ബാലകൃഷ്ണപിള്ളയ്ക്ക് ജാമ്യം

ദില്ലി: ഗ്രാഫൈറ്റ് കേസില്‍ ജയിലില്‍ കഴിയുന്ന മുന്‍ മന്ത്രിയും കേരളകോണ്‍ഗ്രസ് (ബി) നേതാവുമായ ആര്‍. ബാലകൃഷ്ണ പിള്ള എംഎല്‍എയ്ക്ക് സുപ്രീം കോടതി ജാമ്യം അനുവദിച്ചു. മുന്‍ വൈദ്യുതി ബോര്‍ഡ് ചെയര്‍മാന്‍ പി. കേശവപിള്ളയ്ക്കും ജാമ്യം ലഭിച്ചിട്ടുണ്ട്.

ചീഫ് ജസ്റിസ് എ.എസ്. ആനന്ദ്, ജസ്റിസുമാരായ ആര്‍.സി. ലഹോതി, ബ്രിജേഷ് കുമാര്‍ എന്നിവരടങ്ങിയ ഡിവിഷന്‍ ബെഞ്ചാണ് മാര്‍ച്ച് 23 വെള്ളിയാഴ്ച വിധി പ്രഖ്യാപിച്ചത്. 20,000 രൂപയ്ക്കും തുല്ല്യതുകയ്ക്കുള്ള രണ്ടാള്‍ ജാമ്യത്തിലുമാണ് ഇരുവര്‍ക്കും ജാമ്യം അനുവദിച്ചത്.

നേരത്തെ വിജിലന്‍സ് കോടതി ഇരുവര്‍ക്കും ഒരു വര്‍ഷത്തെ കഠിനതടവും 10,000 രൂപ പിഴയുമാണ് ശിക്ഷ വിധിച്ചിരുന്നത്. 12,241,440 യൂണിറ്റ് വൈദ്യുതി കര്‍ണാടകത്തിലെ ഗ്രാഫൈറ്റ് ഇന്ത്യ ലിമിറ്റഡിന് വിറ്റുവെന്നായിരുന്നു ഇവര്‍ക്കെതിരെയുള്ള കേസ്. കീഴ്ക്കോടതിയുടെ വിധി മാര്‍ച്ച് രണ്ട് വെള്ളിയാഴ്ച ഹൈക്കോടതി ശരിവെച്ചിരുന്നു.

സുപ്രീം കോടതിയില്‍ അപ്പീല്‍ നല്‍കിയെങ്കിലും ജയിലില്‍ കഴിയുന്നതിന്റെ സര്‍ട്ടിഫിക്കറ്റ് നല്‍കാതെ അപ്പീല്‍ പരിഗണിക്കാനാവില്ലെന്ന് കോടതി പറഞ്ഞു. തുടര്‍ന്ന് ബാലകൃഷ്ണപിള്ളയും കേശവപിള്ളയും മാര്‍ച്ച് 20ന് കോടതിയില്‍ കീഴടങ്ങി.

സുപ്രീം കോടതി ജാമ്യമനുവദിച്ചതിന്റെ രേഖകള്‍ വിജിലന്‍സ് കോടതിയില്‍ ലഭിച്ചാല്‍ ഇപ്പോള്‍ തിരുവനന്തപുരം സെന്‍ട്രല്‍ ജയിലില്‍ കഴിയുന്ന പിള്ളയ്ക്ക് പുറത്തിറങ്ങാം. ഇതിന് ഒന്നോ രണ്ടോ ദിവസമെടുക്കും.