അഞ്ച് വയസുകാരിയെ കാണാതായി: മുംബൈയില് നിന്ന് കാണാതായ കുട്ടിയുടെ മൃതദേഹം ഗുജറാത്തില്!!
മുംബൈ: മുംബൈയില് നിന്ന് തട്ടിക്കൊണ്ടുപോയ അഞ്ച് വയസ്സുകാരിയുടെ മൃതദേഹം ശുചിമുറിയില്. ഗുജറാത്തിലെ നവ്സാരി റെയില്വേ സ്റ്റേഷനിലെ ശുചിമുറിയില് നിന്നാണ് മൃതദേഹം കണ്ടെത്തിയത്. മുംബൈയിലെ നല്ലസ്പൊരയില് നിന്ന് ശനിയാഴ്ചയാണ് അഞ്ച് വയസ്സുകാരിയായ പെണ്കുട്ടിയെ തട്ടിക്കൊണ്ടുപോയത്. അഞ്ജലി സരോജാണ് മരിച്ച പെണ്കുട്ടിയെന്ന് കണ്ടെത്തിയിട്ടുണ്ട്. നല്ലാസ്പൊരയില് രക്ഷിതാക്കള്ക്കൊപ്പം കഴിഞ്ഞിരുന്ന പെണ്കുട്ടി നഴ്സറി വിദ്യാര്ത്ഥിയായിരുന്നു.
വീടിന് പുറത്ത് കളിച്ചുകൊണ്ടിരിക്കുകയായിരുന്ന പെണ്കുട്ടിയെ കാണാതാവുകയായിരുന്നു എന്നാണ് മാധ്യമറിപ്പോര്ട്ടുകള്. അജ്ഞാതയായ വനിതയാണ് കുഞ്ഞിനെ തട്ടിക്കൊണ്ടുപോയതെന്നാണ് കണ്ടെത്തിയിട്ടുള്ളത്. രാത്രി 8.45 ആയിട്ടും കുട്ടി തിരിച്ചെത്താത്തതിനെ തുടര്ന്ന് രക്ഷിതാക്കള് വ്യാപകമായി തിരച്ചില് നടത്തിയെങ്കിലും കുഞ്ഞിനെ കണ്ടെത്താന് കഴിഞ്ഞില്ല. കണ്ടെത്താന് കഴിയാത്തതിനെ തുടര്ന്ന് പിറ്റേദിവസമാണ് രക്ഷിതാക്കള് പരാതിയുമായി പോലീസിനെ സമീപിച്ചത്. മറ്റൊരു സ്ത്രീയ്ക്കൊപ്പം ഈ പെണ്കുട്ടി പോകുന്നത് കണ്ടതായി ചില കുട്ടികളും പറയുന്നുണ്ട്. കഴുത്തറുത്ത് കൊലപ്പെടുത്തിയ നിലയിലാണ് പെണ്കട്ടിയെ ശുചിമുറിയില് നിന്ന് കണ്ടെത്തുന്നത്. നവ്സാരി റെയില് വേ സ്റ്റേഷനിലെ ഒന്നാമത്തെ പ്ലാറ്റ്ഫോമിലെ ശുചിമുറിയില് നിന്നാണ് കുഞ്ഞിന്റെ മൃതദേഹം കണ്ടെടുക്കുന്നത്.
സംഭവത്തോടെ കുറ്റവാളിയെ കണ്ടെത്തുന്നതിന് പൊലീസ് വ്യാപകമായി തിരച്ചില് ആരംഭിച്ചിട്ടുണ്ട്. ബോറിവ് ലി, വിരാര്, ദഹനു എന്നീ സ്റ്റേഷനുകളിലെ സിസിടിവി ദൃശ്യങ്ങള് പരിശോധിച്ച പോലീസ് കുറ്റവാളിയുടെ ഛായാചിത്രവും പുറത്തുവിട്ടിട്ടുണ്ട്. എന്നാല് കുറ്റവാളിയുടെ ഛായാചിത്രം ഉപയോഗിച്ച് കുറ്റവാളിയെ തിരിച്ചറിയാന് കുട്ടിയുടെ പിതാവിന് കഴിഞ്ഞിട്ടില്ല.