കെ റെയില് പദ്ധതി: ഡിപിആര് പുറത്തുവിടണം, രഹസ്യമാക്കുന്നത് ദുരൂഹത പുറത്തുവരുമെന്ന് പേടിച്ച്: ഉമ്മന്ചാണ്ടി
തിരുവനന്തപുരം: കെ റെയില് പദ്ധതിയുമായി ബന്ധപ്പെട്ട് സംസ്ഥാന സര്ക്കാരിനോട് ചോദ്യങ്ങളുമായി മുന് മുഖ്യമന്ത്രി ഉമ്മന്ചാണ്ടി രംഗത്ത്.
കെ റെയില് പദ്ധതിയുടെ വിശദമായ പഠന റിപ്പോര്ട്ട് (ഡിപിആര്) കൃത്രിമവും കെട്ടിച്ചമച്ചതുമാണെന്ന വസ്തുത പുറത്തുവന്ന പശ്ചാത്തലത്തില് സംസ്ഥാന സര്ക്കാര് അടിയന്തരമായി ഡിപിആര് പുറത്തുവിടണമെന്നു മുന്മുഖ്യമന്ത്രി ഉമ്മന് ചാണ്ടി ആവശ്യപ്പെട്ടു.
കെ റെയിലിന്റെ പ്രാഥമിക സാധ്യതാപഠനം നടത്തിയ സംഘത്തിന്റെ തലവന് അലോക് കുമാര് വര്മയുടേതാണ് ഞെട്ടിപ്പിക്കുന്ന വെളിപ്പെടുത്തല്. വ്യാജ ഡിപിആറിന്റെ അടിസ്ഥാനത്തിലാണ് സംസ്ഥാനത്ത് ഉടനീളം ഇപ്പോള് കല്ലിട്ട് ജനങ്ങളെ ദ്രോഹിച്ചുകൊണ്ടിരിക്കുന്നത്. ഇതിനെതിരേ ഉയര്ന്ന ജനരോഷം പോലീസിനെ ഉപയോഗിച്ച് അടിച്ചമര്ത്താനാണ് സര്ക്കാര് ശ്രമിക്കുന്നത്.
ഡിപിആര് രഹസ്യരേഖയാക്കി വച്ചിരിക്കുന്നതു തന്നെ ഇതിലെ ദുരൂഹതകള് പുറത്തുവരുമെന്നു ഭയന്നാണ്. ഡിഎംആര്സി നേരത്തെ തയാറാക്കിയ ബുള്ളറ്റ് ട്രെയിന് പദ്ധതിയുടെ പ്രോജക്ട് കോപ്പിയടിച്ചതാണ് ഇതെന്നുവരെ ആരോപണമുണ്ട്. 80% മണ്ണിട്ട് നികത്തിയ പാതയിലൂടെ കെ റെയില് ഓടിക്കുമെന്നാണ് പറയുന്നത്. പ്രളയ, ഭൂകമ്പ സാധ്യതകളും ഭൂഘടന, നീരൊഴുക്ക് തുടങ്ങിയ ഘടകങ്ങളുമൊന്നും ഡിപിആറിലില്ല. സാമൂഹിക ആഘാത പഠനമോ പാരിസ്ഥിതിക പഠനമോ നടത്താതെയാണ് പദ്ധതിയുമായി മുന്നോട്ടുപോകുന്നത്. മൂന്നു പ്രളയത്തെ അതിജീവിച്ച സംസ്ഥാനത്തിന് വ്യാജഡിപിആറിന്റെ അടിസ്ഥാനത്തില് നടപ്പാക്കുന്ന പദ്ധതികള് താങ്ങാവുന്നതല്ല.
124,000 കോടി രൂപ മുടക്കി നടപ്പാക്കുന്ന കെ റെയില് പദ്ധതി 110,000 കോടി രൂപ ചെലവു വരുന്ന മുംബൈ- അഹമ്മദാബാദ് ബുള്ളറ്റ് ട്രെയിന് പദ്ധതിയേക്കാള് ചെലവറേയതാണ്. കേരളത്തിനു താങ്ങാനാവാത്തതും രാജ്യത്തെ ഏറ്റവും ചെലവേറിയതുമായ ഈ പദ്ധതി ഉരുക്കുമുഷ്ടി ഉപയോഗിച്ച് നടപ്പാക്കുന്നത് ആരുടെ താത്പര്യം സംരക്ഷിക്കാനാണെന്ന് ഉമ്മന് ചാണ്ടി ചോദിച്ചു.
ഉമ്മന്ചാണ്ടിക്ക് പിന്നാലെ പ്രതിപക്ഷ നേതാവ് വിഡി സതീശനും സര്ക്കാരിനെതിരെ രംഗത്തെത്തി. സില്വര് ലൈന് പദ്ധതിയില് സര്ക്കാര് ജനങ്ങളെ കബളിപ്പിക്കുകയാണെന്ന് വിഡി സതീശന് കുറ്റപ്പെടുത്തി. പഠനത്തിനായി സര്ക്കാര് ചുമതലപ്പെടുത്തിയ ഏജന്സിയുടെ തലവന് അലോക് വര്മ ഞെട്ടിക്കുന്ന വിവരങ്ങളാണ് പുറത്തു വിട്ടിരിക്കുന്നത്. ലിഡാര് സര്വെ എന്നത് തട്ടിക്കൂട്ടിയ സര്വെ എന്നാണ് അദ്ദേഹം പറഞ്ഞത്. ഇത് നേരത്തെ തന്നെ പ്രതിപക്ഷം നിയമസഭയില് പറഞ്ഞ കാര്യമാണ്. ഏരിയല് സര്വെ നടത്തിയാല് ഒരിക്കലും കൃത്യമായ വിവരങ്ങള് ലഭിക്കില്ല. എത്ര വീടുകള് പൊളിക്കേണ്ടി വരും? എത്ര പേരെ കുടിയൊഴിപ്പിക്കേണ്ടി വരും? എന്തെല്ലാം പ്രശ്നങ്ങള് ഉണ്ടാകും തുടങ്ങിയ കാര്യങ്ങളൊക്കെ നേരിട്ട് നടത്തുന്ന സര്വെയിലൂടെയാണ് വ്യക്തമാകുകയെന്ന് വിഡി സതീശന് പറഞ്ഞു.
