മലാലയോട് മാപ്പപേക്ഷിച്ച് അക്രമിയുടെ സഹോദരി

ഇസ്ലാമാബാദ്: താലിബാന്‍ ഭീകരരുടെ വെടിയേറ്റ് ചികിത്സയില്‍ കഴിയുന്ന മനുഷ്യാവകാശ പ്രവര്‍ത്തക മലാല യൂസഫിനോട് മാപ്പപേക്ഷിച്ച് അക്രമിയുടെ സഹോദരി. അക്രമികളിലൊരാളായ അത്ത് ഉല്ല ഖാന്റെ സഹോദരിയായ റഹാന ഹലീം ആണ് മാപ്പപേക്ഷയുമായി രംഗത്തെത്തിയത്.

തന്റെ സഹോദരന്‍ ചെയ്ത തെറ്റിന് തന്റേയും കുടുംബത്തിന്റേയും പേരില്‍ മാപ്പു ചോദിക്കുന്നു. മലാലയെ തന്റെ സ്വന്തം സഹോദരിയുടെ സ്ഥാനത്താണ് കാണുന്നത്. തന്റെ സഹോദരന്റെ ഭാഗത്തു നിന്ന് പൊറുക്കാനാവാത്ത തെറ്റാണ് സംഭവിച്ചിരിക്കുന്നത്. അത്ത് ഉല്ലയെ ഇനി സഹോദരന്റെ സ്ഥാനത്ത് കാണാനാകില്ല. മലാലയെ ആക്രമിച്ചതിലൂടെ തനിക്കും കുടുംബത്തിനും സഹോദരന്‍ നാണക്കേടുണ്ടാക്കിയിരിക്കുകയാണെന്നും റഹാന പറഞ്ഞു.

ഒക്ടോബര്‍ 9നാണ് മലാലയെ സ്വാത് താഴ്വരയില്‍ വച്ച് താലിബാന്‍ ഭീകരര്‍ വെടിവച്ചത്. സ്വാത് താഴ്‌വരയിലെ താലിബാന്‍ തീവ്രവാദികളുടെ കീഴിലുള്ളവരുടെ ജീവിതത്തെക്കുറിച്ചും ഇവര്‍ക്ക് വിദ്യാഭ്യാസം നിഷേധിച്ചതിനെക്കുറിച്ചും മലാല ഡയറി എഴുതിയിരുന്നു. ഇത് 2009ല്‍ ബി.ബി.സി. പ്രസിദ്ധീകരിച്ചതോടെയാണ് പെണ്‍കുട്ടി അന്താരാഷ്ട്ര ശ്രദ്ധനേടിയത്. തീവ്രവാദികളുടെ ആക്രമണത്തില്‍ മലാലയ്ക്ക് ഒപ്പമുണ്ടായിരുന്ന രണ്ട് പെണ്‍കുട്ടികള്‍ക്കും വെടിയേറ്റിരുന്നു. പെഷര്‍വാറിലെ ആശുപത്രിയില്‍ പ്രവേശിപ്പിച്ച മലാലയെ പിന്നീട് വിദഗ്ധ ചികിത്സയ്ക്കായി ബ്രിട്ടനിലേയ്ക്ക് മാറ്റിയിരുന്നു.

English summary

In what appeared to be another twist in the already confused saga, the sister of alleged assailant has apologized to Malala Yousafzai for attack on her by her brother, Atta Ullah Khan.