മന്ത്രിസ്ഥാനം: ഇന്ന് തീരുമാനമായേക്കും
തിരുവനന്തപുരം: സോണിയാഗാന്ധിയുടെ നേതൃത്വത്തില് മെയ് 24 വ്യാഴാഴ്ച വൈകീട്ട് ദില്ലിയില് നടക്കുന്ന ചര്ച്ചയില് കോണ്ഗ്രസിലെ മന്ത്രിമാരുടെ കാര്യത്തില് അന്തിമ തീരുമാനമുണ്ടാകുമെന്ന് സൂചന. സോണിയാഗാന്ധിയുടെ അധ്യക്ഷതയില് നടക്കുന്ന ഈ അന്തിമയോഗത്തില് കരുണാകരനും ആന്റണിയും മുരളീധരനും പങ്കെടുക്കും.
വ്യാഴാഴ്ച രാവിലെ ആന്റണിയും മുരളീധരനും കേരളത്തിന്റെ ചുമതലയുള്ള എഐസിസി അധ്യക്ഷന് ഗുലാംനബി ആസാദുമായി ചര്ച്ച നടത്തി. ഒറ്റയ്ക്കൊറ്റായാണ് ആസാദ് ഇവരുമായി ചര്ച്ചകള് നടത്തിയത്. പക്ഷെ അനുകൂല തീരുമാനമൊന്നുമുണ്ടായില്ല.
കെ.വി. തോമസിന്റെ മന്ത്രിസ്ഥാനത്തെച്ചൊല്ലിയാണ് തര്ക്കം. തോമസിനെ മന്ത്രിയാക്കണമെന്ന കാര്യത്തില് കരുണാകരന് ഉറച്ചുനില്ക്കുകയാണ്. അതേ സമയം ഉമ്മന്ചാണ്ടി ധനമന്ത്രിയാകുന്നതിനെ കരുണാകരന് എതിര്ക്കുകയും ചെയ്യുന്നു. എന്നാല് ഉമ്മന്ചാണ്ടി ധനമന്ത്രിയാകണമെന്ന കാര്യത്തില് ആന്റണി ഉറച്ചുനില്ക്കുകയാണ്.
ഒരു പക്ഷേ കൂടുതല് മന്ത്രിസ്ഥാനങ്ങള് ലഭിച്ചാല് തോമസിന്റെ കാര്യത്തിലുള്ള പിടിവാശി കരുണാകരന് ഉപേക്ഷിച്ചേക്കുമെന്ന് കരുതുന്നു. ആന്റണിയും മുരളീധരനും മെയ് 25 വെള്ളിയാഴ്ചയോടെ തിരുവനന്തപുരത്ത് തിരിച്ചെത്തും.