ലിഡാര് സര്വെ ആധാരമാക്കി തയ്യാറാക്കിയിരിക്കുന്ന റിപ്പോര്ട്ട് അടിസ്ഥാനമില്ലാത്തതാണ്. മാത്രമല്ല സര്ക്കാര് പറയുന്ന തുകയല്ല പദ്ധതിക്ക് വേണ്ടിവരിക, ഒരു ലക്ഷത്തിലധികം കോടി രൂപയാണ് പദ്ധതിക്ക് ചിലവ് വരിക എന്നാണ് സിസ്ട്രയുടെ തലവന് പറയുന്നത്. നീതി ആയോഗ് പറയുന്നത് 1.24 ലക്ഷം കോടി ചിലവ് വരുമെന്നാണ്. എന്നാല് ഇത് 2018ലെ കണക്കാണ്. ഇത് യാഥാര്ത്ഥ്യമാകുമ്പോള് രണ്ട് ലക്ഷം കോടി കടക്കും. വ്യക്തമായ ഒരു റിപ്പോര്ട്ട് പോലും ഇല്ലാതെയാണ് സര്ക്കാര് പദ്ധതിയുമായി മുന്നോട്ടുപോകുന്നത്. പാരിസ്ഥികാഘാത പഠനം നടത്തിയിട്ടില്ല, സാമൂഹികാഘാത പഠനം നടത്തിയിട്ടില്ല, കേന്ദ്ര സര്ക്കാരിന്റെ അനുമതിയില്ല, നേരായ രീതിയില് സര്വെ നടത്തിയിട്ടില്ല.
സര്ക്കാര് ഇതുവരെ പറഞ്ഞിരിക്കുന്ന കാര്യങ്ങള് മുഴുവനും ജനങ്ങളേയും ഇരകളായി മാറുന്ന പാവങ്ങളേയും കബളിപ്പിക്കുന്നതിന് വേണ്ടിയിട്ടുള്ള പദ്ധതിയാണ്. അതുകൊണ്ടുതന്നെ ഇതില് നിന്ന് സര്ക്കാര് അടിയന്തിരമായി പിന്മാറണം. ഈ മാസം 18 ന് പത്ത് ജില്ലാ കളക്ടറേറ്റുകളിലേക്കും സെക്രട്ടേറിയറ്റിലേക്കും യു.ഡി.എഫ് നടത്തുന്ന മാര്ച്ച് സില്വര് ലൈനിന് എതിരായ സമര പരമ്പരകളുടെ തുടക്കമായിരിക്കും.
സാരിയില് തിളങ്ങി സ്വാസിക; ലുക്കായിട്ടുണ്ടെന്ന് ആരാധകര്
പ്രതിപക്ഷം ഉന്നയിച്ച ഒരു ചോദ്യത്തിന് പോലും മുഖ്യമന്ത്രി മറുപടി നല്കിയിട്ടില്ല. പിണറായി വിജയന്, 16 വര്ഷം വികസനവിരുദ്ധ പ്രവര്ത്തനങ്ങള്ക്ക് നേതൃത്വം നല്കിയ ഒരു പാര്ട്ടിയുടെ സെക്രട്ടറിയായിരുന്നു. ഇപ്പോള് നല്ലപിള്ള ചമയാന് ശ്രമിക്കുകയാണ്. ഇപ്പോള് മോദിയുടെ ശൈലിയാണ് പിന്തുടരുന്നത്. ചോദ്യങ്ങള്ക്ക് കൃത്യമായ മറുപടി നല്കിയാല് പ്രതിപക്ഷവും പദ്ധതിയെ പിന്തുണയ്ക്കും. നിയമസഭയ്ക്കുള്ളിലും പുറത്തും ഒരു ചോദ്യത്തിനും മറുപടി നല്കില്ലെന്ന നിലപാടിലാണ് മുഖ്യമന്ത്രി.
വഖഫ് നിയമനങ്ങള് പി.എസ്.സിക്ക് വിടാനുള്ള നിയമം പാസാക്കിയപ്പോള് ലഡു വിതരണം നടത്തിയവരാണ് ഇപ്പോള് ഒരു വാശിയും ഇല്ലെന്നു പറയുന്നത്. അന്നും ഇന്നും യു.ഡി.എഫ് ഇക്കാര്യത്തില് ഒരു നിലപാടാണ് സ്വീകരിച്ചത്. തെറ്റായകാര്യങ്ങള് പറഞ്ഞ് ജനങ്ങളെ തെറ്റിദ്ധരിപ്പിക്കാനാണ് മുഖ്യമന്ത്രി ശ്രമിക്കുന്നതെന്നും വിഡി സതീശന് വ്യക്തമാക്കി.
Click it and Unblock the Notifications
Sign in with Google