യുദ്ധസന്നാഹവുമായി പാകിസ്ഥാന്
ഇസ്ലാമബാദ്: അഫ്ഗാന് അതിര്ത്തിയില് അണിനിരത്തിയിരിക്കുന്ന പാക് സൈനികരെക്കൂടി ഇന്ത്യന് അതിര്ത്തിയില് വിന്യസിക്കാന് പാകിസ്ഥാന് തീരുമാനിച്ചു. പാക് പ്രസിഡന്റ് മുഷാറഫിന്റെ വക്താവ് മെയ് 31 വെള്ളിയാഴ്ച സിഎന്എന് വാര്ത്താഏജന്സിയോട് വെളിപ്പെടുത്തിയതാണ് ഈ വിവരം.
അത്തരമൊരു നീക്കത്തെക്കുറിച്ച് ചിന്തിക്കുകയാണെന്ന് മുഷാറഫ് വ്യാഴാഴ്ച സൂചന നല്കിയിരുന്നു. എന്നാല് ഇക്കാര്യത്തില് തീരുമാനമെടുത്തെന്ന് മേജര് ജനറല് റഷീദ് ഖുറേഷിയാണ് വ്യക്തമാക്കിയത്. അഫ്ഗാന് അതിര്ത്തിയില് എത്ര പാക് സൈനികരുണ്ടെന്ന് വ്യക്തമല്ല. ഇപ്പോള് തന്നെ ഇന്തോ-പാക് അതിര്ത്തിയില് ആയിരക്കണക്കിന് സൈനികരെ പാക് പട്ടാളം അണിനിരത്തിയിട്ടുണ്ട്. കൂടുതല് പാക് സൈനികര് എത്തുന്നതോടെ അതിര്ത്തിയില് സംഘര്ഷം മൂര്ച്ഛിക്കും.
അഫ്ഗാന് അതിര്ത്തിയില് നിന്ന് പാക് പട്ടാളത്തെ പിന്വലിച്ചാല് തീവ്രവാദത്തിനെതിരെ അമേരിക്ക നടത്തിവരുന്ന പോരാട്ടത്തിന് വന് തിരിച്ചടിയേല്ക്കുമെന്ന് അന്താരാഷ്ട്രസമൂഹം ഭയപ്പെടുന്നു. അഫ്ഗാനിസ്ഥാനില് നിന്ന് അല്ക്വെയ്ദ-താലിബാന് തീവ്രവാദികള് പാകിസ്ഥാനിലേക്ക് കടക്കാതിരിക്കാനാണ് അഫ്ഗാന് അതിര്ത്തിയില് പാക്പട്ടാളത്തെ വിന്യസിച്ചത്.
താലിബാന്-അല്ക്വെയ്ദ ശക്തികളെ വേരോടെ പിഴുതെറിയാനാണ് അമേരിക്കയുടെ ശ്രമം. അതിനാല് പാകിസ്ഥാന്റെ പുതിയ തീരുമാനം അമേരിക്കയ്ക്ക് തിരിച്ചടിയാണെന്നതില് സംശയമില്ല. ഈ സാഹചര്യത്തില്, ഏതുവിധേനയും പാകിസ്ഥാന്റെ ഈ നീക്കം തടയാനാണ് യുഎസ് പ്രതിരോധസെക്രട്ടറി ഡൊണാള്ഡ് റംസ്ഫീല്ഡിനെത്തന്നെ തിരക്കിട്ട് പാകിസ്ഥാനിലേക്കയക്കാന് അമേരിക്ക തീരുമാനിച്ചത്. റംസ്ഫീല്ഡ് ഇന്ത്യും സന്ദര്ശിക്കും.