രാഖി സാവന്തും തിരഞ്ഞെടുപ്പില്‍ മത്സരിക്കുന്നു

മുംബൈ: അരവിന്ദ് കെജ്രിവാളിനെക്കാള്‍ ഭേദമാണോ ബോളിവുഡ് ഐറ്റം ഗേള്‍ രാഖി സാവന്ത്? വിവാദങ്ങളുടെ കാര്യത്തില്‍ രണ്ടുപേരും ഒരു പോലെയാണ് എന്ന് വേണമെങ്കില്‍ പറയാം എന്നൊക്കെ കഷ്ടപ്പെട്ട് മറുപടി പറയാന്‍ വരട്ടെ, കെജ്രിവാളിനെക്കാള്‍ നല്ല രാഷ്ട്രീയക്കാരിയാകാന്‍ തനിക്ക് കഴിയും എന്നാണ് രാഖി സാവന്ത് പറയുന്നത്. വെറുതെ പറയുകയല്ല, താനത് കാണിച്ചുതരാമെന്നും താരം വെല്ലുവിളിക്കുന്നുണ്ട്.

ഇത് തന്റെ മാത്രം അഭിപ്രായമല്ല, ശിവസേന തലവന്‍ ഉദ്ധവ് താക്കറെയ്ക്കും ഈ തോന്നലുണ്ട് എന്നും രാഖി പറയുന്നു. ഉദ്ധവ് താക്കറെ തനിക്ക് സഹോദരനെപോലെയാണ്. കെജ്രിവാളിനെക്കാള്‍ നല്ല രാഷ്ട്രീയക്കാരിയാകാന്‍ തനിക്ക് കഴിയും എന്നാണ് അദ്ദേഹം കരുതുന്നത്. നേരത്തെ രാഷ്ട്രീയത്തിലെ ഐറ്റം ഗേള്‍ എന്ന് കെജ്രിവാള്‍ രാഷ്ട്രീയത്തെ എഴുത്തുകാരന്‍ ചേതന്‍ ഭഗത് വിശേഷിപ്പിച്ചിരുന്നു.

മുംബൈ നോര്‍ത്ത് വെസ്റ്റില്‍ നിന്നും ലോക്‌സഭയിലേക്ക് മത്സരിക്കുന്ന കാര്യം പ്രഖ്യാപിക്കുകയായിരുന്നു വിവാദ നായികയായ രാഖി സാവന്ത്. സ്വതന്ത്രയായാണ് രാഖി ഇത്തവണ തിരഞ്ഞെടുപ്പില്‍ മത്സരിക്കുന്നത്. ഒരു പ്രമുഖ രാഷ്ട്രീയ പാര്‍ട്ടി തനിക്ക് പിന്തുണ വാഗ്ദാനം ചെയ്തിട്ടുണ്ട് എന്നും രാഖി പറയുന്നു. ബോളിവുഡിലെ കാന്താരിയായ താന്‍ നേതാക്കള്‍ക്കിടയില്‍ കുറച്ച് എരിവ് പകരാന്‍ വേണ്ടിയാണ് മത്സരിക്കുന്നതെന്നും രാഖി പറയുന്നു.

ഗുല്‍ പനാഗ്, കിരണ്‍ ഖേര്‍, നഗ്മ, രമ്യ തുടങ്ങിയ നടിമാര്‍ക്ക് പിന്നാലെയാണ് രാഖി സാവന്തും ലോക്‌സഭ തിരഞ്ഞെടുപ്പില്‍ മത്സരിക്കാനെത്തുന്നത്. കോണ്‍ഗ്രസിലെ ഗുരുദാസ് കാമത്ത്, ശിവസേനയിലെ ഗജാനന്‍ കീര്‍തികാര്‍, എം എന്‍ എസിലെ മഹേഷ് മഞ്‌ജ്രേക്കര്‍, ആപ്പിലെ മായക് ഗാന്ധി എന്നിവരാണ് മുംബൈ നോര്‍ത്ത് വെസ്റ്റിലെ മറ്റ് സ്ഥാനാര്‍ഥികള്‍.

English summary

Rakhi Sawant to contest from Mumbai North-West