കാര്യങ്ങൾ അതിവേഗം അറിയാൻ
നോട്ടിഫിക്കേഷൻ അനുവദിക്കൂ  
For Daily Alerts
Oneindia App Download

പുതിയ പ്ലസ് ടു സ്കൂളുകള്‍ ഇല്ല

  • By Staff
Google Oneindia Malayalam News

തിരുവനന്തപുരം: പുതിയ പ്ലസ് ടു സ്കൂളുകള്‍ തല്ക്കാലം അനുവദിക്കേണ്ടതില്ലെന്ന് യുഡിഎഫ് സര്‍ക്കാരിന് നിര്‍ദേശം നല്കി. പകരം പ്ലസ് ടുവിന് കൂടുതല്‍ ബാച്ചുകള്‍ അനുവദിക്കും. നിലവിലുള്ള ഡിപിഇപി സമ്പ്രദായം പരിഷ്കരിക്കാനും ജൂണ്‍ അഞ്ച് ചൊവാഴ്ച ചേര്‍ന്ന യുഡിഎഫ് ഉന്നതാധികാരസമിതി യോഗം തീരുമാനിച്ചതായി യോഗത്തിന് ശേഷം നടത്തിയ വാര്‍ത്താസമ്മേളനത്തില്‍ മുന്നണി കണ്‍വീനര്‍ ഉമ്മന്‍ചാണ്ടി അറിയിച്ചു.

ഡിപിഇപി സമ്പ്രദായം ഹൈസ്കൂള്‍ തലത്തിലേക്ക് വ്യാപിപ്പിക്കുകയില്ലെന്നും ഉമ്മന്‍ചാണ്ടി വ്യക്തമാക്കി. നിലവിലുള്ള ഡിപിഇപി പ്രകാരമുള്ള സിലബസ് മെച്ചപ്പെടുത്താനാണ് യുഡിഎഫ് തീരുമാനം. ഹൈസ്കൂള്‍ ക്ലാസ്സുകളിലെ പാഠ്യപദ്ധതി മാറ്റമില്ലാതെ തുടരുമെന്നും ഉമ്മന്‍ചാണ്ടി അറിയിച്ചു.

എക്സൈസ് കാര്യങ്ങള്‍ക്കായും സര്‍ക്കാരിന്റെ മദ്യനയം രൂപീകരിക്കുന്നതിനായും യുഡിഎഫ് ഉപസമിതി രൂപീകരിക്കും. ഉമ്മന്‍ചാണ്ടി കണ്‍വീനറായ സമിതിയില്‍ ജോണി നെല്ലൂര്‍ , യു.സി. രാമന്‍, ബാബു ദിവാകരന്‍, എം.വി. രാഘവന്‍, കെ.ആര്‍. ഗൗരിയമ്മ, വേണുഗോപാലന്‍ നായര്‍ എന്നിവര്‍ അംഗങ്ങളായിരിക്കും.

പുതിയ പ്ലസ് ടു സ്കൂളുകള്‍ തല്ക്കാലം അനുവദിക്കേണ്ട എന്നാണ് യുഡിഎഫ് തീരുമാനം. കടുത്ത സാമ്പത്തിക ബാധ്യത കണക്കിലെടുത്താണ് ഈ തീരുമാനം. പ്ലസ് ടു രംഗത്ത് ഇപ്പോള്‍ തന്നെ 203 കോടി രൂപയുടെ അധികബാധ്യതയുണ്ടെന്ന് ഉമ്മന്‍ചാണ്ടി വ്യക്തമാക്കി. എന്നാല്‍ ഇക്കൊല്ലം പ്ലസ് ടുവിന് കൂടുതല്‍ ബാച്ചുകള്‍ അനുവദിക്കുമെന്ന് ഉമ്മന്‍ചാണ്ടി വ്യക്തമാക്കി.

അടുത്ത വര്‍ഷം സര്‍ക്കാര്‍, അണ്‍ എയ്ഡഡ് , എയ്ഡഡ് മേഖലകളില്‍ കൂടുതല്‍ പ്ലസ് ടു സ്കൂളുകള്‍ അനുവദിക്കുമെന്നും ഉമ്മന്‍ചാണ്ടി വ്യക്തമാക്കി. ഇക്കൊല്ലം പ്ലസ് ടു സ്കൂളുകളിലെ സൗകര്യം മെച്ചപ്പെടുത്തുമെന്ന് ഉമ്മന്‍ചാണ്ടിയോടൊപ്പമുണ്ടായിരുന്ന വിദ്യാഭ്യാസമന്ത്രി നാലകത്ത് സൂപ്പി പറഞ്ഞു.

സ്വകാര്യമേഖലയില്‍ 14 സ്വാശ്രയ എഞ്ചിനീയറിംഗ് കോളേജുകള്‍ അനുവദിക്കുന്നത് സംബന്ധിച്ചുള്ള റിപ്പോര്‍ട്ട് യുഡിഎഫ് ഉപസമിതി സര്‍ക്കാരിന് സമര്‍പ്പിച്ചിട്ടുണ്ട്. ഇത് സംബന്ധിച്ചുള്ള അന്തിമ തീരുമാനം അടുത്ത യുഡിഎഫ് യോഗത്തിലേ ഉണ്ടാവുകയുള്ളൂ.

വാർത്തകൾ അതിവേഗം അറിയൂ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
X