'ശ്രീ വിനായകം' പാടിയ കണ്ഠത്തില്‍നിന്ന് ഒരു പ്രതിഷേധവും പ്രതീക്ഷിക്കേണ്ട; വിനായകനെ മര്യാദ പഠിപ്പിക്കണം

ഗാനഗന്ധര്‍വ്വന്‍ യേശുദാസിനെയും സംവിധായകന്‍ അടൂര്‍ ഗോപാലകൃഷ്ണനെയും കടുത്ത ഭാഷയില്‍ വ്യക്തി അധിക്ഷേപം നടത്തിയ വിനായകനെതിരെ പ്രതിഷേധം ശക്തമാവുകയാണ്. അമേരിക്കയില്‍ താമസിക്കുന്ന യേശുദാസ് ഈ വിഷയത്തില്‍ പ്രതികരിച്ചിട്ടില്ലെങ്കില്‍ പോലും സമൂഹത്തിന്റെ വിവിധ കോണുകളില്‍ നിന്ന് വിനായകനെതിരെ നടപടി വേണമെന്നുള്ള ആവശ്യം ഉയരുന്നുണ്ട്.

ഗായകരായ ജി വേണുഗോപാല്‍, കെ.ജി മാര്‍ക്കോസ് ഉള്‍പ്പെടെയുള്ളവര്‍ വിനായകനെക്കെതിരെ രംഗത്ത് വന്നിരുന്നു. ഇപ്പോഴിതാ വിനായകനെ മര്യാദ പഠിപ്പിക്കണമെന്ന ആവശ്യവുമായി മലയാള ചലച്ചിത്ര പിന്നണി ഗായകരുടെ സംഘടനയായ സമം (സിംഗേഴ്‌സ് അസോസിയേഷന്‍ ഓഫ് മലയാളം മൂവീസ്) രംഗത്ത് വന്നിരിക്കുകയാണ്. സംഘടനയുടെ ഫേസ്ബുക്ക് പേജിലാണ് ഇതുസംബന്ധിച്ച കുറിപ്പ് പങ്കുവെച്ചിരിക്കുന്നത്.

പ്രതിഭയുണ്ടായിട്ടും സംസ്‌കാരശൂന്യമായ പെരുമാറ്റം കൊണ്ട് നാടിന് അപമാനമായിത്തീര്‍ന്ന വിനായകനെ മര്യാദ പഠിപ്പിക്കണമെന്നാണ് സംഘടനയുടെ നിലപാട്. 'ശ്രീ വിനായകം നമാമ്യഹം' എന്നു പാടിയ കണ്ഠത്തില്‍ നിന്ന് മറിച്ച് ഒരു പ്രതിഷേധവും പ്രതീക്ഷിക്കേണ്ടതില്ലെന്നും സൈബര്‍ ഗുണ്ടായിസത്തിനെതിരെ ഞങ്ങള്‍ ഏതറ്റം വരെയും പോകുമെന്നും ഫേസ്ബുക്ക് കുറിപ്പില്‍ പറയുന്നു. സമം സംഘടനയുടെ ചെയര്‍മാനാണ് യേശുദാസ്.

വിനായകനെതിരെ കേസ് എടുക്കണമെന്നാവശ്യപ്പെട്ട് മുഖ്യമന്ത്രിക്കും സാംസ്‌കാരിക-സിനിമ വകുപ്പ് മന്ത്രിക്കും നടപടി ആവശ്യപ്പെട്ട് പ്രൊഡ്യൂസേഴ്‌സ് അസോസിയേഷനും അമ്മ സംഘടനയ്ക്കും പരാതി നല്‍കിയിട്ടുണ്ടെന്നും അസോസിയേഷന്‍ അറിയിച്ചു. വിനാശകന് മാപ്പില്ല എന്നു പറഞ്ഞുകൊണ്ടാണ് കുറിപ്പ് തുടങ്ങുന്നത്.

സമം ഫേസ്ബുക്കില്‍ പേജില്‍ പങ്കുവെച്ച കുറിപ്പിന്റെ പൂര്‍ണരൂപം:

വിനാശകന് മാപ്പില്ല!

ഇന്‍ഡ്യന്‍ സിനിമാ സംഗീതത്തിലെ ഏറ്റവും മുതിര്‍ന്ന ഗായകനും കേരളത്തിന്റെ അഭിമാനവും സമം ചെയര്‍മാനുമായ സംഗീതജ്ഞന്‍ പത്മവിഭൂഷണ്‍ ഡോ. കെ.ജെ. യേശുദാസിനെ വ്യക്തിപരമായി അധിക്ഷേപിച്ചു കൊണ്ട് ചലച്ചിത്ര നടന്‍ വിനായകന്‍ സമൂഹ മാധ്യമങ്ങളിലൂടെ നടത്തിയ അസഭ്യവര്‍ഷം മലയാളി സമൂഹത്തിന് അപമാനകരവും തികച്ചും അപലപനീയവുമാണ്.

വിനായകന്‍ എന്ന വ്യക്തി കഴിഞ്ഞ ഏതാനും വര്‍ഷങ്ങളായി സമൂഹ മാധ്യമങ്ങളിലൂടെയും നിത്യജീവിതത്തിലും കാട്ടിക്കൂട്ടുന്ന നിയമവിരുദ്ധ പ്രവൃത്തികള്‍ നാം കണ്ടതാണ്. ഇവയിലൂടെ അപമാനിക്കപ്പെടുന്നത് അഭിവന്ദ്യരായ മുതിര്‍ന്ന വ്യക്തിത്വങ്ങളും കേരളീയ സമൂഹവുമാണ്.

