ശശി തരൂരിന് പിന്തുണയില്ല; ഖാര്ഗെയുടെ വിജയത്തിന് വേണ്ടി പ്രവര്ത്തിക്കുമെന്ന് വിഡി സതീശന്
കൊച്ചി: കോണ്ഗ്രസ് അധ്യക്ഷ സ്ഥാനത്തേക്ക് നടക്കുന്ന തിരഞ്ഞെടുപ്പില് മത്സരിക്കുന്ന ശശി തരൂരിന് തിരിച്ചടി. സംസ്ഥാന നേതൃത്വത്തില് നിന്നും പോലും ശശി തരൂരിന് പിന്തുണ ലഭിക്കുന്നില്ല. കോണ്ഗ്രസ് പ്രസിഡന്റ് തിരഞ്ഞെടുപ്പില് മല്ലികാര്ജുന ഖാര്ഗെയുടെ വിജയത്തിന് വേണ്ടി പ്രവര്ത്തിക്കുമെന്നാണ് പ്രതിപക്ഷ നേതാവ് വി ഡി സതീശന് അറിയിക്കുന്നത്. ദളിത് വിഭാഗത്തില്പ്പെട്ട ഒരാള് കോണ്ഗ്രസ് അധ്യക്ഷനാകുന്ന അഭിമാന മുഹൂര്ത്തത്തിന് വേണ്ടി കാത്തിരിക്കുകയാണെന്നും പ്രതിപക്ഷ നേതാവ് ഇന്ന് നടത്തിയ വാര്ത്താ സമ്മേളനത്തില് വ്യക്തമാക്കി.
ഇതോടെ ശശി തരൂരിന് കേരള നേതൃത്വത്തിലെ മുതിര്ന്ന നേതാക്കളില് നിന്നുപോലും പിന്തുണ ലഭിക്കാത്ത കാഴ്ചയാണ് കാണുന്നത്. നേരത്തെ എ കെ ആന്റണിയും മല്ലികാര്ജുന ഖാര്ഗെയെ പിന്തുണയ്ക്കുന്നെന്ന് അറിയിച്ചിരുന്നു. അതേസമയം, മുതിര്ന്ന നേതാക്കളെല്ലാം കൂടിയാലോചിച്ചാണ് അദ്ദേഹത്തെ സ്ഥാനാര്ഥിയാക്കിയിരിക്കുന്നത്. അതുകൊണ്ടുതന്നെ ഖാര്ഗെയെ പിന്തുണയ്ക്കുമെന്നും വി ഡി സതീശന് വ്യക്തമാക്കി.
പാര്ട്ടി അധ്യക്ഷ സ്ഥാനത്തേക്കുള്ള മത്സരം ജനാധിപത്യത്തിന്റെ മനോഹാരിതയാണ്. ജനാധിപത്യ പാര്ട്ടിയാണ് കോണ്ഗ്രസ്. സി.പി.എമ്മിലോ ബി.ജെ.പിയിലോ മത്സരം നടക്കാറുണ്ടോ? ആരെയെങ്കിലും എവിടെയെങ്കിലും വച്ച് തീരുമാനിക്കുകയാണ് അവരുടെ പതിവ്. യോഗ്യതയുള്ള ആര്ക്കും മത്സരിക്കാമെന്നാണ് കോണ്ഗ്രസ് പറഞ്ഞത്. അത് ജനാധിപത്യ പാര്ട്ടിയുടെ മാത്രം സവിശേഷതയാണ്.
ഒന്പത് തവണ വിജയിക്കുകയും കേന്ദ്ര- സംസ്ഥാന സര്ക്കാരുകളില് മന്ത്രിയാകുകയും ചെയ്തിട്ടുള്ള ദളിത് വിഭഗത്തില്പ്പെട്ട ഖാര്ഗെ കോണ്ഗ്രസ് അധ്യക്ഷനാകുന്നത് അഭിമാനകരമാണ്. നേതൃത്വത്തിലേക്ക് വരുന്ന അനുഭവ സമ്പത്തുള്ള പുതിയ നേതാവാണ് അദ്ദേഹം. പ്രായം ഒരു ഘടകമല്ല. പ്രായമായവരെ പറഞ്ഞു വിടുകയെന്നതില് യോജിപ്പില്ല. അവരുടെ അനുഭവ സമ്പത്ത് കൂടി പ്രയോജനപ്പെടുത്തുകയാണ് വേണ്ടത്. അധ്യക്ഷ സ്ഥാനത്തേക്ക് ശശി തരൂരിനെ കേരളത്തിലെ കോണ്ഗ്രസ് നേതാക്കളില് ചിലര് പിന്തുണയ്ക്കുന്നത് പാര്ട്ടിയില് ചേരിതിരിവുണ്ടാക്കില്ലെന്നും വി ഡി സതീശന് വ്യക്തമാക്കി.
