കലാവതിക്ക് നെ‍ഞ്ചുവേദന; മത്സരിക്കുന്നകാര്യം സംശയം

മുംബൈ: കോണ്‍ഗ്രസ് എം.പി രാഹുല്‍ ഗാന്ധിയുടെ പാര്‍ലമെന്റ് പ്രസംഗത്തിലൂടെ മാധ്യമ ശ്രദ്ധ നേടുകയും, മഹാരാഷ്ട്ര നിയമസഭാ തിരഞ്ഞെടുപ്പില്‍ മത്സരിക്കാന്‍ തീരുമാനിക്കുകയും ചെയ്ത കലാവതിയ്ക്ക് നെഞ്ചുവേദന.

വിദര്‍ഭ ജന്‍ ആന്ദോളന്‍ സമിതിയാണ് നിയമസഭാ തെരഞ്ഞെടുപ്പില്‍ കലാവതിയയെ ‍സ്ഥാനാര്‍ത്ഥിയായി പ്രഖ്യാപിച്ചത്.

നെഞ്ചു വേദനയെ തുടര്‍ന്ന് ഇവരെ വ്യാഴാഴ്ചയാണ് ആശുപത്രിയില്‍ പ്രവേശിപ്പിച്ചത്. ഇതോടെ നിയമസഭാ തെരഞ്ഞെടുപ്പില്‍ കലാവതി മത്സരിക്കുന്ന കാര്യം സംശയമായി. മുംബൈയിലെ പന്ഥര്‍കവാഡ ആശുപത്രിയില്‍ പ്രവേശിപ്പിച്ച കലാവതിയെ ഡോക്ടര്‍മാരുടെ സംഘം നിരന്തരം നിരീക്ഷിച്ച് വരികയാണ്.

ഒക്ടോബര്‍ 13ന് നടക്കുന്ന തെരഞ്ഞെടുപ്പില്‍ നാമനിര്‍ദ്ദേശ പത്രിക സമര്‍പ്പിക്കാനുള്ള അവസാന തീയതി സെപ്റ്റംബര്‍ 25ആണ്.

അതേസമയം ആരോഗ്യനില അനുവദിച്ചാല്‍ കലാവതി തെരഞ്ഞെടുപ്പില്‍ മത്സരിക്കുമെന്ന് വിദര്‍ഭ ജന്‍ ആന്ദോളന്‍ സമിതി നേതാവ് കിഷോര്‍ തിവാരി പറഞ്ഞു.

കലാവതിയ്ക്ക് മത്സരിക്കാന്‍ കഴിയാതെ വന്നാല്‍ ബേബിതായ് ബയാസ് ആയിരിക്കും മത്സരിക്കുകയെന്നാണ് സൂചന. കഴിഞ്ഞ ദിവസം കലാവതി രാഷ്ട്രീയത്തില്‍ വരുന്നത് ശരിയല്ലെന്ന് അഭിപ്രായപ്പെട്ടുകൊണ്ട് സുലഭ് ഇന്റര്‍നാഷണല്‍ സ്ഥാപകന്‍ ബിന്ദേശ്വര്‍ പഥക് രംഗത്തെത്തിയിരുന്നു.

കലാവതിയുടെ വാര്‍ത്താമൂല്യം ചൂഷണം ചെയ്യാന്‍ വേണ്ടിയാണ് അവരെ തിരഞ്ഞെടുപ്പില്‍ സ്ഥാനാര്‍ത്ഥിയാക്കുന്നതെന്നായിരുന്നു അദ്ദേഹത്തിന്റെ വാദം. രാഷ്ട്രീയത്തേക്കാളും കലാവതിക്ക് ചേരുക സാമൂഹിക പ്രവര്‍ത്തനമാണെന്നും അദ്ദേഹം അഭിപ്രായപ്പെട്ടിരുന്നു.

എന്നാല്‍ താന്‍ തിരഞ്ഞെടുപ്പില്‍ മത്സരിക്കുമെന്ന് ഇതിന് പിന്നാലെ കലാവതി തന്നെ പ്രഖ്യാപിച്ചിരുന്നു.