ഭൂമികുലുക്കം എന്ന പേരില് ചൈനീസ് കുട്ടികള്
ഭൂകന്പസമയത്ത് യാനിലും ലുഷാനിലും ജനിച്ച രണ്ട് പെണ്കുഞ്ഞുങ്ങള്ക്ക് മാതാപിതാക്കള് ഇട്ട പേര് 'സെഷെന്ങ്' എന്നാണ്. ചൈനീസ് ഭാഷയില് ഈ വാക്കിനര്ത്ഥം 'ഭൂമികുലുക്കത്തില് ജനിച്ചത് ' എന്നാണ്. മാത്രമല്ല 'ഭാഗ്യം' , 'കുലുക്കം' എന്നീ അര്ത്ഥങ്ങള് ലഭിയ്ക്കുന്ന പേരുകളും പലരും കുഞ്ഞുങ്ങള്ക്ക് നല്കി കഴിഞ്ഞു.
റിക്ടര് സ്കെയിലില് ഏഴ് തീവ്രത രേഖപ്പെടുത്തിയ ഭൂകന്പം ഉണ്ടായ യാന് സിറ്റിയിലെ ആശുപത്രിയില് ഈ സമയത്ത് പന്ത്രണ്ടോളം കുട്ടികളാണ് ജനിച്ചത്.
ആശുപത്രിയും ഭൂകന്പത്തില് തകര്ന്നിരുന്നതിനാല് ഗര്ഭിണികളായ രോഗികളെ പുറത്ത് തുറസ്സായ സ്ഥലങ്ങളില് എത്തിക്കുകയും പ്രസവത്തിനായി തുണി കൊണ്ടുളള ചെറിയ കുടിലുകള് ഒരുക്കുകയും ചെയ്തിരുന്നു. ഇങ്ങനെ ലുഷാനില് ആശുപത്രിക്ക് പുറത്ത് ജനിച്ച കുഞ്ഞിന് വിളിപ്പേരായി നല്കിയത് 'ലൂഷിയാന് ' എന്നാണ്. ഈ പേരിനര്ത്ഥം 'തുറസ്സായ' സ്ഥലത്ത് ജനിച്ചവള് എന്നാണ്.
പിന്നേയും രസകരങ്ങളായ ഒട്ടേറെ പേരുകളാണ് പലകുട്ടികള്ക്കും നല്കിയിരിക്കുന്നത്. സമാധാനം സുരക്ഷിത്വം എന്ന അര്ത്ഥങ്ങള് ലഭിക്കുന്ന പേരുകള്, 'വിധി' അല്ലെങ്കില് 'ഭാഗ്യം' എന്നര്ത്ഥം വരുന്ന യ്വാന് യ്വാന് എന്ന പേരുകള് ഇവയൊക്കെ കുട്ടികള്ക്ക് നല്കിയിട്ടുണ്ട്.