അമ്മയുടെ നിര്‍ബ്ബന്ധപ്രകാരം 14കാരി ഗര്‍ഭം ധരിച്ചു

ലണ്ടന്‍: കുഞ്ഞിനുവേണ്ടി അമ്മ പതിനാലുകാരിയായ മകളെ നിര്‍ബ്ബന്ധിച്ച് ഗര്‍ഭം ധരിപ്പിച്ചു. ബ്രിട്ടനിലാണ് സംഭവം നടന്നത്. ബ്രിട്ടനിലെ ഒരു ഹൈക്കോടതി ജഡ്ജി ജുഡ് പീറ്റര്‍ ജാക്‌സണ്‍ ഈ സംഭവത്തെ ക്രൂരവും സ്വാര്‍ത്ഥത നിറഞ്ഞതുമായി പ്രവൃത്തിയെന്നാണ് വിശേഷിപ്പിച്ചിരിക്കുന്നത്. അമേരിക്കയില്‍ നിന്നുള്ള വിവാഹമോചിതയായ സ്ത്രീയാണ് മകളെ തന്റെ സ്വാര്‍ത്ഥതയ്ക്കുവേണ്ടി ഗര്‍ഭം ധരിപ്പിച്ചത്. സ്വന്തം മകള്‍ക്കും ദത്തെടുത്ത മറ്റ് മൂന്നു കുട്ടികള്‍ക്കുമൊപ്പം ഇവര്‍ ബ്രിട്ടനിലാണ് താമസം.

സ്വന്തമായി ഒരു കുട്ടികൂടി വേണമെന്ന് ആഗ്രഹിച്ച സ്ത്രീയ്ക്ക് പക്ഷേ വീണ്ടും ദത്തെടുക്കാന്‍ അനുമതി ലഭിച്ചില്ല. അപ്പോഴാണ് കുട്ടികളില്‍ ഏറ്റവും മുതിര്‍ന്ന പതിനാലുകാരിയെ ഗര്‍ഭിണിയാക്കി കുഞ്ഞിനെ സ്വന്തമാക്കുകയെന്ന ആശയം അവരുടെ മനസ്സിലുദിച്ചത്. തുടര്‍ന്ന് ഇവര്‍ ഡെന്‍മാര്‍ക്ക് കേന്ദ്രമാക്കിപ്രവര്‍ത്തിക്കുന്ന ഒരു ഓണ്‍ലൈന്‍ കമ്പനിയില്‍ നിന്നും ലഭിച്ച ബീജ ദാതാവില്‍ നിന്നും ബീജം വാങ്ങി കുട്ടിയുടെ ഗര്‍ഭപാത്രത്തില്‍ നിക്ഷേപിയ്ക്കുകയായിരുന്നു.

അമ്മയുടെ ആവശ്യപ്രകാരം കുട്ടി ഗര്‍ഭിണിയായി. അമ്മയുടെ ആവശ്യം കേട്ട് താന്‍ സ്തബ്ധയായെന്നും പക്ഷേ ഞാനിതിന് തയ്യാറായാല്‍ അമ്മ തന്നെ കൂടുതല്‍ സ്‌നേഹിക്കുമെന്ന് തോന്നിയതിനാല്‍ നിര്‍ബ്ബന്ധത്തിന് വഴങ്ങുകയായിരുന്നുവെന്ന് കുട്ടി പറഞ്ഞതായി ന്യായാധിപന്‍ പറഞ്ഞു. കുട്ടിയ്ക്ക് പതിനാലു വയസ്സുള്ളപ്പോള്‍ മുതല്‍ ആറിലേറെ തവണ ബീജം നിക്ഷേപിച്ചതിന് ശേഷമാണത്രേ പെണ്‍കുട്ടി ഗര്‍ഭംധരിയ്ക്കുകയും 2011 ജുലൈയില്‍ ഒരു ആണ്‍കുഞ്ഞിന് ജന്മം നല്‍കുകയും ചെയ്തത്. പെണ്‍കുട്ടി ജനിയ്ക്കാനായി മാതാവ് പല വിദ്യകളും മകളില്‍ പരീക്ഷിച്ചിരുന്നുവെന്നും ജഡ്ജി പറഞ്ഞു.

പ്രസവത്തിനായി കുട്ടിയെ പ്രവേശിപ്പിച്ച ആശുപത്രിയിലുള്ള നഴ്‌സുമാര്‍ വളരെ വിചിത്രമായ കാര്യങ്ങളാണ് അമ്മയ്‌ക്കെതിരെ പറഞ്ഞത്. കുഞ്ഞിനെ മുലയൂട്ടാന്‍ അമ്മ മകളെ അനുവദിച്ചില്ലത്രേ. അമ്മയും കുഞ്ഞും തമ്മില്‍ വൈകാരിക ബന്ധം വളരുന്ന ഒരുകാര്യങ്ങളും വേണ്ടെന്നാണ് ആ സ്ത്രീ പറഞ്ഞതെന്നാണ് നഴ്‌സുമാര്‍ പറയുന്നത്. തുടര്‍ന്ന് ആശുപത്രി അധികൃതര്‍ അധികൃതരെ വിവരമറിയിയ്ക്കുകും അവര്‍ കുഞ്ഞിനെ ഫോസ്റ്റര്‍ കെയറിലേയ്ക്ക് മാറ്റുകയുമായിരുന്നു. മകളോടും മകളുടെ കുഞ്ഞിനോടും കാണിച്ച ക്രൂരതയുടെ പേരില്‍ അമ്മയിപ്പോള്‍ അഞ്ചുവര്‍ഷത്തെ ജയില്‍ശിക്ഷ അനുഭവിയ്ക്കുകയാണ്.

ഹൈക്കോടതിയിലെ കുടുംബവിഭാഗത്തിലാണ് ജഡ്ജി ഈ കേസിന്റെ വിശദാംശങ്ങള്‍ പറഞ്ഞത്. കേസില്‍ ശിക്ഷ വിധിച്ചിട്ട് ഏറെക്കാലമായെങ്കിലും ഏപ്രില്‍ 29ന് തിങ്കളാഴ്ചയാണ് ഇത് ആദ്യമായി റിപ്പോര്‍ട്ട് ചെയ്യപ്പെട്ടത്. സംഭവം റിപ്പോര്‍ട്ട് ചെയ്യുന്നതില്‍ നിബന്ധനങ്ങള്‍ ഉള്ളതിനാല്‍ കുട്ടിയുടെയും അമ്മയുടെയും പേരുവിവരങ്ങള്‍ വെളിപ്പെടുത്താതെയാണ് ദി ഗാര്‍ഡിയന്‍ പത്രം വാര്‍ത്ത പുറത്തുവിട്ടത്.

English summary

A woman desperate for another child forced her 14 year old daughter to get pregnant using syringes of donor sperm