പ്രവാസികള്ക്ക് ആശ്വാസം; വിദേശ യാത്രക്കാരുടെ ക്വാറന്റീന് ഒഴിവാക്കി, പരിശോധന രോഗലക്ഷണമുള്ളവര്ക്ക് മാത്രം
തിരുവനന്തപുരം: വിദേശത്ത് നിന്ന് സംസ്ഥാനത്ത് എത്തുന്നവര്ക്ക് കൊവിഡ് രോഗലക്ഷണങ്ങള് ഉണ്ടെങ്കില് മാത്രം ക്വാറന്റീന് മതിയെന്ന് തീരുമാനം. മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന കൊവിഡ് അവലോകന യോഗത്തിലാണ് ഈ തീരുമാനം കൈക്കൊണ്ടത്. ഇനി മുതല് രോഗ ലക്ഷണങ്ങളുള്ളവര് മാത്രം പരിശോധന നടത്തിയാല് മതി.
വിമാനത്താവളങ്ങളില് റാപ്പിഡ് ടെസ്റ്റ് ഉള്പ്പടെയുള്ള ടെസ്റ്റുകള്ക്ക് അന്യായമായ നിരക്ക് ഈടാക്കാന് പാടില്ല. പ്രവാസികള്ക്ക് താങ്ങാന് പറ്റുന്ന നിരക്ക് മാത്രമാണ് ഈടാക്കാവൂ. ഇക്കാര്യത്തില് ആരോഗ്യ വകുപ്പിനോട് അടിയന്തര നടപടി സ്വീകരിക്കണമെന്നും യോഗത്തില് നിര്ദ്ദേശിച്ചു.
രാജ്യാന്തര യാത്രികര് യാത്ര കഴിഞ്ഞതിന്റെ എട്ടാമത്തെ ദിവസം ആര് ടി പി സി ആര് പരിശോധന ചെയ്യണമെന്ന നിലവിലെ മാനദണ്ഡം മാറ്റണമെന്ന ആരോഗ്യവിദഗ്ധ സമിതിയുടെ നിര്ദേശം യോഗം അംഗീകരിച്ചു.
അതേസമയം, സംസ്ഥാനത്ത് കൂടുതല് ഇളവുകള് സര്ക്കാര് പ്രഖ്യാപിച്ചിട്ടുണ്ട്. ഒന്നു മുതല് ഒമ്പതു വരെ ക്ലാസ്സുകള്, ക്രഷുകള്, കിന്ഡര് ഗാര്ട്ടനുകള് തുടങ്ങിയവ ഫെബ്രുവരി 14 മുതല് ആരംഭിക്കാന് കോവിഡ് അവലോകന യോഗത്തില് തീരുമാനമായി. പത്ത്, പതിനൊന്ന്, പന്ത്രണ്ട് ക്ലാസ്സുകളും ബിരുദ, ബിരുദാനന്തര ബിരുദ ക്ലാസ്സുകളും ഫെബ്രുവരി ഏഴ് മുതല് ആരംഭിക്കും. പരീക്ഷകള് മുടക്കമില്ലാതെ നടത്തും.
എല്ലാ ആരാധനാലയങ്ങളിലും പ്രവേശിപ്പിക്കാവുന്നവരുടെ എണ്ണത്തില് ഏകീകൃത നില സ്വീകരിക്കും. പരമാവധി 20 പേരെ അനുവദിക്കും. നിയന്ത്രണങ്ങളുള്ള ഫെബ്രുവരി 6 ഞായറാഴ്ചയിലും ഇത് ബാധകമാണ്. ആറ്റുകാല് പൊങ്കാലയ്ക്ക് ക്ഷേത്രപരിസരത്ത് 200 പേരെ അനുവദിക്കും. ഈ വര്ഷവും പൊങ്കാലയിടുന്നത് വീടുകളില് മാത്രമായി പരിമിതപ്പെടുത്തണം. സംസ്ഥാനത്ത് രണ്ടാം ഡോസ് വാക്സിനേഷന് 85 ശതമാനവും കുട്ടികളുടെ വാക്സിനേഷന് 72 ശതമാനവും പൂര്ത്തീകരിച്ചു.
ജില്ലകളുടെ കാറ്റഗറിയില് മാറ്റം വന്നിട്ടുണ്ട്. 'സി' കാറ്റഗറിയില് കൊല്ലം ജില്ല മാത്രമാണുള്ളത്. കാറ്റഗറി 'ബി' യില് തിരുവനന്തപുരം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്, പാലക്കാട്, വയനാട്, കണ്ണൂര് എന്നീ ജില്ലകളാണുള്ളത്. മലപ്പുറം, കോഴിക്കോട് എന്നീ ജില്ലകള് കാറ്റഗറി 'എ' യില്പ്പെടും. കാസര്ഗോഡ് ഒരു കാറ്റഗറിയിലും വരുന്നില്ല.
അതേസമയം, കേരളത്തില് കൊവിഡ് കേസുകള് വര്ദ്ധിച്ചുവരുകയാണെന്ന് കേന്ദ്ര ആരോഗ്യ മന്ത്രാലയം കഴിഞ്ഞ ദിവസം അറിയിച്ചിരുന്നു. ഇന്നലെ സംസ്ഥാനത്ത് 42,677 പേര്ക്ക് കോവിഡ്-19 സ്ഥിരീകരിച്ചത്. എറണാകുളം 7055, തിരുവനന്തപുരം 5264, കോട്ടയം 4303, കൊല്ലം 3633, പത്തനംതിട്ട 3385, തൃശൂര് 3186, ആലപ്പുഴ 3010, കോഴിക്കോട് 2891, മലപ്പുറം 2380, പാലക്കാട് 1972, ഇടുക്കി 1710, കണ്ണൂര് 1670, വയനാട് 1504, കാസര്ഗോഡ് 714 എന്നിങ്ങനേയാണ് ജില്ലകളില് ഇന്ന് രോഗ ബാധ സ്ഥിരീകരിച്ചത്.
സംസ്ഥാനത്ത് വാക്സിനേഷന് എടുക്കേണ്ട ജനസംഖ്യയുടെ 100 ശതമാനം പേര്ക്ക് ഒരു ഡോസ് വാക്സിനും ( 2,68,26,630 ), 84 ശതമാനം പേര്ക്ക് രണ്ട് ഡോസ് വാക്സിനും ( 2,25,40,534 ) നല്കിയിട്ടുണ്ട്. 15 മുതല് 17 വയസുവരെയുള്ള ആകെ 73 ശതമാനം (11,11,671) കുട്ടികള്ക്ക് വാക്സിന് നല്കി. ഇന്ത്യയില് ഏറ്റവും കൂടുതല് വാക്സിനേഷന്/ ദശലക്ഷം ഉള്ള സംസ്ഥാനം കേരളമാണ് ( 14,32,199 ). ജനുവരി 27 മുതല് ഫെബ്രുവരി 2 വരെയുള്ള കാലയളവില്, ശരാശരി 1,28,961 കേസുകള് ചികിത്സയിലുണ്ടായിരുന്നതില് 0.9 ശതമാനം പേര്ക്ക് മാത്രമാണ് ഓക്സിജന് കിടക്കകളും 0.4 ശതമാനം പേര്ക്ക് മാത്രമാണ് ഐസിയുവും ആവശ്യമായി വന്നത്.
Click it and Unblock the Notifications
Sign in with Google