കൈയ്യിലുള്ള പണം ഇങ്ങനെ നിക്ഷേപിക്കണം; അടുത്ത 15 വർഷം കൊണ്ട് കോടീശ്വരനാകാം

ഒരു തുടക്കക്കാരനെ സംബന്ധിച്ച് മാസം 40,000 രൂപ നിക്ഷേപിക്കാനുണ്ടെങ്കിൽ അത് വലിയൊരു അവസരമാണ്. കൈയ്യിലുള്ള പണം കൃത്യമായി പല മേഖലകളിലേക്ക് വീതിച്ചു നിക്ഷേപിക്കുന്നതിലാണ് ഒരു നിക്ഷേപകന്റെ വിജയം. വർഷങ്ങളോളം ഈ അച്ചടക്കം തുടർന്നാൽ വലിയൊരു തുക സമ്പാദിക്കാൻ സാധിക്കും. ഓഹരികളിലോ മ്യൂച്വൽ ഫണ്ടുകളിലോ സ്വർണ്ണത്തിലോ പണം നിക്ഷേപിക്കുന്നതിന് മുൻപ് നമ്മൾ ആദ്യം ചെയ്യേണ്ടത് ഒരു സുരക്ഷാ വലയം തീർക്കുക എന്നതാണ്. തുടക്കക്കാർ പലപ്പോഴും കൈയ്യിലുള്ള മുഴുവൻ തുകയും ഒന്നിച്ച് ഓഹരികളിലോ ഫണ്ടുകളിലോ നിക്ഷേപിക്കാറുണ്ട്. എന്നാൽ ഇതിലും നല്ലത് ഒരു എമർജെൻസി ഫണ്ട് ആദ്യം ഉണ്ടാക്കിയെടുക്കുന്നതാണ്.

ഈ എമർജെൻസി തുക ഒരു സേവിങ്സ് ബാങ്ക് അക്കൗണ്ടിലോ, ഷോർട്ട് ടേം ഡെപ്പോസിറ്റായോ അല്ലെങ്കിൽ ലിക്വിഡ് മ്യൂച്വൽ ഫണ്ടിലോ സൂക്ഷിക്കാവുന്നതാണ്. അടിയന്തിര ഘട്ടങ്ങളിൽ നമ്മുടെ ദീർഘകാല നിക്ഷേപങ്ങളെ തൊടാതെ മുന്നോട്ട് പോകാൻ ഇത് സഹായിക്കും. നിങ്ങൾ 20-കളിലോ 30-കളിലോ ഉള്ള ആളാണെങ്കിൽ അടുത്ത 10 വർഷത്തേക്ക് മികച്ച രീതിയിൽ ഈ തുക പലയിടങ്ങളിലായി നിക്ഷേപിക്കാം. തുകയുടെ വലിയൊരു ഭാഗം ഇക്വിറ്റി മ്യൂച്വൽ ഫണ്ടുകളിലും, ബാക്കി ഭാഗം ഡെറ്റ് ഫണ്ടുകളിലും സ്വർണ്ണത്തിലും മാറ്റിവെക്കാവുന്നതാണ്.

1. മികച്ച വളർച്ചയ്ക്കായി ഇക്വിറ്റി മ്യൂച്വൽ ഫണ്ടുകൾ

സാധാരണ സമ്പാദ്യ പദ്ധതികളെ അപേക്ഷിച്ച് ദീർഘകാലയളവിൽ ഇക്വിറ്റി മ്യൂച്വൽ ഫണ്ടുകൾ മികച്ച ലാഭം നൽകാറുണ്ട്. വിപണിയുടെ കയറ്റിറക്കങ്ങൾ നോക്കി നിക്ഷേപിക്കുന്നതിന് പകരം എല്ലാ മാസവും കൃത്യമായ തുക നിക്ഷേപിക്കുന്ന എസ്ഐപി രീതി തിരഞ്ഞെടുക്കുന്നതാണ് ഏറ്റവും ഉചിതം. ഇതിനായി ഇൻഡെക്സ് ഫണ്ടുകൾ, ഫ്ലെക്സി ക്യാപ് ഫണ്ടുകൾ, ലാർജ് ആന്റ് മിഡ്ക്യാപ് ഫണ്ടുകൾ എന്നിവ തിരഞ്ഞെടുക്കാം. രാജ്യത്തെ ഏറ്റവും വലിയ കമ്പനികളിൽ നിക്ഷേപിക്കാൻ ഇൻഡെക്സ് ഫണ്ടുകൾ സഹായിക്കുമ്പോൾ, മറ്റ് രണ്ടും മികച്ച വൈവിധ്യം നൽകും. ഏറ്റവും കൂടുതൽ ലാഭം തന്ന ഒരൊറ്റ ഫണ്ടിന് പിന്നാലെ പോകാതെ പല ഫണ്ടുകളിലായി നിക്ഷേപം വീതിക്കണം.

