ദില്ലി മെട്രോയില് പ്രസവം, അമ്മയും കുഞ്ഞും ഹാപ്പി
ദില്ലി: മെട്രോ ട്രെയിനിനുളളില് യുവതി പെണ്കുഞ്ഞിന് ജന്മം നല്കി. മഴയും കൊടുങ്കാറ്റും മൂലം ആശുപത്രിയിലെത്താന് വൈകിയ യുവതിയാണ് മെട്രോ ട്രെയിനിനുള്ളില് സി ഐ എസ് എഫ് ഉദ്യോഗസ്ഥരുടെയും സഹയാത്രികരുടെയും സഹായത്തോടെ പെണ്കുഞ്ഞിനെ പ്രസവിച്ചത്. ദ്വാരക സ്റ്റേഷനടുത്ത് വെച്ച് രാത്രി ഒമ്പതരയോടെയായിരുന്നു സംഭവം. അമ്മയും കുഞ്ഞും സുഖമായിരിക്കുന്നു.
പൂര്ണഗര്ഭിണിയായ കൃഷ്ണ, ഭര്ത്താവ് പ്രദീപ് എന്നിവര് ചേര്ന്ന് ആശുപത്രിയിലേക്ക് പോകുന്നതിന് വേണ്ടിയാണ് മെട്രൊ ട്രെയിനില് കയറിയത്. മഴയും കൊടുങ്കാറ്റും മൂലം ഇന്്ര റെയില്വേ സ്റ്റേഷനില് എത്താന് തന്നെ വൈകി. വീണ്ടും കുറെ സമയം കാത്തുനിന്ന ശേഷമാണ് ഇവര്ക്ക് ട്രെയിന് കിട്ടിയത്. അപ്പോഴേക്കും കൃഷ്ണയ്ക്ക് പ്രസവ വേദനം ആരംഭിച്ചുകഴിഞ്ഞിരുന്നു.
ഉടന് തന്നെ ദമ്പതികള് സഹായാത്രികരെയും ട്രെയിനിലെ ഉദ്യോഗസ്ഥരെയും വിവരം അറിയിച്ചു. യാത്രക്കാരുടെ കൂട്ടത്തില് നിന്നും ഒരാള് ഡോക്ടറെന്ന് പരിചയപ്പെടുത്തി മുന്നോട്ടുവന്നു. സി ഐ എസ് എഫ് ഉദ്യോഗസ്ഥവര് മറ്റൊരു ഡോക്ടറെയും കൂടി വിളിച്ചുവരുത്തി. ഇവരുടെയും വനിതാ യാത്രക്കാരുടെയും സഹായത്തോടെ ട്രെയിനില് വെച്ചുതന്നെ പ്രസവവും കഴിഞ്ഞു.
രാത്രി 9.10 ഓട് കൂടിയായിരുന്നു കൃഷ്ണ പെണ്കുഞ്ഞിന് ജന്മം നല്കിയത്. സുഖപ്രസവമായിരുന്നു. പ്രസവശേഷം ഉടന് തന്നെ സി ഐ എസ് എഫ് ഉദ്യോഗസ്ഥര് ആംബുലന്സില് കൃഷ്ണയെയും കുഞ്ഞിനെയും ആശുപത്രിയിലേക്ക് മാറ്റി. പാലം ആശുപത്രിയില് അമ്മയും കുഞ്ഞും സുഖമായിരിക്കുന്നു.