സ്വാശ്രയ കോളേജുകൾക്ക് അനുമതി നൽകാനൊരുങ്ങി സർക്കാർ; നയപരമായ തീരുമാനം ഇടതുമുന്നണിയിൽ ചർച്ച ചെയ്യും

തിരുവനന്തപുരം: അൺ എയ്ഡഡ് മേഖലയിൽ സ്വാശ്രയ കോളേജുകൾക്ക് അനുമതി നൽകുന്ന കാര്യം സർക്കാരിൻ്റെ പരിഗണനയിൽ.വിവിധ സർവകലാശാലകൾ സ്വാശ്രയ മേഖലയിൽ ആർട്സ് ആൻഡ് സയൻസ് കോളേജുകൾ, ലോ കോളേജുകൾ എന്നിവ അനുവദിക്കുന്നതിനുള്ള അപേക്ഷകൾ സ്വീകരിച്ചു വരികയാണ്. എന്നാൽ, സർക്കാർ തലത്തിലോ ഇടതുമുന്നണി തലത്തിലോ നയപരമായ തീരുമാനം കൈക്കൊണ്ടിട്ടില്ല. അതേസമയം, സർക്കാരിൻ്റെ വാക്കാലുള്ള അനുമതിയോടെയാണ് അപേക്ഷ സ്വീകരിക്കുന്നതെന്നാണ് ലഭിക്കുന്ന വിവരം.

വിവിധ സർവകലാശാലകളിൽ സ്വാശ്രയ മേഖലയിൽ ആർട്സ് ആൻഡ് സയൻസ് കോളേജുകൾ, ലോ കോളേജുകൾ എന്നിവ അനുവദിക്കുന്നതിനുള്ള അപേക്ഷകളാണ് സർക്കാരിൻ്റെ വാക്കാലുള്ള അനുമതിയോടെ സ്വീകരിച്ചു തുടങ്ങിയത്.എന്നാൽ ഇക്കാര്യം സർക്കാർതലത്തിലോ, ഇടതുമുന്നണി തലത്തിലോ ചർച്ച ചെയ്തിട്ടില്ല. തീരുമാനം ഔദ്യോഗികമായി സ്വീകരിക്കുന്നതിനു മുമ്പ് സർക്കാർ തലത്തിലും ചർച്ച ഉണ്ടാകുമെന്നാണ് അറിയുന്നത്.

കഴിഞ്ഞ സർക്കാരിൻ്റെ കാലത്ത് അൺ എയ്ഡഡ് മേഖലയിൽ കോളേജുകൾ അനുവദിക്കേണ്ടന്ന് തീരുമാനിച്ചിരുന്നു. അക്കാര്യം വ്യക്തമാക്കി 2017 ൽ തന്നെ ഉത്തരവ് പുറപ്പെടുവിക്കുകയും ചെയ്തിരുന്നു. യുഡിഎഫ് സർക്കാരിൻ്റെ കാലത്ത് നടപടിക്രമം പൂർത്തിയാക്കിയ ചില സ്ഥാപനങ്ങൾക്ക് മാത്രമാണ് കഴിഞ്ഞ സർക്കാർ അനുമതി നൽകിയത് ഇതും കോടതിയുടെ ഇടപെടലോടെ ആയിരുന്നു. എന്നാൽ, ഇത്തവണ സർക്കാരിൻ്റെ മുമ്പിലുള്ള സ്വാശ്രയ കോളേജുകൾക്ക് അനുമതി നൽകുമോ എന്നുള്ളതാണ് പ്രധാനം.

അൺ എയ്ഡഡ് കോളേജുകൾക്ക് പ്രവർത്തനാനുമതിക്ക് സർവ്വകലാശാലയുടെ അനുമതി ലഭിച്ചാൽ സർക്കാർ അംഗീകാരം ആവശ്യമില്ലെന്ന് കോടതി വിധി തന്നെയുണ്ട്. എന്നാൽ, സർക്കാർ നയത്തിന് വിധേയമായി മാത്രമേ സർവ്വകലാശാലകൾ സ്വാശ്രയ കോളേജുകൾ സാധാരണ അനുവദിക്കുന്നതിനുള്ള തീരുമാനമെടുക്കാറുള്ളൂ. സർക്കാരിനെ സമ്മർദ്ദത്തിലാക്കി കൊണ്ട് സർവകലാശാലകൾ അത്തരമൊരു സമീപനം സാധാരണഗതിയിൽ സ്വീകരിക്കാറില്ല.

വിവിധ ബോർഡുകളിലെ ഹയർസെക്കൻഡറി പരീക്ഷകളിൽ മികച്ച വിജയമുള്ളതിനാൽ ബിരുദ കോഴ്സുകൾക്ക് ആവശ്യക്കാരേറെ വരുമെന്നാണ് കണക്കാക്കുന്നത്. സമാന്തര വിദ്യാഭ്യാസത്തെ ആശ്രയിക്കുന്നവരുടെ എണ്ണം വർദ്ധിക്കുമെന്ന വിലയിരുത്തലും സർക്കാരിനുണ്ട്. ഈ സാഹചര്യത്തിൽ സ്വാശ്രയ കോളേജുകൾ അനുവദിക്കണോ വേണ്ടയോ എന്നുള്ള കാര്യം സർക്കാർ ചർച്ച ചെയ്ത് തീരുമാനമെടുത്തേക്കും.

അതേ സമയം, കേരള സർവകലാശാലയിൽ 20 സ്വാശ്രയ കോളേജുകൾക്കുള്ള അപേക്ഷകൾ ലഭിച്ചു. കേരളയിൽ പരിശോധന നടത്താൻ സിൻഡിക്കേറ്റ് ഉപസമിതിയെ നിയോഗിക്കാൻ ധാരണയായിട്ടുണ്ട്. കാലിക്കറ്റ് സർവകലാശാലയിൽ ലഭിച്ച അപേക്ഷകളിൽ സിൻഡിക്കേറ്റ് തീരുമാനമെടുത്ത് പരിശോധന നടത്തും. ഓഗസ്റ്റ് 31 വരെ അപേക്ഷ സ്വീകരിക്കുന്നുണ്ട് നിലവിൽ 20 കോളേജുകൾക്ക് അപേക്ഷ ലഭിച്ചിട്ടുണ്ട്.

6

എന്നാൽ, കണ്ണൂർ സർവ്വകലാശാലയിൽ സഹകരണ മേഖലയിൽ മാത്രം കോളേജുകൾ അനുവദിച്ചാൽ മതിയെന്ന് വിജ്ഞാപനമിറക്കിയെങ്കിലും കോടതി ഇത് റദ്ദാക്കിയിട്ടുണ്ട്. സർവ്വകലാശാല നിയമത്തിന് വിരുദ്ധമാണ് തീരുമാനമെന്ന് ചൂണ്ടിക്കാട്ടിയാണ് കോടതി വിജ്ഞാപനം റദ്ദാക്കിയത്. പുതിയ വിജ്ഞാപനമിറക്കി അപേക്ഷ ക്ഷണിച്ചിരിക്കുകയാണ്. സർവകലാശാലയിലും സിൻഡിക്കേറ്റ് ഉപസമിതിയെ നിയോഗിക്കാൻ ധാരണയായിട്ടുണ്ടെന്നാണ് അറിയുന്നത്.

English summary

The government is considering allowing self-financing colleges in the unaided sector. However, no policy decision has been taken at the government level or at the Left Front level. However, it is learned that the application is being accepted with the verbal permission of the government.