സെല്ഫി വാട്സ്ആപ്പിലിട്ടശേഷം കാമുകന് വീട്ടമ്മയെ കൊലപ്പെടുത്തി
ഡെറാഡൂണ്: കാമുകിയുമായി സല്ലപിക്കാനായി ടീ എസ്റ്റേറ്റിലെത്തിയ യുവാവ് സെല്ഫിയെടുത്ത് വാട്സ് ആപ്പില് പോസ്റ്റ് ചെയ്തശേഷം കാമുകിയെ കൊലപ്പെടുത്തി. ഡെറാറൂണിനടുത്തുള്ള പ്രേം നഗറിലെ ഒരു തേയിലത്തോട്ടത്തിലാണ് സംഭവം. 27 വയസ് പ്രായമുള്ള ആഷിഷ് കുമാര് കാമുകി ഗുര്പ്രീത് കൗറിനെയാണ് കൊലപ്പെടുത്തിയത്. വിവാഹിതയായ ഗുര്പ്രീത് ആഷിഷുമായി അവിഹിതബന്ധത്തിലായിരുന്നു.
ആഷിഷിന്റെ നിര്ദ്ദേശപ്രകാരമാണ് ഭര്ത്താവിന്റെ കണ്ണുവെട്ടിച്ച് ഗുര്പ്രീത് തേയിലത്തോട്ടത്തിന് നടുവിലെ വാടകക്കെട്ടിടത്തിലെത്തിയത്. ഇവിടെവെച്ച് ആഷിഷ് ഗുര്പ്രീതുമായുള്ള സെല്ഫിയെടുത്ത് മറ്റു സുഹൃത്തുക്കള്ക്ക് അയച്ചു നല്കിയിരുന്നു. പിന്നീട് ഇത് പ്രൊഫൈല് പിക്ചറാക്കിയശേഷം കാമുകിയെ കൊലപ്പെടുത്തുമെന്ന സൂചനയുള്ള സ്റ്റാറ്റസും പോസ്റ്റ് ചെയ്തു.
ഇതിന് പിന്നാലെ ഗുര്പ്രീതിനെ ഷാള് ഉപയോഗിച്ച് കൊലപ്പെടുത്താന് ശ്രമിക്കുകയായിരുന്നു. ശ്രമം പരാജയപ്പെട്ടതോടെ മൂര്ച്ചയുള്ള കത്തി ഉപയോഗിച്ച് കഴുത്തറുത്ത് കൊലപ്പെടുത്തി. യുവതിയുടെ കരച്ചില്കേട്ട് സമീപത്തുള്ളവര് ഓടിയെത്തുമ്പോഴേക്കും ആഷിഷ് രക്ഷപ്പെട്ടിരുന്നതായി പോലീസ് പറഞ്ഞു. ഇയാള്ക്കുവേണ്ടിയുള്ള തിരച്ചില് നടത്തുകയാണ്. പ്രതിയുടെ വാഹനം ഉപേക്ഷിച്ച നിലയില് കണ്ടെത്തിയിട്ടുണ്ട്.
ആഷിഷ് തന്റെ കൈയ്യില് നിന്നും 2 ലക്ഷം രൂപ വായ്പ വാങ്ങിയിരുന്നെന്നും ഇത് തിരികെ ചോദിച്ചപ്പോള് തന്നില്ലെന്നും ഗുര്പ്രീതിന്റെ ഭര്ത്താവ് ഗുര്ജീത്ത് സിങ് പറയുന്നു. പണം തിരികെ ചോദിച്ചതിനെ തുടര്ന്ന് ഭാര്യയെ ഭീഷണിപ്പെടുത്തിയിരുന്നു. ഇതുതന്നെയാകാം കൊലപാതകത്തിന് പിന്നിലെന്ന് കരുതുന്നതെന്നും ഗുര്ജീത്ത് പറഞ്ഞു.