'പ്രതിപക്ഷ യോഗം കോണ്‍ഗ്രസ് ഹൈജാക്ക് ചെയ്തു?'; 'ഇന്ത്യ' യോട് നിതീഷിന് താല്‍പര്യമില്ലായിരുന്നെന്ന് റിപ്പോര്‍ട്ട്

Updated: Thursday, July 20, 2023, 8:35 [IST]

പാട്ന: കഴിഞ്ഞ ദിവസം ബെംഗളൂരുവില്‍ ചേര്‍ന്ന പ്രതിപക്ഷ കക്ഷികളുടെ യോഗത്തില്‍ ഐക്യനിരക്ക് ഇന്ത്യ (ഇന്ത്യന്‍ നാഷണല്‍ ഡെവലപ്‌മെന്റല്‍ ഇന്‍ക്ലൂസീവ് അലയന്‍സ്) എന്ന പേര് നല്‍കാന്‍ ധാരണയായിരുന്നു. എന്നാല്‍ ബിഹാര്‍ മുഖ്യമന്ത്രി നിതീഷ് കുമാര്‍ ഈ പേരിനെ ശക്തമായി എതിര്‍ത്തിരുന്നതായി റിപ്പോര്‍ട്ട്. പാര്‍ട്ടിവൃത്തങ്ങളെ ഉദ്ധരിച്ച് ഇന്ത്യ ടുഡേയാണ് ഇക്കാര്യം റിപ്പോര്‍ട്ട് ചെയ്യുന്നത്.

പ്രതിപക്ഷ സഖ്യത്തിന്റെ പേരിനെക്കുറിച്ച് കോണ്‍ഗ്രസ് ചര്‍ച്ച ചെയ്തിട്ടില്ലെന്നും പേര് വെളിപ്പെടുത്തിയപ്പോള്‍ നിതീഷ് കുമാര്‍ ഞെട്ടിയെന്നുമാണ് വൃത്തങ്ങള്‍ പറയുന്നത്. ഒരു സഖ്യത്തിന് എങ്ങനെ ഇന്ത്യ എന്ന് പേരിടാന്‍ സാധിക്കും എന്ന് നിതീഷ് കുമാര്‍ ആശങ്കയോടെ ചോദിച്ചതായി വൃത്തങ്ങള്‍ അറിയിച്ചു. പ്രതിപക്ഷ ഐക്യനിര കോണ്‍ഗ്രസ് ഹൈജാക്ക് ചെയ്തു എന്ന് ഒരു കൂട്ടം ജെ ഡി യു നേതാക്കള്‍ വിശ്വസിക്കുന്നു.

'എല്ലാ പ്രതിപക്ഷ പാര്‍ട്ടികളെയും ഒന്നിപ്പിക്കുന്നതില്‍ നിതീഷ് കുമാറിന്റെ പങ്ക് നിഷേധിക്കാനാവില്ല. എന്നാല്‍ കോണ്‍ഗ്രസ് സഖ്യത്തെ ഹൈജാക്ക് ചെയ്ത രീതി ജെ ഡി യുവിന്റെയും ആര്‍ ജെ ഡിയുടെയും നേതാക്കളെ തീര്‍ച്ചയായും ഞെട്ടിച്ചിരിക്കുന്നു,' എന്നാണ് വൃത്തങ്ങള്‍ പറയുന്നത്. അതേസമയം യോഗത്തില്‍ നിതീഷ് കുമാര്‍ കോപാകുലനായിട്ടില്ലെന്ന് ജെ ഡി യു പ്രസിഡന്റ് ലാലന്‍ സിംഗ് പറഞ്ഞു.

2024 ലെ ലോക്‌സഭാ തെരഞ്ഞെടുപ്പില്‍ ബി ജെ പിയുടെ നേതൃത്വത്തിലുള്ള സഖ്യം പരാജയപ്പെടുമെന്നും അദ്ദേഹം പറഞ്ഞു. അടുത്ത വര്‍ഷം നടക്കാനിരിക്കുന്ന പാര്‍ലമെന്റ് തെരഞ്ഞെടുപ്പില്‍ ബി ജെ പിക്കെതിരെ പോരാടാനും ഐക്യമുന്നണിയായി സ്വയം ഉയര്‍ത്തിക്കാട്ടാനുമാണ് പ്രതിപക്ഷ സഖ്യത്തിന് ഇന്ത്യ എന്ന പേര് നല്‍കിയതെന്ന് വൃത്തങ്ങള്‍ ഇന്ത്യ ടുഡേയോട് പറഞ്ഞു.

പശ്ചിമ ബംഗാള്‍ മുഖ്യമന്ത്രി മമത ബാനര്‍ജിയാണ് ഇന്ത്യ എന്ന പേര് മുന്നോട്ട് വെച്ചത്. 2024 ലെ തിരഞ്ഞെടുപ്പ് ഇന്ത്യയെ വീണ്ടെടുക്കാനുള്ള ബി ജെ പിക്കെതിരായ പോരാട്ടമാണ് എന്നാണ് രാഹുല്‍ ഗാന്ധി പറഞ്ഞത്. ഇന്ത്യ എന്ന പേരിന് ടാഗ് ലൈനായി 'ജീതേഗ ഭാരത്' എന്നും നല്‍കിയിട്ടുണ്ട്. 'ഇന്ത്യ വിജയിക്കും' എന്നാണ് ഇത് കൊണ്ട് അര്‍ത്ഥമാക്കുന്നത്.

അതേസമയം നിഷേധാത്മകതയില്‍ കെട്ടിപ്പടുത്ത സഖ്യങ്ങള്‍ ഒരിക്കലും വിജയിച്ചിട്ടില്ലെന്നാണ് ബി ജെ പി വൃത്തങ്ങള്‍ ഇതിനോട് പ്രതികരിച്ചത്. എന്‍ ഡി എ തുടര്‍ച്ചയായി മൂന്നാം തവണയും വിജയിക്കുമെന്നും പ്രധാനമന്ത്രി നരേന്ദ്ര മോദി പറഞ്ഞു. ബെംഗളൂരുവില്‍ പ്രതിപക്ഷ യോഗം കഴിഞ്ഞ് മണിക്കൂറുകള്‍ക്ക് ശേഷം എന്‍ ഡി എയുടെ വിപലുമായ യോഗം ചേര്‍ന്നിരുന്നു. 38 കക്ഷികളാണ് ഇതില്‍ പങ്കെടുത്തത്.