അതേസമയം, കോണ്ഗ്രസ് നേതൃത്വത്തിനെതിരെ രൂക്ഷവിമര്ശനവുമായി ശശി തരൂര് രംഗത്തെത്തിയിരുന്നു. പാര്ലമെന്റില് ഉള്പ്പെടെ അര്ഹിക്കുന്ന പരിഗണന തനിക്ക് കിട്ടിയില്ലെന്ന് അദ്ദേഹം പറയുന്നു. അധ്യക്ഷനായി കഴിഞ്ഞാല് കോണ്ഗ്രസില് ഒരുപിടി മാറ്റങ്ങള് കൊണ്ടുവരുമെന്നും ശശി തരൂര് പറഞ്ഞു.
എ കെ ആന്റണിയുടെ പിന്തുണ താന് തിരഞ്ഞെടുപ്പില് ആഗ്രഹിച്ചിരുന്നെന്നും പിന്തുണ ലഭിക്കാത്തതിന്റെ കാരണം കേരളത്തിലെ നേതാക്കളാണ് പറയേണ്ടതെന്നും ശശി തരൂര് പറഞ്ഞു. കോണ്ഗ്രസില് പല മാറ്റങ്ങളും ആവശ്യമാണ്. വികേന്ദ്രീകരണം വേണം, എല്ലാ തീരുമാനങ്ങളും ദില്ലിയില് നിന്ന് എടുക്കുന്നതാണ് നിലവിലെ രീതി. ജില്ലാ പ്രസിഡന്റിന്റെ നിയമനം പോലും ദില്ലിയില് നിന്ന് തീരുമാനിക്കുന്ന രീതി മാറ്റണമെന്നും അതെല്ലാം സംസ്ഥാന നേൃതൃത്വത്തിന് കൈമാറുമെന്നും ശശി തരൂര് പറയുന്നു.
ഇതിനിടെ ശശി തരൂരിനെ പിന്തുണച്ച് കെ എസ് ശബരീനാഥന് രംഗത്തെത്തി. അതിന് ചില കാരണങ്ങളും ശബരീനാഥന് വ്യക്തമാക്കിയിരുന്നു. ഒരു രാഷ്ട്രീയ പാര്ട്ടിക്ക് ഏറ്റവും പ്രധാനം പ്രത്യയശാസ്ത്രം ആണ്. ഗാന്ധിയുടെയും നെഹ്റുവിന്റെയും അംബേദ്കറിന്റെയും കാഴ്ചപ്പാടുകള് ഇരുപത്തിയൊന്നാം നൂറ്റാണ്ടിന് അനുസൃതമായി ഇത്ര കൃത്യമായി പറയുന്ന മറ്റൊരു കോണ്ഗ്രസ് നേതാവ് ഇല്ല. ജനങ്ങളുമായി അത്തരം രാഷ്ട്രീയം കമ്മ്യൂണിക്കേറ്റ് ചെയ്യാന് ശശി തരൂരിനുള്ള മികവ് ഒരു പോസിറ്റീവ് ഘടകമായി തോന്നുന്നെന്ന് ശബരീനാഥന് പറഞ്ഞു.
നരേന്ദ്രമോദിയും ബി ജെ പിയും മുന്നോട്ട് വയ്ക്കുന്ന വര്ഗീയ രാഷ്ട്രീയത്തിനു വിശ്വസനീയമായ ഒരു ബദല് അദ്ദേഹം പറയുന്നുണ്ട്. ഇന്ത്യയിലെ ബിജെപി വിരുദ്ധ പ്രവര്ത്തനങ്ങള്ക്ക് ചുക്കാന് പിടിക്കാന് അദ്ദേഹത്തിന്റെ മതനിരപേക്ഷ നിലപാടുകള് സഹായിക്കും. വിവിധ പ്രതിപക്ഷ രാഷ്ട്രീയപാര്ട്ടികളെ കോര്ത്തിണക്കാന് അദ്ദേഹത്തിന് കഴിയുമെന്നാണ് വിശ്വാസം.
ലോകത്തില് ഉണ്ടാകുന്ന സാമൂഹിക, സാംസ്കാരിക മാറ്റങ്ങള് ഉള്ക്കൊണ്ടു മാത്രമേ ഇനി ഏത് രാഷ്ട്രീയ പ്രസ്ഥാനത്തിനും മുന്നോട്ടുപോകാന് കഴിയുകയുള്ളൂ. ഈ മാറ്റങ്ങള് പാര്ട്ടി കൂടുതല് ഉള്കൊള്ളേണ്ടതുണ്ട്. ലോകത്തെ വിശാലമായി നോക്കി കാണുകയും, ഓരോ മാറ്റങ്ങളെ കുറിച്ചും കൃത്യമായി പഠിച്ചു രാഷ്ട്രീയത്തില് അപ്ഡേറ്റ് ചെയ്യുന്ന ഡോ തരൂരിലൂടെ ഇത് സാധിക്കുമെന്നും ശബരീനാഥന് വ്യക്തമാക്കി.
Click it and Unblock the Notifications
Sign in with Google