ഗോശ്രീ: 40 കോടിക്ക് പാലം നിര്മിക്കാമെന്ന്
കൊച്ചി: ഗോശ്രീ പദ്ധതിയില് വൈപ്പിന്-എറണാകുളം പാലങ്ങള് 40 കോടി രൂപയില് താഴെ തുകയ്ക്ക് നിര്മിക്കാന് തയാറായി രണ്ട് കമ്പനികള് രംഗത്തെത്തി.
പാലം നിര്മാണത്തിനായി ടെന്റര് സമര്പ്പിച്ച കമ്പനികളില് മുംബൈ ആസ്ഥാനമായ അഫ്കോണ്സ് ഇന്ഫ്രാസ്ട്രക്ചര് ലിമിറ്റഡ്, കൊച്ചിയിലെ ഭഗീരഥ എഞ്ചിനീയറിംഗ് എന്നീ കമ്പനികളാണ് 40 കോടി രൂപയില് താഴെ ചെലവില് പാലം നിര്മിക്കാമെന്ന് വാഗ്ദാനം ചെയ്തിട്ടുള്ളത്.
39.33 കോടി രൂപയാണ് അഫ്കോണ്സ് ഇന്ഫ്രാസ്ട്രക്ചര് ടെന്ററില് ക്വാട്ട് ചെയ്തിട്ടുള്ളത്. 39.70 കോടി രൂപയുടെ വാഗ്ദാനവുമായി ഭഗീരഥ തൊട്ടടുത്തുണ്ട്. തുകയില് കാര്യമായ വ്യത്യാസമില്ലാത്തതിനാല് രണ്ട് കമ്പനികളുടെയും ടെന്ഡര് സൂക്ഷ്മപരിശോധനയ്ക്ക് വിധേയമാക്കിയ ശേഷം അന്തിമതീരുമാനമെടുക്കുമെന്ന് ഗോശ്രീ ദ്വീപ് വികസന അതോറിറ്റി അറിയിച്ചു. ശനിയാഴ്ചയാണ് ടെന്ഡറുകളുടെ സാമ്പത്തികവശം തുറന്നുപരിശോധിച്ചത്.
ഗോശ്രീ അതോറിറ്റി തയാറാക്കിയ എസ്റിമേറ്റ് തുക 65 കോടിയായിരിക്കെ 40 കോടി രൂപയ്ക്ക് പാലം നിര്മിക്കാന് കമ്പനികള് തയാറായി രംഗത്തെത്തിയത് വന്നേട്ടമാണെന്ന്ഗോശ്രീ പ്രൊജക്ട് ഡയറക്ടര് ഡോ.പി.ചന്ദ്രമോഹന് പറഞ്ഞു.
കായല് നികത്തുന്നതിനും പാലം നിര്മിക്കുന്നതിനുമായി 85 കോടി രൂപ ചെലവ് വരുമെന്നാണ് ഗോശ്രീ അതോറിറ്റി കണക്കാക്കിയിരിക്കുന്നത്. നികത്തിയെടുക്കുന്ന സ്ഥലം വിറ്റാണ് പാലം നിര്മാണത്തിന് തുക കണ്ടെത്തുക. നികത്തിയെടുക്കുന്ന 25 ഹെക്ടര് സ്ഥലം വിറ്റാല് 110 കോടി ലഭിക്കുമെന്നാണ് പ്രതീക്ഷ.