പ്രധാനമന്ത്രിക്കെതിരെ വാചകമെഴുതിയ കാര് തിരുവനന്തപുരത്ത്; എത്തിയത് പഞ്ചാബ് സ്വദേശി
തിരുവനന്തപുരം: പട്ടത്ത് പ്രധാനമന്ത്രി നരേന്ദ്രമോദിക്കെതിരെ വാചകങ്ങളെഴുതി ദുരൂഹ സാഹചര്യത്തില് കണ്ടെത്തിയ കാര് പൊലീസ് കസ്റ്റഡിയിലെടുത്തു. പ്രധാനമന്ത്രി നരേന്ദ്ര മോദിക്കെതിരായ വാചകങ്ങളെഴുതിയ യുപി രജിസ്ട്രേഷന് കാറാണ് സ്വകാര്യ ഹോട്ടലില് നിന്ന് പൊലീസ് കസ്റ്റഡിയിലെടുത്തത്. പഞ്ചാബ് സ്വദേശിയാണ് കാറുമായി തിരുവനന്തപുരത്ത് എത്തിയത്. ഹോട്ടലില് ബഹളമുണ്ടാക്കി വാഹനം ഉപേക്ഷിച്ച് കടന്ന് കളഞ്ഞ പഞ്ചാബ് സ്വദേശിക്കായി പൊലീസ് തെരച്ചില് ഊര്ജ്ജിതമാക്കി. ഉച്ചയ്ക്ക് രണ്ട് മണിയോടെയാണ് പട്ടത്തെ സ്വകാര്യ ഹോട്ടലിലേക്ക് സംശയകരമായ സാഹചര്യത്തില് പഞ്ചാബ് സ്വദേശി എത്തിയത്.
കര്ഷക സമരം, പുല്വാമ ഭീകരാക്രമണം തുടങ്ങിയ വിഷയങ്ങളുമായി ബന്ധപ്പെട്ട് പ്രധാനമന്ത്രിക്കും ആര്എസ്എസിനും എതിരായ വാചകങ്ങള് കാറിന് പുറത്ത് എഴുതിയിട്ടുണ്ടായിരുന്നു. അമിത വേഗതയിലായിരുന്നു കാര് ഹോട്ടലിന് മുന്നില് നിര്ത്തിയതെന്നാണ് ഹോട്ടലിലെ ജീവനക്കാര് പറയുന്നത്. സുരക്ഷാ ജീവനക്കാര് ചോദ്യം ചെയ്തപ്പോള് ഇയാള് അസ്വസ്ഥനായി ഹോട്ടലിലെ ബാറിലേക്ക് പോവുകയായിരുന്നു. കാറിലെ എഴുത്തും പെരുമാറ്റവും ശ്രദ്ധയില്പ്പെട്ടതോടെ ഹോട്ടല് ജീവനക്കാര് ഇയാള്ക്ക് മദ്യം നല്കിയിരുന്നില്ല. ആകെ പ്രകോപിതനായ ഇയാള് പിന്നീട് ഹോട്ടലില് ബഹളം വച്ചു. സുരക്ഷാ ജീവനക്കാരെ ഭീഷണിപ്പെടുത്തുകയും ചെയ്തതായി സുരക്ഷാ ജീവനക്കാര് പറഞ്ഞു.
ഹോട്ടല് അധികൃതര് പൊലീസിന് വിവരം അറിയിച്ചതോടെ ഇയാള് കാര് ഉപേക്ഷിച്ച് ഓട്ടോയില് കടന്നുകളയുകയായിരുന്നുവെന്ന് ജീവനക്കാര് പറയുന്നു. കാര് സ്റ്റേഷനിലേക്ക് മാറ്റി പൊലീസ് പരിശോധന നടത്തി. ബോംബ് സ്ക്വാഡും ഡോഗ് സ്വകാഡും സ്ഥലത്തെത്തി പരിശോധന നടത്തുകയും ചെയ്തു. കാറിലുണ്ടായിരുന്ന ബാഗുകളില് നിന്ന് പഴകിയ വസ്ത്രങ്ങളും കേബിളുകളും ഇലക്ട്രോണിക് വസ്തുക്കളും കണ്ടെത്തിയിട്ടുണ്ട്. ഉണങ്ങിയ നിലയിലായിരുന്നു കാറിന് പുറത്തെ മഷി. മഷി ഉണങ്ങിയതിനാല് ഇത് എഴുതിയിട്ട് കുറേ നാളായിയെന്നാണ് പൊലീസ് നിഗമനം. ഈ വാചകങ്ങളുമായി കാര് ഇത്രയും ദൂരം സഞ്ചരിച്ചതെങ്ങനെയെന്നാണ് പൊലീസിനെ ആശയക്കുഴപ്പത്തിലാക്കുന്നത്. പഞ്ചാബ് സ്വദേശിയായ ഓംകാറിന്റെ പേരിലുള്ളതാണ് കാര്. ഇയാള്ക്കായി പൊലീസ് തെരച്ചില് ഊര്ജ്ജിതമാക്കിയിട്ടുണ്ട്. സംഭവം ഉന്നത നേതൃത്വത്തെയും വിവിധ അന്വേഷണ ഏജന്സികളെയും പൊലീസ് അറിയിച്ചിട്ടുണ്ട്.
Click it and Unblock the Notifications
Sign in with Google