പ്രചരിക്കുന്നത് വയനാട്ടിലെ കണക്കുകളല്ല; അര്ഹതപ്പെട്ട സഹായം നിഷേധിക്കാനുള്ള ശ്രമമെന്ന് മുഖ്യമന്ത്രി
തിരുവനന്തപുരം: വയനാട് ദുരന്തത്തില് ചെലവഴിച്ച തുകയെന്ന പേരിലുള്ള കണക്ക് വസ്തുതാ വിരുദ്ധമെന്ന് മുഖ്യമന്ത്രി പിണറായി വിജയന്. ദുരന്തവുമായി ബന്ധപ്പെട്ട് അധിക സഹായം തേടി കേന്ദ്ര സര്ക്കാരിന് സമര്പ്പിച്ച നിവേദനത്തിലുള്ള വിവരങ്ങളാണിതെന്ന് മുഖ്യമന്ത്രി വ്യക്തമാക്കി. മുഖ്യമന്ത്രിയുടെ ഓഫീസിന്റെ വാര്ത്താക്കുറിപ്പിലാണ് കണക്കുകളെ തള്ളിയിരിക്കുന്നത്.
ഇപ്പോള് പുറത്തുവന്നിരിക്കുന്ന ഈ തെറ്റിദ്ധരിപ്പിക്കുന്ന റിപ്പോര്ട്ട് വയനാട് ദുരന്തത്തില് കേന്ദ്ര സഹായം ലഭ്യമാക്കാനുള്ള സംസ്ഥാന സര്ക്കാരിന്റെ ശ്രമങ്ങള്ക്ക് തുരങ്കം വെക്കുന്നതാണെന്നും മുഖ്യമന്ത്രി കുറ്റപ്പെടുത്തി. ദുരന്തത്തില് അടിയന്തര അധിക സഹായം ആവശ്യപ്പെട്ട് സംസ്ഥാന സര്ക്കാര് കേന്ദ്ര സര്ക്കാരിന് മെമ്മോറാണ്ടം സമര്പ്പിച്ചിരുന്നു. അതില് വിവിധ വിഷയങ്ങള്ക്ക് ആവശ്യമായ ചെലവിന്റെ പ്രാഥമിക കണക്കുകള് വ്യക്തമാക്കിയിട്ടുണ്ട്. എന്നാല് ആ കണക്കുകളെ ദുരന്തമേഖലയില് ചെലവഴിച്ച തുക എന്ന തരത്തിലാണ് മാധ്യമങ്ങള് ഇപ്പോള് പ്രചരിപ്പിക്കുന്നത്. ഇത് അവാസ്തവമാണ്.
ദേശീയ ദുരന്ത പ്രതികരണ നിധിയുടെ മാനദണ്ഡങ്ങള്ക്ക് അനുസൃതമായ തയ്യാറാക്കിയ മെമ്മോറാണ്ടത്തിലെ ആവശ്യങ്ങളെയാണ് ഇങ്ങനെ തെറ്റായി അവതരിപ്പിച്ചിരിക്കുന്നത്. മാനദണ്ഡമനുസരിച്ച് പ്രതീക്ഷിത ചെലവുകളും വരാനിരിക്കുന്ന അധിക ചെലവുകളും ഉള്പ്പെടുത്തി കേന്ദ്ര സര്ക്കാരിന് സമര്പ്പിച്ച മെമ്മോറാണ്ടം ഹൈക്കോടതിയിലും നല്കിയിട്ടുണ്ടെന്ന് മുഖ്യമന്ത്രി വ്യക്തമാക്കി.
ഹൈക്കോടതിയില് നല്കിയ മെമ്മോറാണ്ടത്തെ ഉദ്ധരിച്ച് കൊണ്ട് തെറ്റായ രീതിയില് സംസ്ഥാന സര്ക്കാര് കണക്കുകളും ബില്ലുകളും പെരുപ്പിച്ച് കാണിച്ചു എന്നുള്ള പ്രചാരണം സംസ്ഥാനത്തിന്റെ താല്പര്യങ്ങള്ക്ക് എതിരാണ്. വയനാടിന്റെ പുനര്നിര്മാണവുമായി ബന്ധപ്പെട്ട് സംസ്ഥാനം ആവിഷ്കരിക്കുന്ന പ്രവര്ത്തനങ്ങളെ തകര്ക്കാന് ഉദ്ദേശിച്ചുള്ളതാണ്. ദുരന്തബാധിതര്ക്ക് അര്ഹതപ്പെട്ട സഹായം നിഷേധിക്കാനുള്ള ഗൂഢനീക്കമായി വേണം ഇതിനെ കാണുവാനെന്നും മുഖ്യമന്ത്രി പറഞ്ഞു.
ചൂരല്മല ദുരന്തവുമായി ബന്ധപ്പെട്ട ഹര്ജിയില് ഹൈക്കോടതി പുറപ്പെടുവിച്ച ഉത്തരവില് കാര്യങ്ങള് കൃത്യമായി വിശദീകരിക്കുന്നുണ്ട്. ഉത്തരവിന്റെ അഞ്ചാം പേജില് പറയുന്നത് എസ്ഡിആര്എഫ് മാനദണ്ഡമനുസരിച്ച് തയ്യാറാക്കിയ അസസ്മെന്റ് ചൂരല്മല ദുരന്തത്തില് ദുരന്തത്തില് ആകെ ചെലവഴിച്ച തുകയോ, നഷ്ടമോ അല്ലെന്നും, കേന്ദ്ര സര്ക്കാര് തയ്യാറാക്കിയ ദുരന്ത നിവാരണ നിയമം അനുസരിച്ച് കേരളത്തിന് ആവശ്യപ്പെടാവുന്ന തുകയുടെ ഏകദേശം കണക്കാണെന്നുമാണെന്നും പിണറായി പറഞ്ഞു.
ഇപ്പോള് പുറത്തുവന്നത് ചെലവഴിച്ച തുകയുടെ കണക്കുകള് അല്ല, മറിച്ച് ദുരന്തമുണ്ടായ പ്രദേശത്തെ രക്ഷാപ്രവര്ത്തനവും പുനരധിവാസവും ഉള്പ്പെടെ മുന്നില് കണ്ട് തയ്യാറാക്കിയ നിവേദനമാണ്. വസ്തുത ഇതായിരിക്കെ തെറ്റായ വാര്ത്ത നല്കിയ മാധ്യമങ്ങള് അത് തിരുത്തണമെന്നും മുഖ്യമന്ത്രി ആവശ്യപ്പെട്ടു.
നേരത്തെ വന്ന കണക്കുകളുടെ റിപ്പോര്ട്ടില് ഒരു മൃതദേഹം സംസ്കരിക്കുന്നതിന് 75000 രൂപയാണ് ചെലവ് കാണിച്ചിരിക്കുന്നത്. 359 മൃതദേഹങ്ങള് സംസ്കരിക്കുന്നതിന് 2 കോടി 76 ലക്ഷം രൂപ ചെലവായെന്ന് കണക്കുകളില് പറയുന്നുണ്ട്. ഇതാണ് മുഖ്യമന്ത്രി തള്ളിയത്.
Click it and Unblock the Notifications
Sign in with Google