തിരുവനന്തപുരത്ത് വനിത കണ്ടക്ടര്‍ക്ക് നേരെ ആക്രമണം

തിരുവനന്തപുരം: തലസ്ഥാന നഗരത്തില്‍ വനിത കണ്ടക്ടര്‍ക്ക് നേരെ ആക്രമണം എന്ന് പരാതി. കെഎസ്ആര്‍ടിസി ബസ്സിലെ കണ്ടക്ടറായ രേഖയാണ് ആക്രണത്തിന് ഇരയായത്.

കിഴക്കേകോട്ടയില്‍ നിന്ന് വെങ്ങാനൂരിലേക്ക് പോവുകയായിരുന്ന ബസ്സിലെ കണ്ടക്ടറാണ് രേഖ. ഡ്യൂട്ടിക്കിടെയായിരുന്നു രേഖയെ പുരുഷ യാത്രക്കാരന്‍ ആക്രമിച്ചത്.

സ്ത്രീകള്‍ക്കിടയില്‍ നിന്നിരുന്ന യത്രക്കാരനോട് മാറി നില്‍ക്കാന്‍ ആവശ്യപ്പെട്ടതാണത്രെ അയാളെ ചൊടിപ്പിച്ചത്. ഇയാള്‍ സ്ത്രീകളോട് അപമര്യാദയായി പെരുമാറിയതായും റിപ്പോര്‍ട്ടുകളുണ്ട്. ഇത് ചോദ്യം ചെയ്തതോടെ അക്രമി രേഖക്ക് നേരെ തിരിയുകയായിരുന്നു.

ബസ്സിനുള്ളില്‍ വച്ച് അക്രമി രേഖയെ ചവിട്ടി വീഴ്ത്തി. പിന്നീട് ബസ് നിര്‍ത്തിയ ഉടന്‍ പുറത്തിറങ്ങി. എന്നിട്ടും അരിശം തീരാതെ കല്ലെടുത്ത് ബസ്സിനുള്ളിലേക്ക് എറിയുകയും ചെയ്തു. കല്ല് കൊണ്ട് രണ്ട് സ്ത്രീ യാത്രക്കാര്‍ക്ക് പരിക്കേറ്റു.

അക്രമി ആരാണെന്ന് ഇതുവരെ തിരിച്ചറിഞ്ഞിട്ടില്ല. തിരുവനന്തപുരം ഫോര്‍ട്ട് പോലീസ് സ്‌റ്റേഷനില്‍ രേഖ ആക്രമണം സംബന്ധിച്ച് പരാതി നില്‍കിയിട്ടുണ്ട്. ബസ്സില്‍ നിന്ന് ഇറങ്ങിപ്പോയ അക്രമിയെ എങ്ങനെ കണ്ടുപിടിക്കും എന്ന ആശങ്കയിലാണ് ഇപ്പോള്‍ പോലീസ്‌

English summary

Attack against woman conductor at Thiruvananthapuram