കല്യാണ്‍ സിങിന് പുതിയ പാര്‍ട്ടി; ജനക്രാന്തി

ലഖ്‌നൗ: ബിജെപി മുന്‍ നേതാവും ഉത്തര്‍പ്രദേശിലെ മുന്‍ മുഖ്യമന്ത്രിയുമായ കല്യാണ്‍സിങ്‌ പുതിയ പാര്‍ട്ടി രൂപീകരിച്ചു.

ജനക്രാന്തി പാര്‍ട്ടി എന്നാണ്‌ പുതിയ പാര്‍ട്ടിയുടെ പേര്‌. തന്റെ 77‍ാം പിറന്നാള്‍ ദിനത്തിലാണ് കല്യാണ്‍ പുതിയ പാര്‍ട്ടി പ്രഖ്യാപിച്ചത്.

ഇതോടെ അദ്ദേഹം ബിജെപിയിലേക്ക്‌ മടങ്ങുമെന്നത്‌ സംബന്ധിച്ച എല്ലാ അഭ്യൂഹങ്ങള്‍ക്കും വിരാമമായി.

തന്നെ അവഗണിക്കുന്നുവെന്ന്‌ പറഞ്ഞാണ്‌ കല്യാണ്‍ 1999-ല്‍ ബിജെപി വിട്ടത്‌.

അന്നും അദ്ദേഹം ഒരു പാര്‍ട്ടി ഉണ്ടാക്കിയിരുന്നു. പിന്നീട്‌ ബിജെപിയില്‍ തിരിച്ചെത്തിയെങ്കിലും വീണ്ടും വിട പറഞ്ഞു. കഴിഞ്ഞ ലോക്‌സഭാ തിരഞ്ഞെടുപ്പില്‍ സമാജ്‌വാദി പാര്‍ട്ടിയുടെ പിന്തുണയോടെ മത്സരിച്ചു‌. രണ്ടുമാസംമുമ്പ്‌ ആ എസ്പിയുമായും തെറ്റിപ്പിരിഞ്ഞു.

പുതിയ തലമുറ വേണം പാര്‍ട്ടിയെ നയിക്കാനെന്ന അനുയായികളുടെ അഭിപ്രായം മാനിച്ച്‌ മകന്‍ രാജ്‌വീര്‍സിങ്‌ ആയിരിക്കും ജനക്രാന്തി പാര്‍ട്ടിയുടെ പ്രസിഡന്റ്‌ എന്ന് കല്യാണ്‍ വ്യക്തമാക്കി.