2. സുരക്ഷിതത്വത്തിനായി ഡെറ്റ് നിക്ഷേപങ്ങൾ

നമ്മുടെ സമ്പാദ്യത്തിലെ എല്ലാ രൂപയും ഓഹരി വിപണിയിലെ റിസ്കിലേക്ക് വിട്ടുകൊടുക്കേണ്ടതില്ല. പബ്ലിക് പ്രൊവിഡന്റ് ഫണ്ട് (PPF), ഡെറ്റ് മ്യൂച്വൽ ഫണ്ടുകൾ, ഫിക്സഡ് ഡെപ്പോസിറ്റുകൾ (FD), റിക്കറിങ് ഡെപ്പോസിറ്റുകൾ (RD) എന്നിവ നിങ്ങളുടെ പോർട്ട്ഫോളിയോയ്ക്ക് സ്ഥിരത നൽകും. ഇവയിൽ നിന്ന് വലിയ ലാഭം കിട്ടിയില്ലെങ്കിലും ഇടക്കാല സാമ്പത്തിക ആവശ്യങ്ങൾ നിറവേറ്റാനും നിക്ഷേപത്തിലെ മൊത്തത്തിലുള്ള റിസ്ക് കുറയ്ക്കാനും ഇവ സഹായിക്കും.

3. വൈവിധ്യവത്കരണത്തിന് അല്പം സ്വർണ്ണം

ഓഹരി വിപണി തകരുമ്പോൾ പലപ്പോഴും സ്വർണ്ണത്തിന്റെ വില കൂടാറുണ്ട്. അതുകൊണ്ട് വിപണിയിലെ അസ്ഥിരതകളിൽ നിന്ന് രക്ഷനേടാൻ ചെറിയൊരു തുക സ്വർണ്ണത്തിൽ നിക്ഷേപിക്കുന്നത് നല്ലതാണ്. ഗോൾഡ് ഇടിഎഫുകൾ (Gold ETFs), ഗോൾഡ് മ്യൂച്വൽ ഫണ്ടുകൾ അല്ലെങ്കിൽ സോവറിൻ ഗോൾഡ് ബോണ്ടുകൾ എന്നിവ വഴി സ്വർണ്ണത്തിൽ നിക്ഷേപിക്കാം. ഓഹരികളെ മാത്രം ആശ്രയിച്ചു നിൽക്കുന്നത് ഒഴിവാക്കുക എന്നതാണ് ഇതിന്റെ പ്രധാന ലക്ഷ്യം.

4. എല്ലാ വർഷവും നിക്ഷേപ തുക വർദ്ധിപ്പിക്കുക

നിങ്ങളുടെ വരുമാനം കൂടുന്നതിനനുസരിച്ച് നിക്ഷേപ തുകയും വർദ്ധിപ്പിക്കുക എന്നതാണ് സമ്പത്ത് വളർത്താനുള്ള എളുപ്പവഴി. ഉദാഹരണത്തിന്, ഇന്ന് മാസം 40,000 രൂപ നിക്ഷേപിക്കുന്ന ഒരാൾ എല്ലാ വർഷവും ആ തുകയിൽ 10 മുതൽ 20 ശതമാനം വരെ വർദ്ധനവ് വരുത്തിയാൽ കോമ്പൗണ്ടിങ്ങിന്റെ ശക്തിയിലൂടെ അടുത്ത 15-20 വർഷത്തിനുള്ളിൽ കോടികളുടെ സമ്പാദ്യം ഉണ്ടാക്കാൻ സാധിക്കും.

വിപണി താഴോട്ട് പോകുമ്പോൾ എസ്ഐപി നിർത്തുക, ഒരു എമർജെൻസി ഫണ്ട് ഇല്ലാതെ നിക്ഷേപിക്കുക, ഒരേതരം ഒട്ടനവധി ഫണ്ടുകൾ കൈവശം വെക്കുക തുടങ്ങിയ തെറ്റുകൾ വരുത്തരുത്. വിപണിയുടെ നല്ല കാലത്തും മോശം കാലത്തും ഒരേപോലെ അച്ചടക്കത്തോടെ നിക്ഷേപം തുടരുന്നവർക്കാണ് ദീർഘകാലത്തിൽ വലിയ നേട്ടമുണ്ടാക്കാൻ സാധിച്ചിട്ടുള്ളത്.