യാമിനി കാര്യങ്ങള് പറഞ്ഞു, പരാതി കിട്ടിയില്ല
അതേ സമയം താന് നേരത്തെ നിയമസഭയില് പറഞ്ഞതെല്ലാം സത്യമാണെന്നും മുഖ്യമന്ത്രി പറഞ്ഞു. നിയമസഭയില് എല്ലാ കാര്യങ്ങളും താന് തുറന്നു പറഞ്ഞിട്ടുണ്ട്. അവര് മുമ്പും എന്നെ വന്നുകണ്ട് കാര്യങ്ങള് പറഞ്ഞിരുന്നു. എന്നാല് അന്നൊന്നും പരാതി തന്നിരുന്നില്ല. പരാതി സ്വീകരിക്കാന് തയ്യാറാകാത്ത ഒരാളെ നാലുപ്രാവശ്യം വന്ന് ആരെങ്കിലും കാണുമോ എന്നും മുഖ്യമന്ത്രി പ്രതികരിച്ചു.
സഹപ്രവര്ത്തകന്റെ കുടുംബപ്രശ്നം പരിഹരിക്കാന് താന് ഇടപെട്ടിരുന്നു. ആദ്യഘട്ടത്തില് അത് വിജയിക്കുകയും ചെയ്തു. കരാര് ഒപ്പിടുന്ന സാഹചര്യത്തിലേക്ക് കാര്യങ്ങള് എത്തുകയും ചെയ്തിരുന്നു. പിന്നെ എന്താണ് സംഭവിച്ചതെന്നും അറിയില്ല. ബാഹ്യമായ ഇടപെടലുകള് മൂലമാകാം യാമിനി കരാറില് നിന്ന് പിന്മാറിയതെന്ന് താന് ഊഹിക്കുന്നു. യാമിനിയുമായുള്ള പരിമിതമായ പരിചയംവച്ച് അവര് നുണപറയുന്ന സ്ത്രീയാണെന്ന് കരുതുന്നില്ലെന്നും മുഖ്യമന്ത്രി പറഞ്ഞു.