'പുള്ളിക്കാരന്‍ മക്കളായി അംഗീകരിച്ചു, പിന്നെ നിങ്ങള്‍ക്ക് എന്താ പ്രോബ്‌ളം'? നടൻ രമേശ് വലിയശാലയുടെ മകൾ

Published: Saturday, September 18, 2021, 20:30 [IST]

തിരുവനന്തപുരം: ഏതാനും ദിവസങ്ങള്‍ക്ക് മുന്‍പാണ് നടന്‍ രമേശ് വലിയശാലയെ വീട്ടില്‍ തൂങ്ങി മരിച്ച നിലയില്‍ കണ്ടെത്തിയത്. അപ്രതീക്ഷിതമായ മരണം സിനിമ-സീരിയല്‍ ലോകത്തെ ഞെട്ടിച്ചിരുന്നു. കണ്ണന്‍ താരമക്കുളത്തിന്റെ വരാല്‍ എന്ന ചിത്രത്തില്‍ അഭിനയിച്ച് കൊണ്ടിരിക്കുകയായിരുന്നു രമേശ് വലിയശാല.

രമേശ് വലിയശാലയുടെ മരണത്തില്‍ ബന്ധുക്കള്‍ ദുരൂഹത ഉന്നയിച്ചിരുന്നു. അദ്ദേഹത്തിന്റെ ആദ്യഭാര്യ ഗീതാകുമാരി മൂന്ന് വര്‍ഷം മുന്‍പാണ് അര്‍ബുദം ബാധിച്ച് മരണപ്പെട്ടത്. കാനഡയിലുളള മകന്‍ ഗോകുല്‍ രമേശ് മരണത്തില്‍ സംശയം ഉന്നയിച്ചിരുന്നു. പിന്നാലെ രണ്ടാം വിവാഹത്തിലെ മകള്‍ പ്രതികരണവുമായി രംഗത്ത് എത്തി.

സെപ്റ്റംബര്‍ 10 വെളളിയാഴ്ച രാത്രി ഒന്‍പതരയോടെയാണ് നടന്‍ രമേശ് വലിയശാലയെ വീട്ടില്‍ മരിച്ച നിലയില്‍ കണ്ടെത്തിയത്. മരണത്തിന്റെ തലേ ദിവസം ഒരു വിവാഹ ചടങ്ങിലടക്കം രമേശ് പങ്കെടുത്തിരുന്നു. വരാല്‍ എന്ന ചിത്രത്തില്‍ അഭിനയിച്ച് വീട്ടിലേക്ക് തിരികെ എത്തിയിട്ട് രണ്ട് ദിവസം മാത്രമേ ആയിട്ടുണ്ടായിരുന്നുളളൂ. കുടുംബ പ്രശ്‌നങ്ങളുളളതായി അദ്ദേഹം സുഹൃത്തുക്കളോടക്കം പറഞ്ഞിരുന്നതായാണ് പോലീസ് പറയുന്നത്.

ആരെയാണീ നോക്കുന്നത്? ദിലീപിന്റെയും കാവ്യയുടെയും പുതിയ ചിത്രങ്ങൾ ഏറ്റെടുത്ത് ആരാധകർ

അച്ഛന്‍ ആത്മഹത്യ ചെയ്യുമെന്ന് വിശ്വസിക്കാന്‍ സാധിക്കില്ലെന്നാണ് മകന്‍ ഗോകുല്‍ രമേശ് പ്രതികരിച്ചത്. പിന്നാലെ രമേശ് വലിയശാലയുടെ മകള്‍ ശ്രുതി എംഎസ് പ്രതികരണവുമായി രംഗത്ത് വന്നു. മരണത്തിന്റെ തലേദിവസം വീട്ടില്‍ ബഹളമുണ്ടായിരുന്നു എന്നുളള പ്രചാരണം ശ്രുതി നിഷേധിച്ചു. മരണത്തിന് തലേദിവസം എല്ലാവരും ഒരുമിച്ച് പങ്കെടുത്ത വിവാഹ പാര്‍ട്ടിയുടെ ചിത്രവും ശ്രുതി പങ്കുവെച്ചു. അതിന് ശേഷം വീണ്ടും ഫേസ്ബുക്കില്‍ ശ്രുതി പോസ്റ്റിട്ടിരിക്കുകയാണ്.

ഓണത്തിന് രമേശ് വലിയ ശാല ഒരു യൂട്യൂബ് ചാനലിന് നൽകിയ അഭിമുഖവും ശ്രുതി പങ്കുവെച്ചിട്ടുണ്ട്: '' നിങ്ങളുടെ സംശയങ്ങളുടെ ഉത്തരം ഇതില്‍ ഉണ്ട്. ഇതില്‍ നിങ്ങള്‍ പറയുന്ന രമേശ് തന്നെ പറയുന്നുണ്ട് ഞാന്‍ ആളുടെ മകള്‍ ആണെന്നു. ഇതില്‍ കൂടുതല്‍ എന്ത് തെളിവാണ് ഞാന്‍ നിങ്ങള്‍ക്ക് സബ്മിറ്റ് ചെയ്യേണ്ടത്. എന്റെ ആധാര്‍ ആണോ ഐഡി കാര്‍ഡ് ആണോ. അതിലും ഫാദറിന്റെ ഓപ്ഷനില്‍ അച്ഛന്റെ പേരാണ്.. അച്ഛന്റെ സ്വയം ഇഷ്ടപ്രകാരം അച്ഛന്‍ മാറ്റിയതാണ് പേര്.

'പുള്ളിക്കാരന്‍ മക്കളായി അംഗീകരിച്ചിട്ടുണ്ട്. പിന്നെ നിങ്ങള്‍ക്ക് എന്താ പ്രോബ്‌ളം. ഇനി ആര്‍ക്കാണ് മകന്‍ മാത്രമേ ഉളളൂ എന്നൊരു സംശയം ഉളളത്. ജന്‍മം കൊണ്ട് മാത്രമേ അച്ഛന്‍ ആകാന്‍ കഴിയുകയുളളുവോ. കര്‍മം കൊണ്ട് പറ്റില്ലേ. കര്‍മം കൊണ്ട് എന്റെ സ്വന്തം, ഞാന്‍ ഏറെ ഇഷ്ടപ്പെടുന്ന അച്ഛനാണ്. എന്റെ അമ്മ കല്യാണം കഴിച്ച ആളാണ്. അപ്പോ അച്ഛന്‍ എന്നല്ലേ'

അതില്‍ രണ്ടാനച്ഛന്‍ ആദ്യത്തെ അച്ഛന്‍ എന്നുണ്ടോ. എന്തായാലും ഞാന്‍ രണ്ടാനച്ഛനായി കണ്ടിട്ടില്ല. എന്റെ സ്വന്തം അച്ഛന്‍. എന്റെ കൂട്ടുകാരനായിട്ടേ കണ്ടിട്ടുളളൂ. ഇനി ആര്‍ക്കെങ്കിലും ഡൗട്ട് ഉണ്ടോ. പുള്ളിക്കാരന്‍ പബ്ലിക്കായി അംഗീകരിച്ചതാണ്. അതിന്റെ തെളിവ് ആണ്. ഇനി എന്തേലും ഡൗട്ട് ഉണ്ടേല്‍ പറഞ്ഞാ മതി. ബാക്കി തെളിവുകളും തരാം.