ജാർഖണ്ഡിൽ ജെഎംഎം-കോൺഗ്രസ് സർക്കാർ വീഴും; ഭരണം ബിജെപിക്കെന്ന് സർവ്വെ

റാഞ്ചി: ജാർഖണ്ഡ് നിയമസഭ തിരഞ്ഞെടുപ്പിൽ ഇത്തവണ എൻ ഡി എ കൂറ്റൻ വിജയം നേടുമെന്ന് മെട്രിസ് സർവ്വെ. ആകെയുള്ള 81 സീറ്റുകളിൽ 47 സീറ്റുകൾ വരെയാണ് ബി ജെ പി സഖ്യത്തിന് സർവ്വെ പ്രവചിക്കുന്നത്. കേവല ഭൂരിപക്ഷത്തിന് 41 സീറ്റുകളാണ് ആവശ്യം.

ജെ എം എം -കോൺഗ്രസ് സഖ്യത്തിന് കനത്ത പരാജയമാണ് സർവ്വെ പ്രവചിക്കുന്നു. 20-30 സീറ്റുകളിലേക്ക് സഖ്യം ഒതുങ്ങും. മറ്റ് പാർട്ടികൾക്ക് 4 സീറ്റുകൾ വരെ ലഭിക്കുമെന്നും സർവ്വെ പറയുന്നു. കോൺഗ്രസ് സഖ്യത്തിന് 38 ശതമാനം സീറ്റുകളും സർവ്വെ പ്രവചിക്കുന്നുണ്ട്.

പുറത്തുവന്ന അഞ്ച് എക്സിറ്റ് പോളുകളിൽ നാല് സർവ്വെകളിലും ബി ജെ പി സഖ്യത്തിനാണ് വിജയം പ്രവചിക്കുന്നത്. പീപ്പിൾ പാർട്ടി (എൻ ഡി എ- 44-51 ഇന്ത്യ സഖ്യം- 25-37 മറ്റുള്ളവർ- 0), ചാണക്യ സ്ട്രാറ്റജീസ് ( 45-50, ഇന്ത്യ സഖ്യം- 35-38, മറ്റുള്ളവർ 3-5), ജെ വി സി (40-44, ഇന്ത്യ സഖ്യം -30-40, മറ്റുള്ളവർ 1) എന്നീ സർവ്വെകളാണ് ബി ജെ പിക്ക് സാധ്യത കൽപ്പിക്കുന്നത്. ആക്സിസ്-മൈ ഇന്ത്യ സർവ്വെയാണ് ഇന്ത്യ സഖ്യത്തിന് വിജയം പ്രവചിക്കുന്നത്. 53 വരെ സീറ്റുകൾ വരെ നേടുമെന്നാണ് സർവ്വെ പറയുന്നത്. 25 സീറ്റുകൾ മാത്രമാണ് ബി ജെ പി സഖ്യത്തിന് പ്രവചിക്കുന്നത്. മറ്റ് പാർട്ടികൾക്ക് 3 സീറ്റുകൾ വരെ പ്രവചിക്കുന്നുണ്ട്.

2019 ൽ ജെ എം എം -കോൺഗ്രസ് സഖ്യത്തിന് 47 സീറ്റുകളാണ് ലഭിച്ചത്. കോൺഗ്രസിന് 16 ജെ എം എം ന് 30 സീറ്റുകളുമാണ് ലഭിച്ചത്. ആർ ജെ ഡിക്ക് 1 സീറ്റും ലഭിച്ചു. ബി ജെ പി സഖ്യത്തിന് 25 സീറ്റുകളാണ് ലഭിച്ചത്. സഖ്യകക്ഷിയായ ഓൾ ജാർഖണ്ഡ് സ്റ്റുഡൻസ് യൂണിയനും രണ്ട് സീറ്റുകൾ ലഭിച്ചു. എന്‍ സി പി 1, സ്വതന്ത്രർ 5 എന്നിങ്ങനെയായിരുന്നു മറ്റുള്ളവരുടെ സീറ്റ് നില.

ഇത്തവണയും ആദിവാസി വോട്ടുകളിൽ തന്നെയാണ് ജെ എം എം പ്രതീക്ഷ പുലർത്തുന്നത്. മുൻ മുഖ്യമന്ത്രി ചംപയ് സോറന്റെ ബി ജെ പിയിലേക്കുള്ള വരവും ഹേമന്ത് സോറന്റെ അറസ്റ്റുമെല്ലാം ഗുണകരമാകുമെന്നാണ് ബി ജെ പി പ്രതീക്ഷ.