതിരിക്കാന്‍ ശ്രദ്ധിക്കണമെന്നും പൊലീസ് സൂചിപ്പിക്കുന്നു.