ബിജെപിക്ക് നിരാശ
തിരുവനന്തപുരം: ഇക്കുറി കേരള നിയമസഭയില് അക്കൗണ്ട് തുറക്കാമെന്ന് ഏറെ പ്രതീക്ഷ വച്ചു പുലര്ത്തിയിരുന്ന ബിജെപിക്ക് കടുത്ത നിരാശ.
മഞ്ചേശ്വരത്തും കാസര്കോട്ടും വിജയിക്കുമെന്നാണ് പാര്ട്ടി കേന്ദ്രങ്ങള് കണക്കുകൂട്ടിയിരുന്നത്. എന്നാല് പ്രതീക്ഷകളെ തകിടം മറിച്ചുകൊണ്ട് കഴിഞ്ഞ തവണ കിട്ടിയ വോട്ടുകള് പോലും ബിജെപി സ്ഥാനാര്ത്ഥി സി. കെ. പത്മനാഭന് മഞ്ചേശ്വരത്ത് നേടാനായില്ല. യുഡിഎഫിലെ ചെര്ക്കളം അബ്ദുള്ള തന്റെ ഭൂരിപക്ഷം 10, 000ല് അധികം വോട്ടുകളായി വര്ധിപ്പിച്ചു.1996ല് ബിജെപിയുടെ ബാലകൃഷ്ണ ഷെട്ടി 32413 വോട്ടുകള് നേടിയിരുന്നു.
കാസര്കോട്ടും ബിജെപിക്ക് കനത്ത തിരിച്ചടി നേരിടേണ്ടി വന്നു. ഇവിടെ മുസ്ലീം ലീഗിലെ സി. ടി. അഹമ്മദലി 16,000ത്തില് അധികം വോട്ടുകള്ക്ക് ബിജെപി സ്ഥാനാര്ത്ഥി പി. കെ. കൃഷ്ണദാസിനെ പരാജയപ്പെടുത്തി.
തിരുവനന്തപുരം ഈസ്റിലും നേമത്തും ബിജെപി വിജയിച്ചേക്കുമെന്ന് കരുതപ്പെട്ടിരുന്നു. ഈസ്റില് കനത്ത തിരിച്ചടിയാണ് പാര്ട്ടി നേരിട്ടത്. കഴിഞ്ഞ ലോക്സഭാ തിരഞ്ഞെടുപ്പില് ഇവിടെ ഒന്നാം സ്ഥാനത്തെത്തിയ പാര്ട്ടി മൂന്നാം സ്ഥാനത്തേക്ക് തള്ളപ്പെട്ടു. വളരെ പ്രതീക്ഷയോടെയാണ് പാര്ട്ടി അഡ്വ. ബി. കെ. ശേഖറിനെ സ്ഥാനാര്ത്ഥിയായി ഈസ്റില് അവതരിപ്പിച്ചത്.
നേമത്ത് നല്ലൊരു പോരാട്ടം നടത്താന് പോലും പാര്ട്ടിയുടെ യുവനേതാവ് എം. എസ്. കുമാറിന് കഴിഞ്ഞില്ല.
ബിജെപിയുടെ വോട്ടുകള് കുറഞ്ഞുവെന്നാണ് കണക്കുകള് കാണിക്കുന്നത്. ബിജെപി വോട്ടുകള് യുഡിഎഫിന് മറിച്ചുനല്കിയെന്ന എല്ഡിഎഫ് ആരോപണത്തെ ഇത് ശരി വയ്ക്കുന്നു. എന്നാല് ഇത് തുറന്ന് സമ്മതിക്കാന് ബിജെപിയുടെ സംസ്ഥാന നേതൃത്വം സമ്മതിക്കുന്നില്ല. ബിജെപിയുടെ ശക്തി കേരളത്തില് കുറഞ്ഞുവെന്ന് പറയാനും ബിജെപി മടിക്കുന്നു.