പോപ്പുലര്‍ ഫ്രണ്ട്: കൊല്ലത്ത് എന്‍ഐഎ റെയ്ഡ്; ഒരാള്‍ കസ്റ്റഡിയില്‍

Updated: Tuesday, January 17, 2023, 18:48 [IST]

കൊല്ലം: പോപ്പുലര്‍ ഫ്രണ്ട് കേസുമായി ബന്ധപ്പെട്ട് കൊല്ലത്ത് വീണ്ടും എന്‍ ഐ എ റെയ്ഡ്. കൊല്ലം ജില്ലയിലെ ചവറയില്‍ ഇന്ന് പുലര്‍ച്ചെ മൂന്ന് മണിയോടെ ആണ് റെയ്ഡ് നടത്തിയത്. റെയ്ഡില്‍ ചവറ സ്വദേശി മുഹമ്മദ് സാദിഖ് എന്നയാളെ എന്‍ ഐ എ കസ്റ്റഡിയില്‍ എടുത്തിട്ടുണ്ട്.

രാവിലെ ഏഴ് മണിക്കാണ് റെയ്ഡ് അവസാനിച്ചത്. കസ്റ്റഡിയിലുള്ള മുഹമ്മദ് സാദിഖ് പോപ്പുലര്‍ ഫ്രണ്ട് പരിപാടികളില്‍ പങ്കെടുത്തിരുന്നു എന്നാണ് എന്‍ ഐ എയുടെ കണ്ടെത്തല്‍. ഇയാളില്‍ നിന്ന് യാത്രാ രേഖകളും എന്‍ ഐ എ പിടിച്ചെടുത്തിട്ടുണ്ട്. അതീവരഹസ്യമായി പൊലീസിന്റെ സഹായത്തോടെ ആണ് കൊച്ചിയില്‍ നിന്നുള്ള എന്‍ ഐ എ സംഘം റെയ്ഡിന് എത്തിയത്.

ചവറയില്‍ എത്തിയതിന് ശേഷം മാത്രമാണ് പൊലീസിനെ എന്‍ ഐ എ ബന്ധപ്പെട്ടത്. മുഹമ്മദ് സാദിഖിന്റെ വീട്ടില്‍ നിന്നാണ് രേഖകളെല്ലാം പിടിച്ചെടുത്തിരിക്കുന്നത്. ഇയാളുമായി രാവിലെ തന്നെ എന്‍ ഐ എ സംഘം കൊച്ചിയിലേക്ക് തിരിക്കുകയും ചെയ്തു.

രണ്ടാഴ്ച മുന്‍പും സംസ്ഥാന വ്യാപകമായി എന്‍ ഐ എ റെയ്ഡ് നടത്തിയിരുന്നു. പോപ്പുലര്‍ ഫ്രണ്ടിന്റെ നിരോധനത്തിന് ശേഷവും സമാന്തര പ്രവര്‍ത്തനങ്ങള്‍ തുടര്‍ന്നതായി എന്‍ ഐ എ കണ്ടെത്തിയിട്ടുണ്ട്. ഈ സാഹചര്യത്തിലാണ് എന്‍ ഐ എ സംസ്ഥാനത്തുടനീളം കൂട്ടപരിശോധന ആരംഭിച്ചത്.