രാഷ്ട്രപതി ദ്രൗപതി മുർമുവിനെ കുറിച്ചുള്ള പരാമർശം; ഖാർഗെയ്ക്കും കെജ്രിവാളിനുമെതിരെ പരാതി

ദില്ലി: പാർലമെന്റ് ഉദ്ഘാടന വിവാദവുമായി ബന്ധപ്പെട്ട് രാഷ്ട്രപതി ദ്രൗപതി മുർമുവിനെതിരെ പ്രകോപനപരമായ പരാമർശങ്ങൾ നടത്തിയെന്നാരോപിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ, ദില്ലി മുഖ്യമന്ത്രി അരവിന്ദ് കെജ്രിവാൾ തുടങ്ങിയ നേതാക്കൾക്കെതിരെ പരാതി. രാഷ്ട്രപതിയുടെ ജാതിയെ കുറിച്ചുള്ള നേതാക്കളുടെ പരാമർശങ്ങൾ സമുദായങ്ങൾക്കിടയിൽ ശത്രുത ഉണ്ടാക്കാനും കേന്ദ്രസർക്കാരിൻ മേൽ അവിശ്വാസം സൃഷ്ടിക്കാനും കാരണമായെന്ന് ചൂണ്ടിക്കാട്ടിയാണ് പരാതി.

വിനീത് ജിന്റാൾ എന്നയാളാണ് ദില്ലി പോലീസിൽ പരാതി നൽകിയിരിക്കുന്നത്. രാഷ്ട്രപതിയുടെ ജാതി കാരണമാണ് കേന്ദ്രസർക്കാർ അവരെ പാർലമെന്റ് ഉദ്ഘാടനത്തിന് ക്ഷണിക്കാതിരുന്നതെന്ന തരത്തിലുള്ള തെറ്റിധാരണ ഉണ്ടാക്കാൻ കെജരിവാളിന്റേയും ഖാർഗെയുടേയും പരാമർശങ്ങൾ കാരണമായെന്ന് പരാതിയിൽ ചൂണ്ടിക്കാട്ടുന്നു. 'നേതാക്കളുടെ പ്രസ്താവനകൾ വാർത്തകളിലും സോഷ്യൽ മീഡിയകളിലും പ്രചരിക്കുന്നുണ്ട്. രാഷ്ട്രപതി ഉൾപ്പെട്ട ആദിവാസി വിഭാഗത്തെ പ്രകോപിപ്പിക്കാൻ നേതാക്കളുടെ പരാമർശങ്ങൾ കാരണമാകും', പരാതിയിൽ പറയുന്നു.

'രാഷ്ട്രീയ നേട്ടങ്ങൾക്ക് വേണ്ടി ഭരണഘടനാ പദവികളെ അപമാനിക്കുന്ന നിലയിലേക്ക് രാഷ്ട്രീയ നേതാക്കളെ കൂപ്പുകുത്താൻ അനുവദിക്കരുത്.മാത്രമല്ല തിരഞ്ഞെടുക്കപ്പെട്ട സർക്കാരിൻ മേൽ അവിശ്വാസവും ഭയവും സൃഷ്ടിക്കാൻ ഇത്തരത്തിലുള്ള ആരോപണങ്ങൾ കാരണമാകും. ഇവ ഐപിസിസി 121,153A,505,34 വകുപ്പുകൾ പ്രകാരം കുറ്റകരമാണ്', വിനീത് പരാതിയിൽ പറഞ്ഞു.

പുതിയ പാർലമെന്റ് മന്ദിരത്തിന്റെ ഉദ്ഘാടനത്തിന് രാഷ്ട്രപതി ദ്രൗപദി മുർമുവിനെ ഒഴിവാക്കിയതിൽ കടുത്ത വിമർശനമായിരുന്ന കോൺഗ്രസ് അധ്യക്ഷൻ ഖാർഗെ ഉന്നയിച്ചത്. തെരഞ്ഞെടുപ്പ് രാഷ്ട്രീയത്തിന് വേണ്ടി മാത്രമാണ് മോദി ദളിത് സമുദായത്തിൽ നിന്നും രാഷ്ട്രപതിയെ തെരഞ്ഞെടുത്തത് എന്നായിരുന്നു ഖാർഗെയുടെ വിമർശനം. രാജ്യത്തെ എസ് സി, എസ് ടി സമൂഹം ചോദിക്കുന്നത് മുർമുവിന് ക്ഷണം ലഭിക്കാത്തത് അശുഭകരമായി കാണുന്നത് കൊണ്ടാണോയെന്നായിരുന്നു കെജ്രിവാളിന്റെ പ്രതികരണം.

അതേസമയം വിവാദങ്ങൾക്കിടെ പുതിയ പാർലമെന്റ് മന്ദിരം ഞായറാഴ്ച പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ഉച്ചയ്ക്ക് 12 നാണ് ചടങ്ങ്. ചടങ്ങിൽ പ്രധാനമന്ത്രിക്കൊപ്പം ലോക്സഭ സ്പീക്കർ ഓം ബിർലയും പങ്കെടുക്കും. എംപിമാർ, മുൻ പാർലമെൻറ് സഭാധ്യക്ഷന്മാർ, മുഖ്യമന്ത്രിമാർ, സിനിമ താരങ്ങൾ, തുടങ്ങിയ നിരവധി പ്രമുഖരെ ചടങ്ങിലേക്ക് ക്ഷണിച്ചിട്ടുണ്ട്.

എന്നാൽ പ്രധാനമന്ത്രി ചടങ്ങ് ഉദ്ഘാടനം ചെയ്യുന്നതിൽ പ്രതിഷേധിച്ച് 21 പ്രതിപക്ഷ പാർട്ടികൾ ചടങ്ങ് ബഹിഷ്കരിക്കുമെന്ന് അറിയിച്ചിട്ടുണ്ട്. കോണ്‍ഗ്രസ്, തൃണമൂല്‍ കോണ്‍ഗ്രസ്, സി പി എം, സി പി ഐ, എന്‍സി പി, ആർ ജെ ഡി, എ എ പി, ജെ ഡി യു തുടങ്ങിയ കക്ഷികളാണ് ചടങ്ങ് ബഹിഷ്കരിച്ചത്.

English summary

parliament inaugration; Reference to President Draupadi Murmu; Complaint against Kharge and Kejriwal