കഴിഞ്ഞ അഞ്ചു വര്‍ഷത്തിലേറെക്കാലമായി അമേരിക്കയില്‍ ഇളയ പുത്രന്റെയും കുടുംബത്തിന്റെയുമൊപ്പം ജീവിച്ച് നിത്യേന സംഗീതതപസ്യ തുടരുകയും കേരളത്തിലെ ആനുകാലികസംഭവങ്ങളിലൊന്നും ഇടപെടാതിരിക്കുകയും ചെയ്തു വരുന്ന ഗന്ധര്‍വ്വ ഗായകന്‍ തനിക്കെതിരെ സമകാലികവിഷയങ്ങളുമായി ബന്ധപ്പെടുത്തി സമൂഹ മാധ്യമങ്ങളില്‍ വന്ന അപവാദങ്ങള്‍ക്കെതിരെ പ്രതികരിച്ചിട്ടില്ല.

'ശ്രീ വിനായകം നമാമ്യഹം' എന്നു പാടിയ കണ്ഠത്തില്‍ നിന്ന് മറിച്ച് ഒരു പ്രതിഷേധവും പ്രതീക്ഷിക്കേണ്ടതുമില്ല. മലയാളത്തിലെ എല്ലാ പിന്നണിഗായകരും അംഗങ്ങളായ സംഘടനയുടെ ചെയര്‍മാന്‍ എന്ന നിലയില്‍ അദ്ദേഹത്തിനു നേരെയുണ്ടായ പരാമര്‍ശങ്ങള്‍ - ഞങ്ങളോരോരുത്തരുടെയും മാനനഷ്ടം കൂടിയാകുന്നു.

മുമ്പൊരിക്കല്‍ സൈബര്‍ അക്രമങ്ങള്‍ അതിരു കടന്നപ്പോള്‍ സമം സൈബര്‍ സെല്ലില്‍ പരാതിയും പത്രങ്ങളില്‍ പ്രതിഷേധക്കുറിപ്പും കൊടുത്തിരുന്നു. സമാരാധ്യനായ ഞങ്ങളുടെ ചെയര്‍മാന്‍ ഇത്തവണയും പ്രതികരിക്കാതിരിക്കുകയും ഒരു യോഗിയുടെ മനസോടെ തികഞ്ഞ നിസംഗത പാലിക്കുകയും ചെയ്ത സാഹചര്യത്തിലാണ് സമവും അദ്ദേഹത്തിന്റെയും കുടുംബാംഗങ്ങളുടെയും താല്‍പര്യം മാനിച്ച് അതിനെതിരെ പ്രതികരിക്കാതിരുന്നത്.

അതേസമയം, ഈ വിനാശകനെതിരെ കേസ് എടുക്കണമെന്നാവശ്യപ്പെട്ട് ബഹുമാനപ്പെട്ട കേരള മുഖ്യമന്ത്രിക്കും സാംസ്‌കാരിക-സിനിമ വകുപ്പ് മന്ത്രിക്കും, നടപടി ആവശ്യപ്പെട്ട് പ്രൊഡ്യൂസേഴ്‌സ് അസോസിയേഷനും അമ്മ സംഘടനയ്ക്കും പരാതി നല്‍കിയിട്ടുണ്ട്.

സമത്തിന്റെ പ്രതിഷേധക്കുറിപ്പില്‍, സമുന്നതനായ ഗന്ധര്‍വ്വഗായകന്റെ പേരിനൊപ്പം പ്രതിസ്ഥാനത്താണെങ്കില്‍ പോലും ഒരു സാമൂഹ്യ വിരുദ്ധന്റെ പേര് എഴുതിച്ചേര്‍ക്കപ്പെട്ടരുതെന്നും ഞങ്ങള്‍ ആഗ്രഹിച്ചു. പക്ഷേ, യേശുദാസ് എന്ന മഹാസംഗീതജ്ഞന്റെ സംഗീതം ജീവവായുവായി കരുതുന്ന കോടിക്കണക്കിന് ആരാധകരുടെ ഹൃദയത്തിലേറ്റ മുറിവുണക്കാന്‍ ഞങ്ങളുടെ ചുരുങ്ങിയ വാക്കുകളിലെ പ്രതിഷേധം പര്യാപ്തമല്ല എന്നു തിരിച്ചറിയുന്നു.

'വിനായകനെ എന്നല്ല സാമൂഹ്യമാധ്യമങ്ങളിലെ ഒരു വിഷജീവിയെയും ഞങ്ങള്‍ക്കു ഭയമില്ല.'
ഈ സംസ്‌കാരശൂന്യതയ്‌ക്കെതിരെ - സൈബര്‍ ഗുണ്ടായിസത്തിനെതിരെ ഞങ്ങള്‍ ഏതറ്റം വരെയും പോകും.

മലയാളികളുടെ സ്വന്തം ദാസേട്ടനോടും പൊതുസമൂഹത്തോടും അദ്ദേഹത്തിന്റെ പേരെടുത്തു പറഞ്ഞ് ക്ഷമാപണം നടത്താത്ത പക്ഷം (വെറുമൊരു സോറി അല്ല) വിനായകന്‍ അഭിനയിക്കുന്ന ചലച്ചിത്രങ്ങളും പങ്കെടുക്കുന്ന പൊതുപരിപാടികളും കാണാന്‍ ഇവിടെ സഹൃദയരുണ്ടാവില്ല. പ്രതിഭയുണ്ടായിട്ടും സംസ്‌കാരശൂന്യമായ പെരുമാറ്റം കൊണ്ട് നാടിന്നപമാനമായിത്തീര്‍ന്ന വിനായകനെ മര്യാദ പഠിപ്പിക്കണമെന്നു കലാകേരളത്തോടും കലാപ്രേമികളോടും ഞങ്ങള്‍ വിനയപൂര്‍വ്വം അഭ്യര്‍ത്ഥിക്കുന്നു.