ജയ മലക്കം മറിഞ്ഞു; ലങ്കയില് തമിഴ് രാജ്യം വേണം
സേലം: ശ്രീലങ്കയില് തമിഴര്ക്കു പ്രത്യേക രാജ്യം രൂപീകരിയ്ക്കണമെന്ന ആവശ്യവുമായി അണ്ണാ ഡിഎംകെ നേതാവ് ജയലളിത രംഗത്ത്.
തമിഴ്നാട്ടിലെ ഒരു രാഷ്ട്രീയ പാര്ട്ടിയും ഉന്നയിക്കാത്ത ആവശ്യമാണ് ജയലളിത ഉയര്ത്തിയിരിക്കുന്നത്. പ്രകടന പത്രികയില് പോലും ശ്രീലങ്കയിലെ തമിഴ് വംശജര്ക്ക് തുല്യ അവകാശം നല്കണമെന്നാണ് എഐഎഡിഎംകെ ഇത്രയും കാലം ആവശ്യപ്പെട്ടിരുന്നത്.
എല്ടിടിഇയുടെ ഏറ്റവും വലിയ വിമര്ശകരില് ഒരാളായ ജയലളിതയുടെ പുതിയ നീക്കം ഭരണകക്ഷിയായ ഡിഎംകെയെ വെട്ടിലാക്കയിരിക്കുകയാണ്.
ലങ്കയിലെ പ്രശ്നപരിഹാരത്തിനുളള ഏക മാര്ഗം തമിഴര്ക്കു പ്രത്യേക രാജ്യം രൂപീകരിക്കലാണെന്ന് സേലത്തു നടന്ന തിരഞ്ഞെടുപ്പു സമ്മേളനത്തിലാണ് ജയലളിത പറഞ്ഞത്. ജീവനകലയുടെ ആചാര്യന് ശ്രീ ശ്രീ രവിശങ്കര് ലങ്കയിലെ അഭയാര്ത്ഥി ക്യാമ്പുകള് സന്ദര്ശിച്ച ശേഷം നല്കിയ വിവരങ്ങളാണ് പുതിയ നിലപാടെടുക്കാന് പ്രേരിപ്പിച്ചതെന്നും ജയലളിത വെളിപ്പെടുത്തി.
അടിമകളെ പോലെയാണ് സിംഹളര് തമിഴ് ജനതയോടു പെരുമാറുന്നത്. കേന്ദ്രത്തില് അധികാരത്തിലെത്തുന്നത് അണ്ണാ ഡിഎംകെ പിന്തുണ നല്കുന്ന സര്ക്കാരാണെങ്കില് ലങ്കയില് തമിഴ് രാഷ്ട്രം രൂപീകരിക്കുന്നതിനുളള നീക്കം ശക്തമാക്കുമെന്നും അവര് പ്രഖ്യാപിച്ചു.
അടിയന്തര വെടിനിര്ത്തലിനു സമ്മര്ദം ചെലുത്താനെന്ന പേരില് കേന്ദ്ര സര്ക്കാരിന്റെ നിര്ദ്ദേശപ്രകാരം വിദേശകാര്യ സെക്രട്ടറി ശിവശങ്കര് മേനോനും ദേശീയ സുരക്ഷാ ഉപദേഷ്ടാവ് എംകെ നാരായണനും ലങ്ക സന്ദര്ശിച്ചത് കണ്ണില് പൊടിയിടാനുളള തന്ത്രമാണെന്ന് ജയലളിത ആരോപിച്ചു.
അതേസമയം ജയലളിതയെ പ്രതിരോധിയ്ക്കാന് ഡിഎംകെ രംഗത്തിറങ്ങിയിട്ടുണ്ട്. ജയലളിതയുടെ പ്രസ്താവന തെരഞ്ഞെടുപ്പ് ലക്ഷ്യം വെച്ചാണെന്നാണ് ഡിഎംകെ നേതാക്കളുടെ വാദം.