ക്യാമറകള്‍ ഓഫ് ചെയ്യാന്‍ സ്പീക്കര്‍ ആവശ്യപ്പെട്ടു

ദില്ലി: ലോക്സഭാ നടപടികള്‍ സംപ്രേഷണം ചെയ്യാന്‍ തുടങ്ങിയതിനു ശേഷം ആദ്യമായി നടപടികള്‍ ക്യാമറയില്‍ പകര്‍ത്തുന്നത് നിര്‍ത്തിവെക്കാന്‍ സ്പീക്കര്‍ ആവശ്യപ്പെട്ടു.

നവംബര്‍ 21ചൊവാഴ്ച കര്‍ഷകര്‍ നേരിടുന്ന പ്രശ്നങ്ങളെ കുറിച്ച് പ്രതിപക്ഷനേതാവ് സോണിയാഗാന്ധി അവതരിപ്പിച്ച അടിയന്തിരപ്രമേയത്തിന്റെ ചര്‍ച്ചക്കിടയില്‍ പ്രതിപക്ഷം ബഹളമുണ്ടാക്കിയപ്പോഴാണ് സ്പീക്കര്‍ വീഡിയോക്യാമറകള്‍ ഓഫ് ചെയ്യാന്‍ ആവശ്യപ്പെട്ടത്.

സ്പീക്കര്‍ ഇങ്ങനെ ആവശ്യപ്പെട്ടെങ്കിലും ദൂരദര്‍ശനിലെ തത്സമയ സംപ്രേഷണം നിര്‍ത്തിവെക്കാന്‍ അഞ്ചു മിനിറ്റോളമെടുത്തു. ലോക്സഭാ നടപടികളുടെ സംപ്രേഷണം അല്പസമത്തിനുള്ളില്‍ തുടര്‍ന്ന് കാണിക്കുമെന്ന് ടിവി സ്ക്രീനില്‍ കാണിക്കുകയും ചെയ്തു.

ചോദ്യോത്തരവേളക്കിടയിലായിരുന്നു സ്പീക്കറുടെ ഉത്തരവുണ്ടായത്. ഉടന്‍ തന്നെ സഭ നിര്‍ത്തിവെക്കുന്നതായി സ്പീക്കര്‍ പ്രഖ്യാപിക്കുകയും ചെയ്തു. വീണ്ടും സഭ ചേര്‍ന്നെങ്കിലും അന്നത്തേക്ക് പിരിയുകയായിരുന്നു.