തപാല് വോട്ടുകള്: സ്ഥാനാര്ത്ഥിക്ക് നേരെയുള്ള ഏത് അടയാളവും വോട്ടായി പരിഗണിക്കുമെന്ന് തിരഞ്ഞെടുപ്പ് കമ്മിഷന്
തിരുവനന്തപുരം: തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പിലെ തപാല് വോട്ടുകളില് സ്ഥാനാര്ത്ഥിക്ക് നേരെയോ ചിഹ്നത്തിന് നേരെയോ ഉള്ള ഏത് അടയാളവും വോട്ടായി പരിഗണിക്കുമെന്ന് തിരഞ്ഞെടുപ്പ് കമ്മിഷന് അറിയിച്ചു. ഇത്തരം ബാലറ്റുകള് സാധുവായി പരിഹഗണിക്കും, എന്നാല് വോട്ടറെ തിരിച്ചറിയാവുന്ന അടയാളമാണ് രേഖപ്പെടുത്തിയതെങ്കില് വോട്ട് അസാധുവാകുമെന്നും തിരഞ്ഞെടുപ്പ് കമ്മിഷന് അറിയിച്ചു.
അതേസമയം, തദ്ദേശ തെരഞ്ഞെടുപ്പിന്റെ വോട്ടെണ്ണല് ദിനത്തില് വിജയാഹ്ലാദ പ്രകടനങ്ങള് നടത്തുമ്പോള് കര്ശന കോവിഡ് മാനദണ്ഡങ്ങള് പാലിക്കണമെന്ന നിര്ദേശമുണ്ട്. 50ല് കൂടുതല് പേര് പങ്കെടുക്കുന്ന ഒരു ആഘോഷ പരിപാടിയും പാടില്ല. ജാഥകളും വാഹന റാലികളും പ്രത്യേകിച്ച് ഇരുചക്രവാഹനങ്ങളും ഒഴിവാക്കണം.
തിരഞ്ഞെടുപ്പ് പ്രചാരണത്തില് കോവിഡ് മാനദണ്ഡങ്ങള് പാലിക്കുന്നതില് കാണിച്ച ശ്രദ്ധയും ജാഗ്രതയും വോട്ടെണ്ണല് ദിനത്തിലും തുടരണമെന്നു ജില്ലാ കളക്ടര്മാര് രാഷ്ട്രീയ കക്ഷി പ്രതിനിധികളോട് അഭ്യര്ഥിച്ചിട്ടുണ്ട്. വോട്ടെണ്ണല് കേന്ദ്രങ്ങള്ക്കു മുന്നില് ആള്ക്കൂട്ടം ഒഴിവാക്കണം. സാമൂഹിക അകലം ഉറപ്പാക്കണം. വിജയികളായവരെ അനുമോദിക്കുമ്പോഴും ഇക്കാര്യം പ്രത്യേകം ശ്രദ്ധിക്കണം. ഹാരം, നോട്ടുമാല, ബൊക്കെ, ഷാള് എന്നിവ നല്കിയുള്ള സ്വീകരണ പരിപാടികള് ഒഴിവാക്കണം. പൊതുജനങ്ങള്ക്കു ബുദ്ധിമുട്ടുണ്ടാക്കുംവിധം വാദ്യോപകരണങ്ങള്, ഉച്ചഭാഷണി തുടങ്ങിയവ ഉപയോഗിച്ചുള്ള ആഹ്ലാദ പ്രകടനം നടത്തരുതെന്നും നിര്ദ്ദേശമുണ്ട്.
അതേസമയം, തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ ഫലമറിയാനുള്ള വോട്ടെണ്ണല് ഡിസംബര് 16ന് രാവിലെ എട്ടുമണിക്ക് ആരംഭിക്കും. കൗണ്ടിംഗ് പാസ് ലഭിച്ചിട്ടുള്ള കൗണ്ടിംഗ് ഏജന്റുമാര്ക്ക് മാത്രമാണ് കൗണ്ടിംഗ് ഹാളില് പ്രവേശിക്കാന് അനുമതി. സ്ഥാനാര്ത്ഥിക്കും ചീഫ് ഇലക്ഷന് ഏജന്റിനും ബ്ലോക്ക് വരണാധികാരിക്ക് കീഴിലുള്ള ഒരാള്ക്കും കൗണ്ടിംഗ് ഹാളില് പ്രവേശനം അനുവദിക്കും. കൗണ്ടിംഗ് ഓഫീസര്മാര് കൈയുറയും മാസ്കും ഫേസ് ഷീല്ഡും ധരിച്ചാണ് ഹാളില് പ്രവേശിക്കുക. കൗണ്ടിംഗ് ഹാളില് എത്തുന്ന സ്ഥാനാര്ത്ഥികളും കൗണ്ടിംഗ് ഏജന്റുമാരും മാസ്കും സാനിറ്റൈസറും ഉപയോഗിക്കണം.
കോവിഡ് ബാധിതര്ക്ക് വിതരണം ചെയ്ത സ്പെഷ്യല് തപാല്വോട്ടുകള് ഉള്പ്പെടെയുള്ള തപാല് വോട്ടുകളാണ് ആദ്യം എണ്ണുക. ത്രിതല പഞ്ചായത്തുകളിലെ വോട്ടെണ്ണല് ബ്ലോക്ക് തലത്തിലുള്ള വിതരണ, സ്വീകരണ കേന്ദ്രങ്ങളില് നടക്കും. മുനിസിപ്പാലിറ്റികളിലും കോര്പ്പറേഷനുകളിലും അതത് സ്ഥാപനങ്ങളുടെ വിതരണ സ്വീകരണ കേന്ദ്രങ്ങളില് വോട്ടെണ്ണും. ഗ്രാമപ്പഞ്ചായത്തുകളിലെയും ബ്ലോക്ക് പഞ്ചായത്തുകളിലെയും ജില്ലാ പഞ്ചായത്തുകളിലെയും പോസ്റ്റല് വോട്ടുകള് അതത് വരണാധികാരികളാണ് എണ്ണുക.
Recommended Video
പരമാവധി എട്ട് പോളിങ് സ്റ്റേഷനുകള്ക്ക് ഒരു മേശ എന്ന രീതിയില് സാമൂഹിക അകലം പാലിച്ചാണ് കൗണ്ടിംഗ് മേശകള് ഒരുക്കിയിരിക്കുന്നത്. ബ്ലോക്ക് പഞ്ചായത്ത് വരണാധികാരിക്ക് ഒരു ഹാളും ബ്ലോക്ക് പഞ്ചായത്ത് പരിധിയില് വരുന്ന ഗ്രാമപ്പഞ്ചായത്തുകള്ക്ക് പ്രത്യേക കൗണ്ടിംഗ് ഹാളുകളും സജ്ജീകരിക്കും. മുനിസിപ്പാലിറ്റികളിലും കോര്പ്പറേഷനുകളിലും ഓരോ വരണാധികാരിക്കും പ്രത്യേകം കൗണ്ടിംഗ് ഹാള് ഉണ്ടാകും. വോട്ടെണ്ണല് മേശകളുടെ എണ്ണം കണക്കാക്കിയാണ് സ്ട്രോങ്റൂമില് നിന്നും കണ്ട്രോള് യൂണിറ്റുകള് എത്തിക്കുക.
Click it and Unblock the Notifications
Sign in with Google