കോഴിക്കോട് ജില്ലയില് കൊറോണ സ്ഥിരീകരിച്ചത് അഴിയൂരില്; രോഗം ബാധിച്ചത് സമ്പര്ക്കം മൂലം
കോഴിക്കോട്: സംസ്ഥാനത്ത് ഇന്ന് ഒരാള്ക്കാണ് കൊറോണ വൈറസ് രോഗം സ്ഥിരീകരിച്ചത്. കോഴിക്കോട് ജില്ലിയിലെ അഴിയൂര് സ്വദേശിക്കാണ് രോഗം സ്ഥിരീകരിച്ചത്. കഴിഞ്ഞ ദിവസം അഴിയൂരിലെ തന്നെ ഒരാള്ക്ക് രോഗം സ്ഥിരീകരിച്ചിരുന്നു. അദ്ദേഹവുമായുള്ള സമ്പര്ക്കം വഴിയാണ് ഇയാള്ക്ക് രോഗം ബാധിച്ചത്. 31 കാരനായ ഇദ്ദേഹം ആദ്യം കൊറോണ പോസിറ്റീവായ ആളുടെ കടയില് ജോലി ചെയ്തിരുന്ന വ്യക്തിയാണ്. കൊറോണ പോസിറ്റീവായതോടെ ഇയാളെ കോഴിക്കോട് മെഡിക്കല് ആശുപത്രിയില് പ്രവേശിപ്പിച്ചിരിക്കുകയാണ്.
ആദ്യത്തെ തവണ അഴിയൂരില് രോഗം സ്ഥിരീകരിച്ചയുടനെ ഇദ്ദേഹത്തെ ജില്ലാ ആശുപത്രിയില് പ്രവേശിപ്പിച്ച് സാമ്പിള് ശേഖരിക്കുകയും പിന്നാലെ വടകര കൊറോണ കെയര് സെന്ററില് പ്രവേശിപ്പിക്കുകയും ചെയ്തിരുന്നു. എന്നാല് ഇപ്പോള് ഇദ്ദേഹം രോഗ ലക്ഷണങ്ങളൊന്നും തന്നെ പ്രകടിപ്പിക്കുന്നില്ല. ആരോഗ്യ നിലയും തൃപ്തികരമാണ്.
കോഴിക്കോട് ജില്ലയില് ഇതുവരേയും 19 പേര്ക്കാണ് രോഗം സ്ഥിരീകരിച്ചത്. അതില് ഒമ്പത് പേര് രോഗവിമുക്തരായി. അതേസമയം, കൊറോണ വ്യാപനം തടയുന്നതിന്റെ ഭാഗമായി കോഴിക്കോട് ജില്ലയിലെ 12 ഗ്രാമപഞ്ചായത്തുകളിലെ 15 വാര്ഡുകളിലും കോഴിക്കോട് കോര്പറേഷനിലെ ഏഴ് വാര്ഡുകളിലും കര്ശന നിയന്ത്രണങ്ങള് ഏര്പ്പെടുത്തി ജില്ലാ കലക്ടര് സാംബശിവ റാവു ഉത്തരവിട്ടിട്ടുണ്ട്.
കിഴക്കോത്ത് (12ാം വാര്ഡ്), വേളം (16), ആയഞ്ചേരി (2), ഉണ്ണികുളം (6), മടവൂര് ( 6), അഴിയൂര് (4,5), ചെക്യാട് (10), തിരുവള്ളൂര് (14), നാദാപുരം (15), ചങ്ങരേത്ത് (3), കായക്കൊടി (6,7,8), എടച്ചേരി (16) എന്നീ ഗ്രാമപഞ്ചായത്തുകളിലെയും കോഴിക്കോട് കോര്പ്പറേഷനിലെയും (42, 43, 44, 45, 54, 55, 56 വാര്ഡുകള്) കോവിഡ് ഹോട്സ്പോട്ടായ വാര്ഡുകളിലാണ് നിയന്ത്രണങ്ങള് കര്ശനമാക്കിയത്.
ഈ വാര്ഡുകള്ക്കകത്തെ റോഡുകളിലൂടെ വാഹനഗതാഗതം പാടില്ല. അവശ്യവസ്തുക്കളുടെ വിതരണത്തിന് വരുന്ന വാഹനങ്ങള്ക്ക് നിരോധനം ബാധകമല്ല. ഇവിടങ്ങളിലുള്ളവര് അടിയന്തര വൈദ്യസഹായത്തിനല്ലാതെ വാര്ഡിന് പുറത്തേക്ക് സഞ്ചരിക്കുന്നതും മറ്റുള്ളവര് മേല്പറഞ്ഞ വാര്ഡുകളിലേക്ക് പ്രവേശിക്കുന്നതും നിരോധിച്ചിട്ടുണ്ട്.
സംസ്ഥാനത്ത് ഇന്ന് 10 പേര് രോഗവിമുക്തി നേടിയെന്നതും ആശ്വസിക്കാവുന്നതാണ്. കാസര്ഗോഡ് ജില്ലയില് ആറ് പേരുടേയും എറണാകുളം ജില്ലയില് രണ്ട് പേരുടേയും ആലപ്പുഴ, മലപ്പുറം, എന്നീ ജില്ലകളിലുള്ള ഓരോരുത്തരുടേയും പരിശോധനഫലമാണ് നെഗറ്റീവായത്.
നിലവില് 138 പേരാണ് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്. സംസ്ഥാനത്തെ വിവിധ ജില്ലകളിലായി 78,980 പേര് നിരീക്ഷണത്തിലാണ്. ഇവരില് 78,454 പേര് വീടുകളിലും 526 പേര് ആശുപത്രികളിലും നിരീക്ഷണത്തിലാണ്. 84 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. രോഗലക്ഷണങ്ങളുള്ള 18,029 വ്യക്തികളുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് ലഭ്യമായ 17,279 സാമ്പിളുകളുടെ പരിശോധനാ ഫലം നെഗറ്റിവ് ആണെന്നും ആരോഗ്യ വകുപ്പ് അറിയിച്ചു.
Click it and Unblock the Notifications
Sign in with Google