കണ്ണൂരില്‍ റെക്കാര്‍ഡ് പോളിങ്

കൊച്ചി: ഉപതിരഞ്ഞെടുപ്പ് നടന്ന കണ്ണൂര്‍, എറണാകുളം, ആലപ്പുഴ മണ്ഡലങ്ങളില്‍ ശരാശരി 72 ശതമാനം പോളിംഗ് രേഖപ്പെടുത്തി. കണ്ണൂരിലാണ് ഉയര്‍ന്ന വോട്ടിങ് ശതമാനംച 79.33%. എറണാകുളത്ത് 64.64 ശതമാനവും ആലപ്പുഴയില്‍ 74.99% ശതമാനവും വോട്ട് രേഖപ്പെടുത്തി.

2006ലെ നിയമസഭാ തിരഞ്ഞെടുപ്പുമായി താരതമ്യം ചെയ്യുമ്പോള്‍ മൂന്ന് മണ്ഡലങ്ങളിലും വോട്ടിംഗ് ശതമാനം കുത്തനെ ഉയര്‍ന്നിരിയ്ക്കുകയാണ്. കഴിഞ്ഞ നിയമസഭാ തിരഞ്ഞെടുപ്പില്‍ 74.29 ശതമാനം പേര്‍ വോട്ട് ചെയ്ത കണ്ണൂരില്‍ ഇത്തവണ റെക്കോര്‍ഡ് പോളിംഗാണ് രേഖപ്പെടുത്തിയത്.

ആലപ്പുഴയിലും എറണാകുളത്തും കഴിഞ്ഞ തവണ യഥാക്രമം 74 ഉം 61 ഉം ശതമാനം വീതമാണ് പോളിംഗ് രേഖപ്പെടുത്തിയത്. കണ്ണൂരിലടക്കം പോളിംഗ് സമാധാനപരമായിരുന്നു. പോളിങ് ശതമാനത്തിലെ വര്‍ധന തങ്ങള്‍ക്ക് ഗുണകരമാകുമെന്ന് എല്‍ഡിഎഫ്, യുഡിഎഫ് മുന്നണികള്‍ ഒരുപോലെ അവകാശപ്പെടുന്നു.

ചൊവ്വാഴ്ച രാവിലെ എട്ടിന് വോട്ടെണ്ണല്‍ തുടങ്ങും. ഒരു മണിക്കൂറിനുള്ളില്‍ തന്നെ വ്യക്തമായ സൂചന ലഭിക്കും. വോട്ടെണ്ണല്‍ ദിനം വരെ കേന്ദ്രങ്ങള്‍ക്ക് കാവല്‍ നില്‍ക്കുന്നത് കേന്ദ്ര സേനയായിരിക്കുമെന്ന് തിരഞ്ഞെടുപ്പ് കമ്മീഷന്‍ വ്യക്തമാക്കിയിട്ടുണ്ട്.