ഭര്‍ത്താവിനെ കൊന്നയാളെ കോടതി വെറുതെവിട്ടു, ജനമധ്യത്തില്‍ ഘാതകനെ ഭാര്യ കൊന്നു

കോയമ്പത്തൂര്‍: ഭര്‍ത്താവിനെ തലയ്ക്കടിച്ച് കൊന്നയാളെ കോടതി വെറുതെ വിട്ടു. ജനക്കൂട്ടം നോക്കി നില്‍ക്കെ പ്രതിയ കൊല്ലപ്പെട്ടയാളുടെ ഭാര്യ തലയ്ക്കടിച്ച് കൊന്നു. കോയമ്പത്തൂര്‍ പെരിനായ്ക്കര്‍ സ്വദേശി രവികുമാറിനെയാണ് (50) കൊലപ്പെടുത്തിയത്. സുഗന്ധി എന്ന സ്ത്രീയാണ് ഭര്‍ത്താവിന്റെ ഘാതകനെ ജനമധ്യത്തില്‍ കൊന്നത്.

രവികുമാറിന്റെ സുഹൃത്തായിരുന്ന രങ്കസ്വാമിയുടെ ഭാര്യയാണ് ജനക്കൂട്ടത്തിന് മുന്നില്‍ വച്ച് പ്രതികാരം തീര്‍ത്തത്. രങ്കസ്വാമിയെ കൊന്ന കേസില്‍ രവി കുമാറിനെ കോടതി വെറുതെ വിട്ടിരുന്നു. രങ്കസ്വാമിയും രവികുമാറും അടുത്ത സുഹൃത്തുക്കളായിരുന്നു. 2015 ജൂണില്‍ ഇരുവരും മദ്യപിയ്ക്കുന്നതിനിടെ തര്‍ക്കമുണ്ടായി.

ഇതിന് ശേഷം ഉറങ്ങിക്കിടന്ന രങ്കസ്വാമിയെ രവികുമാര്‍ അമ്മിക്കല്ല് കൊണ്ട് തലയ്ക്കടിച്ച് കൊന്നു. കേസില്‍ ഈ മാസം 14 ന് വിധി വന്നപ്പോള്‍ സാക്ഷികളില്ലാത്തതിനാല്‍ രവികുമാറിനെ വെറുതെ വിട്ടിരുന്നു. ഇതിന് ശേഷം രണ്ട് തവണ രവി കുമാര്‍ സുഗന്ധിയുമായി വഴക്കിട്ടിരുന്നു. കഴിഞ്ഞ ദിവസം കാളിപാളയം ബസ് സ്റ്റാന്‍ഡിന് സമീപം രവി കുമാറിനെ സുഗന്ധി കല്ലുകൊണ്ട് തലയ്ക്കടിച്ച് വീഴ്ത്തി കൊന്നു. ഇവര്‍ റിമാന്‍ഡിലാണ്.

English summary

Woman avenges husband's death, murders suspect